تفاصيل أضخم صفقة بعد رأس الحكمة.. وتحركات مريبة في الصاغة قبل 10 أبريل.. وحكومة مدبولي دخلت التاريخ بقرار جريء
متابعينا الكرام في كل مكان أهلا وسهلا بكم وتحليل جديد لأهم التقارير إللي قدمتها وحدة أبحاث بانكير على مدار اليوم الخميس
هنبدأ مع حضراتكم وتقرير مهم جدا عن صفقة المليارات الكبرى وتفاصيل جديدة مليارات الدولارات اللي هتدخل مصر الفترة الجاية..
ولو فاكرين الحكومة كانت أعلنت عن مجموعة من الصفقات الكبرى اللى بتتضمن مليارات الدولارات اللى هتدخل مصر الفترة الجاية.. لكن وقتها محدش من المسئولين قالنا الفلوس اللى هتيجي دي هتروح فين او الحكومة هتعمل بيها إيه.. وفى الساعات الأخيرة تم الكشف عن بعض الملامح والتفاصيل الجديدة بخصوص التدفقات الدولارية اللى هتدخل مصرمن الاتحاد الاوربي ومن البنك الدولي.
حسب التصريحات الرسمية مصر هيدخلها خلال أيام قليلة دعم مخصص للموازنة قيمته مليار دولار من البنك الدولي من بين التمويلات اللي أعلنت عنها مجموعة البنك الدولي في مارس اللى فات بقيمة 6 مليار دولار على مدار الـ 3 سنين الجاية هتوجه للقطاع العام والقطاع الخاص.
وحسب وزيرة التخطيط هتحصل الحكومة على تمويلات بقيمة 3 مليار دولار منها 500 مليون دولار سنوياً مخصصة لدعم الموازنة في إطار برنامج "دعم سياسات التنمية"، المرتبط بالإصلاحات الهيكلية اللي بتعملها الحكومة بالإضافة إلى تخصيص دفعة لدعم الموازنة بقيمة 200 مليون دولار من تمويلات الجزء التالت من برنامج "تكافل وكرامة" اللي بيدعم الأسر الفقيرة ودي هتكون متاحة بحلول يونيو.
وبخصوص التمويلات من الاتحاد الأوروبي البالغ قيمتها 7.8 مليار دولار حتى عام 2027، فهيتم تخصيص 5 مليار دولار منها لدعم الموازنة وحاليا جار العمل مع "مؤسسة التمويل الدولية" التابعة للبنك الدولي، بشأن برنامج طرح الشركات والأصول المملوكة للدولة بالاضافة الى برنامج آخر بتعمل مصر على صياغته مع البنك الدولي مرتبط بحوكمة الشركات المملوكة للدولة.
منصات بانكير عرضت النهاردة تقرير بخصوص مفاجأة من العيار التقيل في صفقة رأس جميلة وبداية التدفق الكبير للاستثمارات السعودية في مصر.
وقال التقرير إن بانكير كان أول وسيلة إعلام تتكلم عن تفاصيل صفقة رأس جميلة وقالت إن حجم الاستثمارات الأولية هيوصل 20 مليار دولار.. وزي ما توقعنا كانت فيه مباحثات ومناقشة تفاصيل كتيرة جدا بين شركات وكيانات سعودية كبيرة وبين هيئة الاستثمار في مصر وباقي الجهات المختصة للوصول لاتفاق والتعرف على طبيعة المشروع الضخم وطرق تسديد الاستثمارات وحاجات تانية كتيرة ليها صلة بالعلاقات التاريخية الكبيرة والقديمة بين مصر والسعودية.
الجديد نهاردة إنه فيه تطورات جديدة تتعلق بمشروع تطوير واستثمار منطقة رأس جميلة، وزي ما احنا عارفين إنها منطقة قريبة جدا من مدينة شرم الشيخ ووزير قطاع الأعمال الدكتور محمود عصمت كشف من إن الوزارة اختارت مكتب استشاري عالمي لوضع التصميم اللازم استعدادا لطرح أرض رأس جميلة للاستثمار على مساحة 860 ألف متر، وهى أرض تتبع وزارة قطاع الأعمال العام.
الملعومات بتقول إن مجموعة عجلان وإخوانه القابضة السعودية، ودي كيان اقتصادي ضخم جدا وصنفتها مجلة فوربس الشهيرة في المرتبة 32 ضمن أقوى 100 شركة عائلية عربية لسنة 2024، هي أول كيان سعودي يقدم طلب للحكومة في مصر للاستثمار في مشروع رأس جميلة ..
الشركة السعودية أكدت رسميا رغبتها في الاستثمار بالسوق المصري في الفترة الجاية،وفي منطقة رأس جميلة تحديدا، من خلال إقامة مشروع سياحي متكامل عليها بسبب موقعا المتميز والمؤهلة بأن تصبح أحد أبرز الوجهات السياحية في المنطقة، بخلاف إقامة سلسلة من الفنادق العالمية بعلامات تجارية شهيرة، وهتخلي المنطقة من أهم الوجهات السياحية في العالم..طبعا تتقدر تتخيل حجم الاستثمار هيكون كام مليار دولار.
التقرير التالي اللي قدمته وحدة أبحاث بانكير النهاردة كان بخصوص قرارا تاريخي للحكومة..
باختصار النهاردة كان الاجتماع الاسبوعي بتاع الحكومة واللي وافقت على مشروع إنشاء منطقة حرة خاصة باسم شركة قناة السويس للقوارب الحديثة كشركة مساهمة مصرية وعلى مساحة 51150 متر مربع بالكيلو 8 جنوب سفاجا بجوار شركة ترسانة جنوب البحر الأحمر من الاتجاه الغربي.
وكمل البيان إن هدف المنطقة الجديدة هو تصنيع وصيانة اليخوت والوحدات البحرية، مع الالتزام بالحصول على التراخيص والموافقات من الجهات المختصة، كمان بيستهدف المشروع تصنيع وصيانة وتصدير اليخوت البحرية بمستوى عالمي يضاهى الترسانات الأوروبية والعالمية، ووضع مصر على الخريطة العالمية لصناعة اليخوت والاستفادة من عائدها المادية الكبيرة بالعملة الأجنبية، ده غير تشغيل وتدريب عمالة بكثافة عالية.
ونص مشروع القرار كمان على إلتزام الشركة بتصدير نسبة لا تقل عن 100% من حجم إنتاجها سنوياً إلى خارج البلاد، بخلاف استخدام مكون محلي في منتجاتها بنسبة لا تقل عن 50% خلال مدة أقصاها ثلاث سنوات من تاريخ بدء التشغيل.
التقرير الأخير معانا بيهم كل بيت في مصر وهو تطور خطير في ملف القمح..
حسب تقارير وبيانات رسمية حديثة قفز إجمالي واردات مصر من القمح خلال الربع الأول من 2024 بنسبة 21% وسجلت 3.35 مليون طن مقابل 2.75 مليون طن في الفترة المماثلة السنة اللى فاتت.
وطبعا زيادة الكميات المستوردة من القمح هتضيف أعباء جديدة على الموازنة العامة فى ظل ازمة نقص العملة اللى بتعانى منها مصر بقالها سنتين خصوصا وان فاتورة واردات القمح ضخمة.. وعشان كده الحكومة لازم تتحرك بأقصى سرعة وتحاول تقلل من اكميات القمح المستوردة وتزودانتاجية الفدان من القمح المحلي.
وبتستورد وزارة التموين كميات إضافية من القمح بجانب المشتريات المحلية، لتوفير احتياجات منظومة الخبز المدعم من الدقيق، واللي بيستفيد منها حوالى 72 مليون مواطن مقيد على 21 مليون بطاقة تموينية، وبيتم إنتاج من 250 إلي 275 مليون رغيف يوميًا.
