هيبقي زي البنزين.. إيه حكاية لجنة تسعير رغيف العيش

 

هو على مصيلحي وزير التموين عاوز يعمل ايه في موضوع رغيف العيش وإيه حكاية لجنة التسعير الجديدة وهل الخبز هيبقي زي البنزين وكل فترة محددة هيتحدد سعره.. تعالو نشوف إيه الحكاية

كلنا عارفين الأزمة النفسية بين الوزير على المصيلحي وزير التموين والمصريين بسبب موجة المغالاة في الاسعار وعمليات التجارة بقوت الشعب والفساد اللي كشفتها الأجهزة الرقابية المختصة وسقوط مستشار مصيلحي نفسه في قضية كبير ليها علاقة بحجب بجانب تهاون الوزارة في مواجهة التلاعب في الاسعار وعدم قدرته على التحكم في السوق لدرجة إن الرئيس السيسي نفسه عنف الوزير في اجتماع على الهواء مباشرة.. \
طيب ايه جديد مصيلحي.. شوف ياسيدي في الكام ساعة اللي فاتت طلع وزير التموين والتجارة الداخلية وقال ان الوزارة قررت تشكيل لجنة عليا لمتابعة أسعار الخبز الحر في ضوء أسعار الدقيق وعناصر التكلفة.

وفي التفاصيل قال الوزير إن مهام اللجنة العليا دي هتكون تحديد أسعار الخبز الحر والاوزان والمواصفات الفنية في ضوء متغيرات تكلفة الإنتاج وأسعار الدقيق صعوداً او هبوطاً وان انعقادها سيكون شهرياً.. ولغاية هنا خلص كلام الوزير المهم ونيجي بقي للأهم يعني إيه لجنة لتسعير الخبز المدعم.. شوف حضرتك وزير التموين هيعمل لجنة زي كده لجنة تسعير المواد البترولية واللي بتنعقد كل 3 شهور وبتحدد الأسعار على حسب السوق العالمي لكن لجنة تسعير الخبز بتاعة مصيلحي هتجتمع كل شهر.
طبعا خلونا نأكد على حاجة مهمة جدا وهي إن المقصود هنا العيش الحر يعني اللي بيتباع بره بطاقة التموين والخبز المدعم واللي المصريين بيقولو عليه سياحي واللي أسعاره زي ما احنا عارفين رفعت بشكل كبير من فترة بسب ارتفاع أسعار الدقيق عالميا ولما سعر الدقيق نزل أصحاب المخابز رفضوا ينزلو السعر فقررت الدولة تتدخل وتسعره بآلية جديدة .
والأكيد بردوا إن اي قرار بياخده أي وزير أو مسئول بيصب في النهاية في صالح الشعب ولو ثبت عدم جدواه بيتم التراجع عنه أو تعديله.. طيب الناس خايفة من ايه طالما ده في مصلحتها.. أكيد طبعا اي حاجة خاصة باسعار لقمة العيش بتخوف الناس جدا وفيه ناس شايفة إن لجنة التسعير دي ممكن تكون شماعة عشان اصحاب المخابز يرفعوا الأسعار زي ما هما عاوزين ويحصل ارتباك في الأسواق والدولة متقدرش تسيطر على الوضع.
في النهاية الوزير اتعهد لما قعد مع مسئولي المخابز إن منظومة الخبز الحر هيدخل فيها تطوير كبير الفترة الجاية وان التدخل الحكومي في النهاية هدفه إن الرغيف الحر ما يبقاش أزمة في السوق.. ومش هنحكم على حاجة قبل ما نجربها ونشوفها وفي انتظار لجنة تسعير الخبز عشان نقيمها.