المواطن حبيبي.. خطة وزير التموين للبقاء في تشكيل الحكومة الجديد

واضح كده أن وزارة التموين حثت أن لها دور في مراقبة الأسعار بالأسواق، وانه ده الشغل اللي المفروض انه يتعمل منها خصوصا ان كل مبادرات تخفيض الأسعار والمراقبة عليها في الفترة اللي فاتت كان مجلس الوزراء هو اللي بيقوم بيه.. يا تري وزارة التموين بتعمل اية الفترة دي..  وهل نشاط الوزارة هدفه المواطن ولا  تحسين صورة الوزير مصيلحي علشان يكمل في الحكومة الجديدة.

علي مدار شهور طويلة ووزارة التموين والتجارة الداخلية غايبة تماما عن شغلها واللي المفروض قايم علي مراقبة الأسعار في الأسواق والتأكد من توافر السلع للمواطنين وباسعارها الحقيقية، ومش الأسعار اللي موجودة عليها السلع دلوقتي في الأسعار واللي اغلي من سعرها الرسمي باضعاف الاضعاف، وده حط وزير التموين والتجارة الداخلية في موقف صعب لما الناس اشتكت من غلاء الأسعار لما كان بيفتتح معرض اهلا رمضان في شبرا الخيمة، والناس هجمت عليه وخرج بصعوبة من هناك.
الموقف اللي تعرض له وزير التموين واللي كان بمثابة جرس انذار للحكومة عن الأوضاع اللي عايش فيها الشعب المصري، وده خلي الحكومة علي طول تاخذ خطوات جريئة للتعامل مع الأسعار في الأسواق، وتبدأ تنزل علي الأرض وتشوف الدنيا مش من خلال الورق والتقارير اللي بتروح للمسئولين علي المكاتب واللي كلها عكس الواقع.
مجلس الوزراء خذ المبادرة من وزارة التموين واللي اختفت عن تنفيذ الدور بتاعها وعمل اجتماع عاجل مع الموردين والتجار علشان ياكد عليهم تخفيض الأسعار بحد اقصي 30% خصوصا ان الدولة عملت اللي عليها ووفرت الدولار بسعره الرسمي في البنوك قدامهم للافراج الجمركي عن البضائع بتاعهم اللي موجودة في الموانئ، وحاليا بقي الدولار متاح قدامهم في أي وقت بالكمية اللي هما عايزينها علشان يقدروا يشتروا البضائع اللي محتاجها السوق المصري، وفعلا التجار والموردين اعلنوا التزامهم بتخفيض الأسعار بداية من 15 % ولحد 30%.
مجلس الوزراء قال للتجار انه عايز يشوف تخفيض حقيقي في الأسعار مش كلام علي ورق زي ما كان بيحصل قبل كده، وقالهم نصا «انا لما كنت بنزل مول من المولات اللي موجودة في طريق شغلي كنت بلاقي الأسعار بتعلي مش بتنزل، ولما كنت بتصل علي وزير التموين اسئله الأسعار بترفع ليه يقولي اصل سيادتك نازل أماكن بتاع الناس الأغنية، والتخفيضات دي موجودة في الأرياف والمحافظات والمناطق بتاع الناس الفقيرة»، وهنا مجلس الوزراء قال ان هيشكل فرق عمل من مجلس الوزراء للتفتيش علي الأسعار، ولغي تماما دور وزارة التموين.
بعد الحوار ده وزير التموين حاسس انها هيطير في التعديل الحكومي اللي خلاص علي الأبواب، وحاليا بيحاول يعيد وجوده في الصورة علي حس انخفاض أسعار الدقيق، وبيقول ان الوزارة هتشكل لجان لها علشان تنزل تراقب علي التزام الافراج بتخفيض أسعار العيش السياحي خصوصا ان سعر طن الدقيق انخفض بأكثر من 2000 جنيه، وبالتالي لازم أسعار العيش السياحي تنخفض هيا كمان، خصوصا بعد ما مجلس الوزراء سحب منه مراقبة أسعار السلع بالأسواق، واهي حاجة يظهر منا انه بيعمل شغل، فهل وزارة التموين هتقدر فعلا تراقب أسعار العيش السياحي بالأسواق وفعلا الأسعار هتنزل في الأيام اللي جاية، ده اللي هنشوفه ونتابعه معاكم في حلقات جديدة قادمة .