لو عاوز تشتري أجهزة منزلية.. استنى التوقيت ده.. هنقولك التجار هيعملوا إيه؟

فيه معركة كبيرة حاصلة حاليا بين تجار الأجهزة المنزلية وشعبة الأجهزة الكهربائية بغرفة الجيزة التجارية بعد اعلان الشعبة من طرف واحد عن تخفيض كبير فى اسعار الأجهزة هيوصل الى 25% بداية من الاسبوع ده.. تجار الأجهزة بيقولوا ان ده كلام مش صحيح وان محدشفيهم اتفق مع الشعبة على قيمة التخفيض ده .. فيا ترى ايه كواليس الأزمة ؟وهل فعلا فيه تخفيض هيحصل على اسعار الأجهزة الكهربائية ولا لأ ؟ ولو فيه قيمته هتكون كام ؟ وهيحصل امتى؟

إعلان شعبة الأجهزة الكهربائية بغرفة الجيزة التجارية عن توصلها لاتفاق مع عدد من مصانع الأجهزة المنزلية لخفض أسعار منتجاتها بحوالى 25% اتسبب في موجة غضب واسعة داخل مصانع الأجهزة المنزلية والكهربائية وفقا لكلام حسن مبروك رئيس شعبة الأجهزة المنزلية والكهربائية باتحاد الصناعات.. اللى أكد ان  بعض مصانع الأجهزة المنزلية اللي تم إعلان موافقتها على الخفض بعد اجتماع مع شعبة الأجهزة الكهربائية بغرفة الجيزة التجارية، تواصلت مع شعبة الأجهزة المنزلية والكهربائية باتحاد الصناعات، الممثل الرسمي للمصانع في مصر، ونفت كل الكلام اللى تم تداوله بشأن خفض الأسعار بنسبة 25%وقال ان  بعض المصانع اللي تم ذكر أسمائها محضرتش أصلا اجتماع الشعبة التجارية يوم الأربع اللى فات

رئيس شعبة الأجهزة المنزلية والكهربائية باتحاد الصناعات قال ان الاجتماع مع غرفة الجيزة كان اجتماع ودي ومالوش علاقة بقرارات خفض الأسعار للمصانع وقال انه لو كان الاجتماع رسمي واتفقت الشركات فيما بينها على خفض الأسعار بنسبة محددة كان هيتم الاعلان عن الأمر ده غير ان تحديد نسبة محددة للخفضمخالف لقانون حماية المستهلك

طب هل فيه تخفيضات هتحصل فى اسعار الأجهزة ولا لأ ؟

وفقا للمسئولين فى شعبة الأجهزة المنزلية والكهربائية باتحاد الصناعات الفترة الجاية ممكن تشهد اتجاه بعض الشركات لخفض أسعار الأجهزة المنزلية بنسبة منخفضة تتراوح بين 5% و15% على أقصى تقدير، بهدف تنشيط المبيعات فقط، لكن في حقيقة الأمر خفض الأسعار وفقا للشعبة هيحتاج  الانتظار حوالي شهرين على الأقل لغاية حساب انعكاس وتأثير سعر الدولار الحالي على تكاليف الإنتاج خصوصا أن جزء كبير من الأجهزة المنزلية ومكوناتها مستورد من الخارج.

يعنى بالبلدي كده مفيش تخفيض كبير فى اسعار الأجهزة المنزلية الا بعدشهرين من دلوقتي على أقل تقدير

طب ليه التخفيض ميحصلش دلوقتي؟

وفقا لمسئولي الشعبة برضوا معظم الأجهزة المنزلية اللي دخلت مصر الفترة الأخيرة تم استيرادها عند وصول سعر الدولار إلى 70 جنيه وكمان تم الإفراج عنها وفقاً لسعر دولار جمركي في حدود 50 جنيه مضاف ليه غرامات تأخير استلام الشحنات وده رفع التكلفة بشكل كبير على مصانع الأجهزة المنزلية ورغم كده المصانع ما زودتش الأسعار ولكنها بتستعد لخفض الأسعار فور وضوح تأثير تراجع سعر الدولار على التكلفة