إيه اللي حصل في حقل ظهر.. الغاز راح فين وليه مصر هتوقف التصدير
هو ايه اللي حصل في حقل ظهر بالظبط وليه الاشاعات كترت حوليه وهل صحيح انتاج الحقل هيوقف وليه مصر قررت توقف التصدير.. تعالوا نشوف أصل الحكاية في الفيديو ده.
معروف في مصر أن أكتر حاجة بتنتشر هي الاشاعات وإن فيه كتيب مخصوص على مواقع التواصل الاجتماعي بتروج ليل نهار للكدب والأخبار المفبركة والأخبار المضروبة عشان تهز البلد وللأسف ناس كتير بتصدق زي اللي حصل اليومين اللي فاتوا في حقل ظهر للغاز الطبيعي ومرة يقولك البير داخله ميه وكأنهم خبراء غاز وبترول ومرة يقولك الغاز خلص فيه ومرة تالتة قالوا إن الشركات الاجنبية في الحقل هربت عشان ليها فلوس ومش راضيين يشغلوا الحقل وغيرها من الاشاعات والاكاذيب.. طيب ايه اللي حصل يالظبط.
شوف ياسيدي حقل ظهر تم اكتشافه في ديسمبر 2017 وينتج من 6 سنين، والإنتاج وصل إلى 5 تريليونات قدم مكعب و9 ملايين برميل متكثف، وفي عالم حقول الغاز وده مش سر بنكشفه لكن ده الطبيعي إن فيه هناك ظاهرة في كل الحقول وهي معروفة وعالمية وهي التناقص الطبيعي للآبار المكتشفة والمتوسط في الغاز بنسبة 15% سنويًا يعني فيه معادلة في قطاع حقول الغاز بتقول إن انتاجه بيقل كل سنة في نسبة بتوصل ل15 في المية وحسب المتحدث باسم وزارة البترول والثروة المعدنية في مصر، حمدي عبدالعزيز وده متحدث رسمي مش هيطلع يقول أي كلام خاصة إن الحقل فيه شركات أجنبية ولو بيقول حاجة غلط الناس دي مش هتسكت ده غير إن مفيش حاجة بتستخبي في سوق الطاقة الدولية.. المهم الراجل قال ياجماعة حقل غاز ظهر بينتج حوالي 2 مليار متر مكعب من الغاز في اليوم، وهو من أهم حقول الغاز الموجودة في مصر، وإن الحكومة شغالة على حفر آبار غاز تحقق قفزة تنموية جديدة للاقتصاد المصري، وإن الرقم الاحتياطي اللي تم إعلانه مش ثابت لكن لازم يكون هناك آبار تنموية في المنطقة المنتجة بمعني إن الحقل ظهر مثلا بيقع في منطقة امتياز كبيرة ولما الحقل انتاجه يقل بتقوم الشركة بحفر بير تاني في نفس مساحة الامتياز عشان تعوض الانتاج والمعني هنا منطقة الامتياز كلها مش المكان اللي فيه منصة استخراج الغاز وده اللي بيحصل دلوقتي والشركة المسئولة عن ظهر بتحفر دلوقتي البير الـ19 في منطقة الامتياز للحفاظ على الاحتياطات الموجودة ومواجهة التناقص الطبيعي.
وبخصوص هروب الشركات فمسئول البترول نفي ده تماما وقال إن شركة إكسون موبيل الأميركية على سبيل المثال شغالة تنقيب في منطقة بالبحر المتوسط، وتم اكتشاف حقول نرجس وخوفو، بالإضافة إلى المرحلة الـ11 في منطقة امتياز غرب الدلتا، وإن شركات البترول الأجنبية موجودة ومكملة في مصر وفيه عقود مصر بتحترمها والشركات دي ليها سنين طويلة في مصر وعارفه إن مصر سوق واعد وعمرها ما صادرت حقوق مادية للشركات دي.
وبخصوص الأرقام فمصر بتستهلك حاليا حوالي 6 مليار قدم مكعب يوميا من الغاز الطبيعي وده قبل ذروة الاستهلاك في شهور الصيف وطبعا مع ارتفاع درجات الحرارة بيتوقع إن الاستهلاك يزيد بين 6.2 و6.3 مليار قدم مكعب يوميا ودلوقتي إنتاج الغاز الطبيعي الحالي بيتراوح بين 5.2 و5.4 مليار قدم مكعبة يوميًا ويوجه بالكامل إلى السوق المحلية بالإضافة إلى كميات اللي تم استيرادها من الخارج واحتمال كبير مصر توقف تصدير الغاز مؤقتا كحل لأزمة الكهربا في الصيف لأن المواطن هو الأولوية حتى لوكانت البلد لسه طالعة من أزمة دولار.
