هيعمل قلبان في القطاع المصرفي.. إيه حكاية المشروع اللي هيطلقه البنك المركزي؟

يا ترى ايه حكاية مشروع الهوية المالية الرقمية اللى هيطلقه البنك المركزي؟ وايه فوايد المشروع ده لعملاء البنوك ؟ وليه متوقع يعمل ثورة كبيرة فى عالم الخدمات البنكية؟ وامتى تحديدا هيتم تطبيقه فى البنوك؟

فى الفترة اللى فاتت البنك المركزي والمسئولين عن ادارة السياسة النقدية فى مصر كانوا بيحضروا لمشروع ضخم هيعمل نقلة كبيرة فى قطاع الخدمات البنكية وهيوفر حلول غير مسبوقة للعملاء فى تعاملاتهم البنكية

وحاليا البنك المركزي بيضع  اللمسات الأخيرة لإطلاق شركة "الهوية المالية الرقمية" اللى هيتم اطلاقها فى النص التاني من 2024  بهدف إتاحة فتح الحسابات المصرفية إلكترونياً وعبر المحمول دون الحاجة للذهاب إلى فروع البنوك.. يعنى حضرتك بعد كده لو عاوز تفتح حساب فى اى بنك فى مصر مش محتاج تروح فرع البنك وتاخد رقم وتقف فى طوابير او تستنى دورك وكل اللى عليك انك هتجهز الأوراق المطلوبة وهترفعها على سيستت البنك وخلال دقايق هيكون عندك حساب شغال تقدر تودع او تحول عليه الفلوس من جوه وبره مصر

و الشركة الجديدة وفقا لمعلومات بانكير هتكون زي كيان مركزي بيتولى تهيئة البنية التحتية لفتح الحسابات البنكية من خلال الهوية الرقمية دون الحاجة للذهاب لأحد فروع البنوك.. و"الهوية الرقمية" للعميل المقصود بيها أي بيانات معالجة تقنياً تتعلق بشخص محدد مرتبطة ببيانات رسمية تتيح التقييم والمصادقة على المعاملات اللى بتتم عبر المنصات الرقمية.

وعشان يكون متاح  فتح الحسابات للعملاء دون الحاجة للذهاب إلى فروع البنوك ده بيستلزم إقرار البنك المركزي المصري تعديل يسمح فيه بعدم إلزام العميل بالذهاب إلى الفروع والتوقيع على طلب بخط اليد بفتح الحساب ودي هتكون خطوة ونقلة كبيرة فى مشروع التحول الرقمي في مصر اللى بيرعاه ويشرف على تنفيذه البنك المركزي

وبيتطلب إنشاء الهوية الرقمية استيفاء عمليات التحديد والتحقق والمصادقة اللي بتنقسم لـ 3 مجموعات أولها "عامل المعرفة" اللى بيتطلب اسم المستخدم، وكلمة مرور، وإجابات على أسئلة شخصية.

والعامل التاني بيتطلب  "إثبات الحيازة" كإثبات الشخصية، وصندوق البريد الإلكتروني، ورقم التليفون المحمول، ورقم الجهاز المستخدم أو رقم الشريحة المرتبطين برقم التليفون المحمول، وحساب دفع غير نقدي، وتوقيع إلكتروني معتمد.وبالنسبة للعامل التالت فهيكون "الوجود والحيوية"  يتضمن بصمة الوجه، وبصمة الصوت، وبصمة الأصابع، وهندسة الكف، وبصمة العين، وحيوية رد الفعل، ومحددات الموقع الجغرافي، ومحددات الموقع السيبراني، ومحددات وقت المعاملة.

طب ايه هي مزايا الهوية الرقمية؟

الهوية الرقمية  بتتيح  فتح حساب بنكي عن بعد وده هيسهل حصول الأفراد على الخدمة المصرفية وتوفير الوقت والجهد وبتمتد تطبيقاتها في خارج القطاع المصرفي إلى التعامل مع الشهر العقارى وإصدار بطاقة هوية رقمية لكل مواطن في بعض الدول وهتتولى شركة الهوية المالية الرقمية وضع جميع القواعد اللي تضمن مصداقية العميل اللى بيتعامل مع البنوك عبر الإنترنت.

وبتهتم جميع البنوك في مصر بخطط الأمن السيبراني الخاصة بيها سواء في بنيتها التحتية والبيانات والتطبيقات، طبقًا لتعليمات وتوجيهات البنك المركزى.

وحصل مركز الاستجابة لطوارئ الحاسب الآلي للقطاع المالي التابع للبنك المركزي المصري، على عضوية فريق منظمة التعاون الإسلامي للاستجابة للطوارئ الحاسوبية، واللى بتعتبر بمثابة شهادة دولية جديدة لمصر في مجال الأمن السيبراني تؤكد ريادتها في المجال الحيوي ده 
وبتهدف إستراتيجية "المركزي" إلى تعزيز مشاركة مركز الاستجابة لطوارئ الحاسب الآلي للقطاع المالي في تنفيذ الاستراتيجية الوطنية للأمن السيبراني بكفاءة وفعالية، إلى جانب دعم قدرة المؤسسات والجهات بالدولة على الاستجابة السريعة والتنسيق لمنع الحوادث السيبرانية.

وبيبلغ عدد البنوك العاملة في مصر 38 بنك بتشمل 9 بنوك حكومية أكبرها البنك الأهلي المصري وبنك مصر وبنك القاهرة.

وزاد عدد الحسابات المصرفية في مصر ووصل إلى نحو 47  مليون حساب بنهاية 2023، من أصل 66.4 مليون مواطن ليهم الحق في فتح حسابات من سن 16 سنة وما فوق، بما ساهم في دفع نسبة الشمول المالي إلى نحو 70.7% من 64.8% بنهاية 2022، بحسب بيانات المركزي.