فرصة ماتضيعهاش .. امتي تشتري دهب

ايه اللي بيحصل في سوق الدهب الفترة الجاية وليه سعره رجع ينزل بقوة تاني.. هل ياترى هيرفع تاني وامتي.. وإيه افضل وقت أشتري فيه دهب واشيله.. خليكم معانا للاخر وهنفهم اللي بيحصل في الصاغة

كلنا شفنا اللي بيحصل في سوق الدهب اليومين اللي فاتو سواء عالميا أو محليا وطبعا فيه علاقة قوية بينهم وعامل مشترك وهو سعر الدولار وشفنا حالة الفوضى والاضطراب مابين صعود وهبوط وقفزات وانهيارات وده بسبب ان سوق الدهب العالمي مش ملك نفسه يعني الدهب بالذات سعره بيتحدد بناء على الاستقرار العالمي والازمات والحروب واخر حاجة العرض والطلب ودا لأن الحكومات والبنوك المركزية بتجري تشتري المعدن الاصفر في وقت المشاكل الدولية الكبيرة أو الاضطراب في الاقتصاد والتجارة الدولية عشان هو أفضل ملاذ آمن وده بيفسر ليه سعره مكانش مستقر وبيشرح حالة الصعود المفاجيء في سعره وبعدين نزوله تاني ..
واليومين دول من وجهة نظر خبراء الدهب والاستثمار هو أفضل وقت تشتري دهب وتشيله ..طيب ليه بنقول كده.. عشان ببساطة الدهب اليومين دول واخد منحني هبوطي كبير وهيرجع يزيد تاني وبشكل قياسي لأن المعركة الحقيقية للدهب مع الدولار بعيد عن الصراعات الدولية وزي ما احنا عارفين إن الفدرالي الأميريكي بيستعد لخفض الفائدة على الدولار ودي أكتر حاجة بتولع سعر الدهب عالميا لأن تخفيض الفايدة معناه إن الدولار سعره هيقل عالميا وبالتالي البنوك المركزية هتلجأ للدهب عشان تحافظ على احتياطاتها من الدولار وبالتالي الطلب هييزيد على الدهب بشكل كبير جدا وده معناه بردو ببساطة إن المعدن الأصفر سعره هيزيد بشكل كبير ودا اللي اتوقعته مؤسسات مالية كبيرة وقالت إن الدولار هيوصل 3 الاف دولار في الكام شهر اللي جايين.
وأكيد في مصر الدهب هيزيد لو زاد سعره عالميا والفرق بين سعر الدهب دلوقتي في السوق العالمي وبين السعر اللي متوقع هيوصله حسب التوقعات هو دا هيكون فرق السعر في الصاغة المصرية وبالتالي الأسعار هتضرب في السحاب وعشان كده بنقولك دا أفضل وقت تشتري فيه دهب وتستثمر فيه وتشيله للزمن لأن اللي جاي صعب في الصاغة ودا مش كلامنا لكن دي توقعات عالمية والبنوك المركزية عارفها إنها توقعات صحيخة وعشان كده كان فيه طلب ضخم جدا على الدهب في الفترة اللي فاتت وخاصة من الصين لأنها عارفة إن لسه فيه معركة طويلة مع الدولار وخاصة بعد الانتخابات الأميريكية.
وممكن حد يسأل ويقول مالنا احنا ومال أمريكيا والصين والانتخابات والمشاكل اللي بره.. والاجابة بسيطة وهي إن الاقتصاد في العالم كله بقي مرتبط ببعضه واللي بيحصل في اخر بلاد العالم بيأثر علينا مباشرة وطبعا شفنا إزاي ازماتنا كلها مستوردة بسبب اللي بيحصل حولينا وتحليل الللي بيحصل في الخارج هيورينا الدنيا رايحة على فين في مصر ونعمل حسابنا.