بعمل اللى محدش يفكر فيه!! رسائل ساخنة للسيسي من العين السخنة

من فضل ربنا عليا بعمل اللي ماحدش يفكر فيه.. وللناس اللى بتقول بتصرفوا كتير ليه معنديش حل تاني.. ده الكلام اللى قاله الرئيس السيسي النهاردة خلال افتتاحه مركز البيانات والحوسبة السحابية الحكومية لتعزيز الريادة المصـرية إقليميًا ودوليًا لـترسيخ مكانة مـصر كممر رقمي لنقل البيانات وقيادة أسواق مـراكز البيانات في الشـرق الأوسط وأفريقيا.. فيا ترى الارئيس السيسي يقصد ايه بكلامه ده ؟ وليه فعلا الدولة بتصرف أموال طائلة على مشروعات ضخمة زي المشروع ده ؟

من ساعات الرئيس عبدالفتاح السيسي كان بيفتتح مركز البيانات والحوسبة السحابية الحكومية على طريق العين السخنة .. وكعادة الرئيس استغل الحدث ده ووجه مجموعة من الرسايل الهامة والحاسمة للمصريين

الرئيس أكد أكد انه تم صرف مبالغ كبيرة على رقمنة مدينة العدالة في العاصمة الإدارية الجديدة.

ورد “السيسي على سؤال المصريين حوالين أوجه الصرف القومي وقال : "ناس بتقول انتوا بتصرفوا كتير ليه.. أنا عندى خيار تاني.. يا نبقى زي مخاليق ربنا أو يبقى نبقى متخلفين.. خاصة إحنا دولة مش غنية".

السيسي أكد إن 90% من الكابلات البحرية الموجودة فى العالم بتمر من خلال مصر وقال ان الفكرة كلها إن إحنا لينا موقع كويس قوي ممكن نستفاد منه، وبالفعل بدأنا في ده من سنين طويلة فاتت وهو موضوع الكابلات البحرية وبالتالي نقدر نقول إن مصر نقطة أو محور رئيسي لنقل البيانات والاتصالات بين الشرق والغرب وده اللى أتاحه لينا موقعنا

ووجه الرئيس السيسي رسالة عتاب للأسر المصرية بسبب عدم الاهتمام بتطوير ثقافة الأبناء والطلاب في مجال الرقمنة وتحويل البيانات.

وقال “السيسي” :" اللى عليا بفضل الله سبحانة وتعالى بعمل اللى محدش يفكر فيه ..  ولو كنت مشيت على المسار العادي اللى قبل 2018 مكنتش هعمل الكلام الحالى خالص".

وواصل الرئيس كلامه وقال  :" ناس كتير تقول ملوش لازمة انتوا مش عايزينا نحلم لبلدنا وتاخد مكان فيه نمو حقيقي".

واختتم السيسي كلامه وقال :ربنا شرفني وعزني ودايما بيراضيني بالكلام اللى احنا بنفكر فيه ويساعدني اعمله ..وبقول للصمريين متلومنيش أنا بس انا برضوا ألومكم معايا".

وافتتح الرئيس السيسي النهاردة مركز البيانات والحوسبة الحكومية بطريق العين السخنة اللى بيعد أول مركز للبيانات والحوسبة الحكومية، وصرح جديد تم بناؤه على أحدث النظم العالمية لحفظ ومعالجة البيانات في العالم.

وبتعد مـراكز البيانات والحوسبات السحابية جوهر التحول الرقمي وأحد أهم الأعمدة اللي بيرتكز عليها الاقتصاد العالمي حاليا وأضافت آفاق جديدة لريادة الأعمال فى كافة المجالات والصناعات.