من خليها تعفن لـ بلاها فراخ.. شوف المقاطعة عملت إيه في أسعار الفراخ والبيض

المبادرات اللي عملتها الحكومة لخفض اسعار السلع الاساسية للمواطنين واللي كان لها مفعول السحر في خفض الاسعار ، ولكن فضلت اللحوم والبيض فيهم سر غريب واغلب التجار رفضوا ينزلوا في الاسعار.. يا تري اية الجديد في موضوع انخفاض اسعار اللحوم والبيض في الاسواق.. واية الخطة اللي جاية لو الاسعار فضلت علي وضعها الحالي

اكتر من 30 يوم دلوقتي والحكومة بتحارب مع التجار علشان تخفض اسعار السلع الاستراتيجية والاساسية للمواطنين في الاسواق من خلال مبادرات لبيع السلع الاستراتيجية في منافذ وزارة التموين والجيش والمنافذ الثابتة والمتحركة لوزارة الزراعة وغيرها وغيرها من المبادرات الحكومية لتخفيض الاسعار، ومع كل ده الحكومة ممثلة في مجلس الوزراء عمل اجتماع مع كبار الموردين والتجار وطالبهم بالنزول في الاسعار ويكون النزول بشكل مؤثر وفعال مجدي مش مجرد كلام علي ورق.
كلام رئيس مجلس الوزراء مع الموردين والتجار كان له مفعول السحر خصوصا ان الدكتور مصطفي مدبولي، قالهم ان الحكومة عملت اللي عليها ووفرت لهم الدولار اللي كانوا مش لاقيينه لا في البنوك الرسمية ولا في السوق السودا وكان العثور عليه حاجة من الخيال، لكن دلوقتي الدولار بقي موجود ومتوفر في اي وقت لاستيراد السلع والبضائع غير كمان الافراج الجمركي عليها واللي مش هيستغرف وقت كتير خصوصا مع تفعيل النافذة الجمركية الجديدة.
مع كل المبادرات الحكومية دي والضربات اللي عملتها الحكومة لمحتكري السلع والبضائع في الاسواق واللي كان لها السحر في توفير السلع خصوصا السكر واللي كان وجوده في المحال التجارية والهيبرات وغيرها من المنافذ حلم وحلم صعب تحقيقه، ومع كل ده فضلت اللحوم والبيض ماسكين في سعرهم القديم، ومفيش اي تغيير، بل بالعكس في حاجات فيهم اسعارها رفعت وبشكل كبير في وقت اسعار الاعلاف ومستلزمات الإنتاج الحيواني اسعارها بتنزل وبشكل كبير، ومن هنا جت الحملات الشعبية علشان تحل اللغز الصعب وتحقق المعادلة وتحلها علي الأرض.
يا تري اية اللي حصل في ملف اللحوم والبيض علشان اسعارهم تنزل بالشكل المطلوب؟.
اغلب الناس علي مواقع التواصل الإجتماعي دشنوا حملات لمقاطعة اللحوم وكانت البداية بالاسماك ومن محافظة الاسماعيلية واللي كانت لها نتائج غير متوقعة، واسعار السمك انخفض باكثر من 50%، ولما الشعب بدأ يحس بنجاح حملة شعب الأسماعيلية انتقلت المقاطعة منها الي باقي المحافظات وكانت تحت اسم خليها تعفن، وبعدها ظهرت حملة كمان تحت اسم بلاها فراخ وده اللي بتطالب المواطنين بمقاطعة شراء الفراخ لمدة شهر علي الاقل.
الحملات الشعبية اللي عملها الشعب المصري كان لها برضوا نجاح منقطع النظير وفعلا الاسعار انخفضت باكثر من 40% ووصل سعر كيلو الفراخ الحية في المزرعة لـ 85 جنيهًا، وبيوصل للمستهلك بحد أقصى 95 جنيه، ووصل سعر كرتونة بيض المائدة في المزرعة لـ 135 جنيهًا، وبتوصل للمستهلك بحد أقصى 145 جنيه.