ليه البنك المركزي خذ قرار برفع حد السحب النقدي للأفراد والشركات.. مفاجأة من العيار التقيل

البنك المركزي من كام ساعة فاجئ الكل بقرار زيادة السحب النقدي للافراد والشركات من فروع البنوك الي 250 الف وده .. يا تري ليه.. وايه انعكاسات القرار ده علي السوق اية.. واية هيا مراحل زيادة السحب النقدي للافراد من البنوك.

علي مدار الشهور اللي فاتت والبنك المركزي خذ خطوات للاصلاح الاقتصادي في مصر، وكان اولها القضاء نهائيا علي وجود سعرين للدولار في مصر السعر الاول اللي كان في البنوك والسعر التاني اللي كان في السوق السودا، وحاليا الدور جه علي المواطن علشان يحس بالأصلاحات الاقتصادية دي خصوصا ان الفترة اللي فاتت كان فيه تصديقات علي السحب النقدي للافراد من البنوك والفروع الي 250 الف و 30 الف جنيه من ماكينات الصراف الآلي.
طيب ليه البنك المركزي اخذ القرار ده دلوقتي؟.
الخبير الاقتصادي الدكتور أشرف غراب، قال إن البنك المركزي خذ الخطوة دي بهدف رفع عدد المتعاملين مع البنوك وضمان توفير السيولة النقدية ليهم وده هيساهم في تحقيق الشمول المالي وتعزيز القوة الشرائية ودعم الاقتصاد المصري، ده غير توفير الطمأنينة للأفراد والشركات والمستثمرين بشأن توافر السيولة في البنوك الرسمية بما يسمح بسحب الأموال بكل اريحيه من الفروع أو الصراف الآلي خارج أوقات العمل الرسمية.
طيب اية هيا المراحل اللي مر بيها البنك المركزي علشان يوصل لرفع حد السحب النقدي الي 250 الف جنيها؟.
البنك المركزي علشان يوصل لتوفير ربع مليون جنيه لأي عميل له فلوس بالبنوك مر بمراحل كتيرة جدا وكان اولهم القرار اللي صدر في مارس 2020 لما قرر البنك المركزي وضع حد يومي لعمليات الإيداع والسحب النقدي لفترة مؤقتة بفروع البنوك بواقع 10 آلاف جنيه مصري للأفراد و50 ألف جنيه مصري للشركات، والبنك استثني من القرار ده سحب الشركات لتوفير كل ما يلزمهم لصرف مستحقات العاملين .
البنك المركزي كمان حدد في الفترة دي عمليات الإيداع والسحب النقدي من ماكينات الصراف الآلي بواقع 5 آلاف جنيه.
وفي نفسس السنة، البنك المركزي رجع وعدل قرار تحديد حد يومي لعمليات الإيداع والسحب النقدي بفروع البنوك بواقع 10 آلاف جنيه مصري للأفراد و50 ألف جنيه مصري للشركات، ووصل الحد الأقصى اليومي لعمليات السحب والإيداع النقدي للأفراد لـ 50 ألف جنيه من الفروع و20 ألف جنيه من ماكينات الصراف الآلي.
وفي اكتوبر 2022، البنك المركزي اصدر قرار ثالث بتعديل حدود السحب النقدي، وزيادة حدود السحب اليومي من ماكينات الصراف الآلي ووصل الحد الأقصى للسحب اليومي للأفراد لـ 150 ألف جنيه مصري من فروع البنوك، وزيادة الحد الاقصي للسحب من ماكينات الصراف الآلي الي 100 ألف جنيه.