فرصة مش هتتعوض.. لو عاوز تشتري دهب شوف اللي بيحصل في الصاغة دلوقتي

 
ايه اللي بيحصل في الصاغة وليه الدهب بينزل وياترى الأسعار رايحة على فين ولو بتفكر تشتري إيه هو الوقت المناسب.. شوف الفيديو للأخر وهتعرف التفاصيل
 

الدهب في مصر دايما عليه العين وحركة السوق والتداول عليه بتكون مؤشر لحاجات كتير أهمها الوضع الاقتصادي وحالة الاستقرار والاضطرابات لأن الدهب دايما مرتبط بالأزمات والخوف بين الناس ولو واخدين بالكم اكتر وقت كان المصريين بيشتروا فيه الدهب كان قبل صدور أي قرارت من البنك المركزي قبل التعويم وكمان كانت في ذروة أزمة نقص الدولار ودا لأن الدهب نفسه ملاذ آمن والناس بستثمر فيه وفي نفس الوقت بتحفظ قيمة الفلوس من أي انخفاض لكن الوضع اختلف بشكل كبير بعد التعويم والأمور بقت مستقرة.
طيب نرجع لموضوعنا وخلونا في الجديد بالصاغة وأسعار الدهب رايحة على فين.. والأول زي ما احنا عارفين وقلنا كتير قبل كده إن أسعار الدهب بتحددها عوامل كتير منها السعر العالمي والعرض والطلب وحالة الاستقرار الدولي والهزات الاقتصادية الدولية وحاليا السوق المحلي ليه كام يوم مستقر والأسعار كمان بتنزل وجرام 21 قرب على 3080 جنيه ودا لأسباب كتير منها انخفاض سعر الدهب العالمي  خلال الأيام اللي فاتت نتيجة تراجع حدة الصراعات والنزاعات في  الشرق الأوسط وعدم التصعيد بين روسيا واوكرانيا وسجل سعر الأونصة 2336 دولار، بعد ما تخطت 2400 دولار، في الأسابيع الأخيرة.
ليه بنتكلم عن السعر العالمي.. لأن سعر الدهب بره هو اللي بيحدد بشكل كبير سعر الدهب في مصر وزي ماشفنا الأسعار بتنزل كل يوم وعشان كده خبراء الدهب وتجار الصاغة شايفين إن ده أفضل وأحسن وقت تشتري فيه دهب وتشيله للزمن وكمان شايفين إن أفضل حاجة تشتري  مشغولات دهبية كوسيط للحفاظ على القيمة والزينة في نفس الوقت أو الاستعمال.
رئيس شعبة صناعة الدهب والمجوهرات شايف إن شراء المشغولات أفضل من السبايك، لأن المصنعية قليلة وفي نفس الوقت بتقدر تتزين بالدهب.

وكمان تجار الصاغة شايفين إن الشراء مهم جدا دلوقتي لأن سعر الجرام بالسوق المصري، أقل من نظيره بالأسواق العالمية، لان سعر جرام عيار 21 وصل لحوالي 3100 جنيه بمتوسط 63.9 دولار خلال إغلاق معاملات السبت

طيب امتي نخاف إن الدهب يزيد.. شوف حضرتك لو عاوز تعرف الدهب بنفسك رايح علي فين يبقي تتابع اخبار العالم أول بأول ولو لقيتها هادية يبقي الدهب مستقر لكن لو لقيت أزمات عالمية كبيرة وجديدة يبقي الدهب سعره هيضرب ودا غير قرارات الفدرالي الأمريكي واللي دايما بيكون ليها تأثير قوي، ومثلا لو الفدرالي بكرة نزل سعر الفايدة على الدولار يبقي سعر الدهب هيزيد بشكل تلقائي وكبير لأن انخفاض سعر الدولار بيخلي البنوك المركزية تشتري دهب عشان تحافظ على قيمة الاحتياطيات بتاعتها من الدولار وبالتالي الطلب على المعدن هيزيد وسعره يرفع.. عشان كده لو عاوز تستثمر في الدهب انزل دلوقتي الصاغة واشتري.