بعد تنفيذ مقترح السيسي.. رعب في الأسواق والدور على الفراخ واللحمة

حملات المقاطعة وعلي مدار اكثر من 6 شهور اثبتت نجاحها والشعب المصري اثبت فعلا انه عنده ارادة ويقدر يقف قدام اي سلعة أو اي تاجر يرفع في الاسعار بمزاجه وده اللي حصل في مقاطعة المنتجات الغربية وحاليا ده الدور علي المنتجات المصرية في محاولة لنزول اسعارها للأسعار المعقولة.. يا تري اية اللي بيحصل في السوق المصري دلوقتي وليه حالة الرعب من التجار الجشعين.. والمقاطعة ماشية ازاي.

طبعا كلنا تابعنا من كام شهر المقاطعة اللي نفذها الشعب المصري لبعض المنتجات الغربية بسبب دعم اصحاب الشركات دي لكيانات سياسية معادية للعرب، والمقاطعة دي اثبتت نجاحها وبنسبة 100%، وفعلا الشركات دي تعرضت لخساير كبيرة وصلت لاتخاذ قرارات من ملاكها باغلاق فروع في مدن ومحافظات مصرية وكبيرة ومشهورة وكان عليها قتال علي تاخذ منها وجبه أو تشتري منهم حاجة.
الدرس المصري في مقاطعة المنتجات الغربية عطي انطباع للناس انهم ممكن ينجحوا في مواجهة اي ارتفاع في الاسعار، خصوصا ان في تجار فعلا بيبالغوا في اسعار السلع وبيرفعوا بمزاجهم وعلي هواهم خصوصا ان الدولة حاليا وفرت لهم لبن العصفور، وبقي الدولار متاح وموجود حاليا في البنوك وباقل من السعر اللي كانوا بيشتروا بيه من السوق السودا قبل ما ينتهي وجودها في مصر، لكن جش بعض التجار لسه موجود ولسه مصممين علي اللعب علي حاجة الناس للسلع ورفع اسعارها وتحقيق اكبر مكسب مادي وخلاص.
محافظة الاسماعلية واللي معروف عندها انها واحدة من اقوي المحافظات في صيد وبيع واكل السمك، ظهرت في حملات علي مواقع التواصل الإجتماعي لمقاطعة شراء واكل السمك لفترة معينة خصوصا ان اسعاره كانت كل يوم في الطالع ومفيش ضابط ولا رابط ولا رقابة للموضوع وفعلا الناس استجابت للمبادرة واسواق السمك بقت شبه فاضية تماما من الناس، ومفيش مواطن بيدخل يشتري، والتجار لما لقوا الموضوع كده وان خسارتهم بتزيد يوم عن التاني اضطروا ينزلوا في سعر السمك، ويوم ورا التاني الاسعار نزلت اكتر واكتر ولسه بتنزل خصوصا ان التجار عارفين ان السمك ده لو مش اتباع في خلال مدة معينة هيبوض ورحته هتعفن وهيكون مصيره للزبالة .
الغريب في حملة المقاطعة انها موقفتش علي الاسماعيلية بس، لا ده وصلت لمحافظات كتيرة زي بني سويف والاسكندرية وبورسعيد ودمياط والشرقية والغربية والسويس وده من المحافظات، وبقت في هشتجات كتيرة علي مواقع التواصل الإجتماعي فيس بوك وتوتير تحت عنوان خليها تعفن، لمقاطعة كل السلع اللي اسعارها زادت بدون مبرر، وفعلا الناس حست ان المقاطعة هتجيب نتيجة، خصوصا ان في منتجات كتيرة في السوق بدأ سعرها ينزل ويكون في المعقول.
مقاطعة المصريين موقفتش علي سوق السمك، وحاليا في دعوات لمقاطعة اللحوم والفراخ وكل الحاجات اللي المواطن بيحتاجها بشكل يومي، وفعلا في استجابة كبيرة من الناس للدخول فيها والاستغناء علي حاجة سعرها بيزيد خصوصا ان الشعب عارف ان المبادرات دي في دول كتيرة وكبيرة علمتها وفعلا كانت سبب في وقف جشع التجار في تحقيق مكاسب مالية علي حساب حاجة المواطن، فيا تري المصريين هيقدروا يكسوا شوكة التجار ويرجعوا الاسعار لوضعها الطبيعي ولا هتكون موجة وتعدي والاسعار ترجع لارتفاعها اللي موجودة عليه.