بيع ولا تشتري.. شوف أسعار الذهب رايحة علي فين

الدهب من الحاجات اللي سعرها بيتقلب بين الصعود والهبوط والقفزات علي مدار الشهور اللي فاتت لما عدي عيار 21 لأكثر من 4000 جنيه.. وحاليا فضل سؤال واحد بس عند الناس نشتري ولا نبيع.. وايه الوقت المناسب للشراء واية الوقت المناسب للبيع.. لو عايز تعرف اجابات مفصلة لكل ده اقرا  للآخر

الاستثمار في الدهب واحد من اهم جوانب استثمار رؤوس الأموال في السوق المصري خصوصا للناس اللي معاهم فلوس علي قدها واللي بيشتروا كل فترة حاجات صغيرة، وبيصحوا كل يوم الصبح وعينهم بتكون علي سعر العيار وصل لكام النهاردة، خصوصا أن الاستثمار في الدهب عمره ما خسر ودايما استثمار كسبان.
الانخفاض اللي حصل في الاسعار في الايام اللي فاتت خلي في ناس كتير حست أنها خسرت وبشكل جامد جدا خصوصا ان في ناس اشترت الذهب لما كان سعره بـ4000 جنيه، وحاليا سعر يا دوب معدي 3000 جنيه يعني في خسارة تقارب 1000 جنيه في كل جرام، وحاليا مفيش في دماغهم غير سؤال واحد بس نبيع الذهب وخسار قليلة ولا مكسب بيعد ولا نتصرف ازاي.
كل خبراء المعدن الاصفر اجمعوا ان الانخفاض الموجود في اسعار الذهب دلوقتي ما هو اللي انخفاض مؤقت، وان الذهب هيعاود للارتفاع في الايام اللي جاية خصوصا في ظل الاحداث السياسية اللي بيشهدها العالم من حروب وصراعات واللي هتاثر علي اسعار السلع والبضائع واسعار النفط والطاقة العالمية وبالتالي اسعار الذهب عالميا بدأت في الارتفاع وبشكل تصاعدي وبشكل كبير والسر ده هيبان بشكل اكبر من اول شهر مايو الجاري.
السر في الارتفاع المفاجئ في اسعار الدهب مع بداية شهر مايو هيكون مع اجتماع البنك الفيدرالي الأمريكي لتحديد مصير أسعار الفائدة في الايام اللي جاية واللي طبعا هيكون لها تأثير مباشر على أسعار الدهب،  خصوصا ان قوة الذهب في المستقبل هتتوقف لحد كبير على تقديرات الفيدرالي الامريكي لأرقام التضخم والتدابير، ولو الفيدرالي الامريكي قرر خفض أسعار الفائدة فالمتوقع أن أسعار الدهب هتشهد ارتفاع خصوصا في المخاوف العالمية باستمرار عدم استقرار الأوضاع الاقتصادية والجيوسياسية العالمية واللي هتكون لها تاثير مباشر علي اسعار الطاقة.
خبراء الدهب نصحوا المواطنين بالشراء في الوقت الحالي والبعد تماما عن فكرة البيع في الوقت الحالي خصوصا ان الفترة اللي جاية متوقع فيها ان اسعار الدهب هترتفع وبشكل كبير خصوصا مع انتهاء مبادرة الحكومة بالسماح بدخول الذهب مع المسافرين بدون جمارك،؟ والمحدد انتهاءها يوم 12 من شهر مايو الجاري، وفي حال لو صدر قرار من مجلس الوزراء بوقف العمل بالقرار يعني انه هيحصل زيادة في الطلب علي المعروض بالأسواق وبالتالي الاسعار هترتفع وبشكل كبير عن الاسعار الموجودة حاليا للجرامات.
الخبراء قالوا كمان ان الدهب هو زينة وخزينة ومكسب كبير بس علي المستوي البعيد، واللي عايز يحقق مكاسب من الذهب لازم يصبر عليه فترة اقل حاجة سنة، وان الرهان علي الذهب دايما كسبان وعمر ما حد راهن عليه وخسر.