ليلة الرعب فى السوق السوداء.. إيه اللى هيحصل للدولار في نهاية يونيو

يا ترى ايه اللى بيحصل فى كواليس سوق صرف العملات الجنبية فى مصر؟ وليه تجار العملة والمضاربين على الدولار مرعوبين من اللي هيحصل نهاية الشهر الجاي ؟ وايه الاجراءات اللة هتعملها الحكومة الفترة الجاية وهتقضي تماما على فلول العملة الصعبة؟ وليه السوق السودا مش هتقول لها قومة تانية فى مصر؟ وتعمل ايه لو معاك دولارات ؟

قولنا لحضراتكم قبل كده كتير ان خلاص أزمة الدولار فى مصر بتعيش أيامها الأخيرة والفترة الجاية هتنتهى تماما بعد الاجراءات والتحركات المهمة اللى خدتها الحكومة والبنك المركزي واللى أدت لتوافر النقد الأجنبي بكميات كبيرة والبداية كانت من صفقة رأس الحكمة اللى دخلت للبلد بشكل عاجل 35 مليار دولار بالاضافة الى 150 مليار دولار تانية هيتم ضخها خلال مراحل تنفيذ المشروعات طول السنين الجاية

كمان فيه تدفقات دولارية كبيرة جت من مصادر تانية كان من بينها 8 مليار دولار من صندوق النقد تم الموافقة على منحها لمصر بعد زيادة قيمة القرض المتفق عليه من 3 الى 8 مليار دولار بالاضافة الى حوالى 8 مليار دولار من الاتحاد الاوروبي هتدخل مصر على مدار 3 سنين وحوالى 3 مليار دولار من البنك الدولي وتدفقات تانية كتيرة مؤسسات تمويل كبيرة.

طب وده تأثيره ايه على سوق صرف العملات الأجنبية ؟

بص يا سيدي من يوم 6 مارس اللى فات ومن بعد الاجتماع الاستثنائي للجنة السياسة النقدية فى البنك المركزي واللى خدت فيه قرار تاريخي بتحرير سعر صرف الجنيه قدام العملات الأجنبية الكفة بدأت تتعدل وسعر الدولار بقا يقيم وفقا لآليات السوق اللى بتقول ان كل ما العرض يزيد الطلب بيقل والسعر بينخفض يعنى لما البلد يدخلها دولارات كتير البنوك هتقدر توفر الدولار للشركات والمستوردين ولما الدولار يتوفر فى البنوك ده بيقضي تماما على السوق السودا للعملة واللى اكتسبت أهميتها ودورها لما الدولار كان شاحح وكان فيه ازمة نقص عملة اجنبية طاحنة

لأن مفيشحد عاقل هيعرض نفسه للخطر والوقوع تحت طائلة القانون بتداول نقد اجنبي خارج القطاع المصرفي وسعر الدولار فى البنك لو مكنش زيه زي بره فهو كمان اعلى من السوق الموازية

ضيف لده كمان ان الأجهزة الأمنية بتواصل ضرباتها القوية جدا للمضاربين وتجار العملة وعملت حملات امنية مكثفة لضبط حيتان العملة والقت القبض على عدد كبير من المتورطين فى قضايا العملة وتداول النقد الجنبي بصورة غير مشروعة خارج القطاع المصرفي وده خلا فيه رعب وخلا كل اللى كانوا بيتاجروا فى العملات يدخلوا الجحور ومحدش يقدر يبيع ولا يشترى عملات تاني

طب اللى معاه دولارات يعمل ايه ؟

بص كل التقارير اللى طالعة بتقول ان سعر الدولار هينخفض بصورة ملحوظة الفترة الجاية مع وصول التدفقات الدولارية الكبيرة من باقي صفقة راس الحكمة وكمان فلوس قرض صندوق النقد الدولى والمساعدات اللى هيقدمها الاتحاد الاوربي لمصر بالاضافة كمان الى برامج التمويل منخفضة التكلفة اللى هيقدمها البنك الدولي ومؤسسات تمويل تانية لمصر والتوقعات بتقول ان الدولار سعره ممكن ينخفض الى حدود 40 جنيه وعشان كده ده أفضل وقت للتنازل عن الدولار والاستفادة من فارق السعر الكبير قبل هبوط العملة الأمريكية فى الأسواق في نهاية يونيو على أقصى تقدير