خدعة الدولار فى العيد.. كمين لازم تاخد بالك منه
هو ايه اللى حصل للدولار فى العيد ؟ وهل فعلا رجع يرفع من تانى ؟ وهل رجعت السوقف السودا تمارس نشاطها من جديد؟ وايه توقعات سعر العملة الأيام الجاية ؟ وازاى الهجوم الايراني على دولة الاحتلال ممكن يأثر على سوق الصرف واسعار السلع فى مصر؟
خلال أجازة عيد الفطر المبارك واللى بدأت من يوم التلات اللى فات وخلصت امبارح طلع كلام كتير وانتشرت شائعات عن وصول سعر الدولار الى مستوى 50 جنيه فى السوق السودا بعيدا عن التعاملات الرسمية فى البنوك وشركات الصرافة خصوصا وان البنوك كانت اجازة ومفيش تعاملات بتتم داخل القطاع المصرفي ويمكن ده اللى خلا ناس كتير تصدق فعلا ان فيه ارتفاع فى سعر الدولار وان الروح عادت من جديد للسوق السودا بس يا ترى فعلا الكلام ده حقيقي ولا لأ؟
بص يا سيدي السوق السودا زي ما قولنا لحضراتكم قبل كده ماتت بالسكتة القلبية من بعد قراراتع البنك المركزي التاريخية فى 6 مارس واللى شملت تحرير سعر صرف الجنيه وفقا لآليات العرض والطلب وده لأن مبرر السوق السودا مبقاش موجود أصلا فايه اللى يخلى حد يغامر ويتداول النقد الأجنبيى بره البنوك ويعرض نفسه للمساءلة القانونية وهو ممكن يبيع ويشترى العملة الأمريكية فى البنوك وبنفس السعر اللى بتتباع بيه فى اى حتة تانية وده لأن خلاص فكرة وجود أكتر من سعر للدولار انتهت فى مصر على الاقل على المدى القصير والمتوسط
يعنى سعر الدولار مرفعش فى العيد زي ما ناس كتير بتقول ؟
هيرفع ازاى والبنوك وشركات الصرافة أجازة وخد بالك ان حركة السوق في أوقات الإغلاق المصرفي مش بتكون معبرة اصلا عن حقيقة سعر الصرف وبتتقلب الأسعار وتتصف بالحساسية رغم ضعف السيولة .. كمان المتوقع ان الدولار ينخفض فى بداية الشهر الجاى ومع وصولب الشريحة الأخيرة من تمن صفقة رأس الحكمة بالاضافة الى شرايح من قرض ال 8 مليار البرنامج التمويلي الجديد اللى مصر اتفقت عليه مع صندوق النقد الدولي واوعا تنسى كمان باقى التدفقات الدولارية المتوقع وصولها مصر من الاتحاد الاوربي والبنك الدولي بالاضافة الى نشاط ملحوظ فى الاستثمارات الأجنبية اللى هتدخل مصر الفترة الجاية.
طب هل اللى حصل من ايران واعلانها استهداف اسرائيل ممكن يكون ليه تأثير على سوق الصرف وعلى اسعار السلع؟
أى توترات سياسية بيكون ليها تأثير سلبي كبير ما بالك بحرب ومواجهات عسكرية وعشان كده طبعا فيه سلع كتير اسعارها هتتحرك بعد اللى عملتوا ايران ومن أهم السلع دي طبعا الدهب والبترول وده هيكون ليه تاثير على اسعار باقي السلع خصوصا السلع الغذائية واهمها الحبوب
