الحكومة ناوية على إيه في أزمة تخفيف الأحمال بالصيف

 
خطة تخفيف الأحمال الكهربائية واحدة من اهم واقوي المشاكل اللي بتواجه الحكومة في الوقت الحالي خصوصا ان مشكلة بتمس كل المصريين مش طوائف معينة ولا فئات معينة.. وحاليا في شكاوي كتيرة من المواطنين ومطالب بحل المشكلة خصوصا اننا داخلين علي فصل الصيف ومتوقع ان المشكلة دي تزيد مش هتقل.. يا تري الحكومة بتفكر ازاي في ازمة تخفيف الأحمال في فصل الصيف .. واية اللي هتعمله الحكومة 

مع انتهاء اجازة عيد الفطر المبارك، مجلس الوزراء اعلن عن عودة تطبيق خطة تخفيف الأحمال الكهربائية علي كل المناطق السكنية في كل محافظات الجمهورية باستثناء 4 محافظات بس وهيا البحر الأحمر وجنوب وشمال سيناء ومطروح، خصوصا ان المحافظات دي في نسبة استثمارات سياحية كبيرة جدا ده غير المنشأت الحيوية والعسكرية الموجودة فيهم.
الخوف كل الخوف من ازمة تخفيف الأحمال مش من دلوقتي لا ده هيكون مع البداية الحقيقة لأشهر الصيف خصوصا شهور 6 و 7 و 8 ، واللي بتكون فيهم الحرارة عالية حاليا، واغلب الناس بتشغل المراوح والتكييفات، واللي بيعملوا ارتفاع في الاحمال الكهربائية علي الشبكة القومية للكهرباء وبالتالي متوقع ان الكهرباء تقطع فترة اطول .
طيب وزارة الكهرباء بتفكر ازاي في حل الازمة دي في فصل الصيف؟.
الدولة عارفة كويس قوي انها هتكون عنها مشكلة كبيرة جدا في فصل الصيف في شهور الصيف، وعلشان كده بدات من دلوقتي تحط حلول لمشكلة قطع الكهرباء وقررت وقف تصدير شحنات الغاز الطبيعي المسال اعتبارا من شهر مايو اللي جاي علشان الدولة تقدر تلتزم بتوفير احتياجات محطات الكهرباء من الغاز الطبيعي خصوصا ان اغلب ازمة تخفيف الأحمال ناتج عن نقص المواد البترولية اللازمة لتشغيل محطات توليد الكهرباء سواء مازوت او وقود او غاز طبيعي .
طيب اية هيا مقترحات وزارة الكهرباء لو الدولة مقترتش توفر احتياجات محطات توليد الكهرباء من الوقود؟.
في مقترح اطرح اكتر من مرة من وزارة الكهرباء وهو استمرار وتوزيع تخفيف الأحمال وزيادتها من ساعتين الي 4 ساعات، وهيكون قطع الكهرباء بمعدل ساعتين في النهار وزيهم في الليل وعلي كل المناطق السكنية علي مستوي الجمهورية، والمقترح قابل للتطبيق مع دخول فصل الصيف وارتفاع الأحمال الكهربائية .
وزارة الكهرباء حاطة امل كبير علي خطة تسعير شرايح الكهرباء الجديدة واللي هيتم العمل بها بداية من شهر 6 اللي جاي، خصوصا ان الدولة هتزود اسعار شرائح الكهرباء عن الاسعار اللي شغالين بيها حاليا، ومتوقع الزيادة تكون بنسبة كبيرة خصوصا في الشريحين الاولي والثانية ودول اكبر شرحتين بياخذوا دعم من الدولة، والزيادة دي هتكون لسببين الأول منهم زيادة اسعار الوقود عالميا وبالتالي زيادة تكلفة تشغيل محطات توليد الكهرباء وبالتالي لازم اسعار الكهرباء كمان تزيد، وده في اطار خطة الدولة لرفع الدعم عن قطاع الكهرباء.. وتاني سبب هو ان وزارة الكهرباء عليها مديونية كبيرة لوزارة البترول والثروة المعدنية بتاع وقود محطات توليد الكهرباء وشافية ان الزيادة دي هتكون سبب اساسي ان الوزارة تسد جزء كبير من الديون اللي موجودة عليها .