غرامة هتوصل 2 مليون جنيه.. إزاي التموين هتقدر تراقب أسعار العيش السياحي
طبعا كلنا سمعنا وشوفنا تصريحات وزارة التموين عن فرض تسعيرة جبرية للعيش السياحي واللي بتكون علي اساس وزن كل رغيف، يعني الرغيف اللي وزنه 80 جرام غير الرغيف اللي وزنه 35 جرام.. يا تري التموين هتراقب الموضوع ده ازاي.. وانا لو عندي شكوي اقدر اقدمها ازاي
من بعد انتهاء اجازة عيد الفطر المبارك، ووزارة التموين فاقت من فترة النوم الطويل اللي كانت فيها وحست انها لها دور في الحكومة وانا عليها شغل لازم تقوم بيه وهو مراقبة الاسعار في الاسواق، ومراقبة الالتزام بيه وتنفيذه خصوصا بعد ما مجلس الوزراء حس انه مفيش عنده وزارة اسمها وزارة التموين وبدا ينزل رجالته علشان يعمل الشغل اللي المفروض وزارة التموين كانت تقوم بيه ونجحوا فعلا انه ينزلوا باسعار السلع في الاسواق وخصوصا الزيت والأرز والسكر.
بعد ما وزارة التموين شافت ان مجلس الوزراء نجح في تخفيض اسعار السلع وكمان لسه مستمر في شغله علي الارض وفعلا المواطنين بدوا يقولوا الاسعار نزلت ولسه بتزل، وزارة التموين فاقوا من الغيبوبة اللي كانوا فيها وقالوا واحنا كمان هنشوف شغلنا وهنبدا من تخفيض اسعار العيش السياحي خصوصا ان في تخفيض حصل فعلا في اسعار الدقيق وصل لـ2000 جنية في الطن.
وزارة التموين والتجارة الداخلية بدأت تطبيق مبادرة تخفيض العيش السياحي، وقالت انها الزمت الافران اللي بتشتغل في العيش السياحي بتسعيرة جبرة، وحددت سعر الرغيف بالوزن يعني الرغيف اللي وزنه 80 جرام هيكون سعره 150 قرشا وده كان بيتباع ب 3 جنيه في الايام اللي فاتت، وحددت سعر الرغيف اللي وزنه 40 جرام بـ 75 قرش، والرغيف اللي وزنه 25 جرام بـ 50 قرش، ورغيف الخبز الافرنجى 50 جرام بـ 150 قرش ورغيف الخبز الافرنجى 35 جرام بـ 100 قرش.
طيب ازاي وزارة التموين والتجارة الداخلية هتراقب التزام الافران بالاسعار دي؟.
وزارة التموين في الايام اللي فاتت، نزلت فرق تابعة ليها للمرور علي الافران واعلان تطبيق الاسعار الجديدة وكمان عملت منشورات ولزقتها علي الافران بالاسعار دي، والمنشورات دي عليها ارقام تليفونات مسئولين في وزارة التموين وجهاز حماية المستهلك للابلاغ عن اي عدم التزام من الافران بالتسعيرة المحددة للعيش السياحي من خلال الاتصال علي الرقم الخاص بجهاز حماية المستهلك 19588، أو بارسال رسالة علي رقم تطبيق "واتس آب" على الرقم 9999 7777 015 .
طيب اية هيا عقوبات مخالفة القرار الوزاري بفرض سعيرة للعيش السياحي؟.
وزارة التموين حذرت اصحاب افران العيش السياحي من مخالفة تسعيرة بيع العيش السياحي وقالت انها هتكون شديدة جدا في تنفيذ العقوبات واللي هتوصل لتوقيع غرامة مالية علي اي حد مخالف لقرارات البيع بالتسعيرة الجبرية وهتوصل لـ 2 مليون جنيه، ده غير توقيع عقوبة إغلاق المخبز لمدة هتتراوح من شهر إلى 3 شهور، وده وفقا للقرار الوزاري اللي اصدره الدكتور علي مصيلحي وزير التموين والتجارة الداخلية رقم 69 لسنة 2024 والخاص بتشكيل اللجنة العليا للمخابز السياحية والافرنجية، واللي بتختص بدراسة تكلفة إنتاج الخبز السياحي والإفرنجي الحر اللي بنتجه المخابز السياحية والإفرنجية، وكامن نص علي اعادة النظر في تكلفة بيع العيش السياحي كل 3 شهور، وان الضرورة بتقتضي النظر في تسعيرة الرغيف قبل موعد انعقاد اللجنة.
