مدبولي زنق التجار.. مفاجآت الحكومة للمواطنين بعد العيد.. ومشروع قطري ضخم

متابعينا الكرام في كل مكان أهلا وسهلا بكم وجولة جديدة لأهم التقارير اللي قدمتها وحدة أبحاث بانكير على مدار اليوم الاحد 7 أبريل 2024..

كالعادة بنبدأ مع حضراتكم من الأهم في تقارير اليوم وهو عن مصير الأسعار في الاسواق وفشل مبادرات التخفيض لغاية دلوقتي... وحكاية أبلكيشن مدبولي ولعبة القط والفار بين الحكومة والتجار

وقال التقرير إن أزمة الأسعار هي الأزمة الأكبر اللي مش قادرة عليها حكومة الدكتور مصطفى مدبولي ومن فترة كبيرة لدرجة إن الرئيس السيسي وبخ وزير التموين علنا وبردو مفيش فايدة وفي الأول كان التجار حجتهم ارتفاع أسعار الدولار والاستيراد من الخارج.

وأضاف التقرير إن  المهزلة وصلت لذؤوتها لما الدكتور مدبولي وبخ برد وزير التموين وطلع بيبلغه بأخبار غير صحيحة عن السوق والاسعار..
ولفت التقرير إن رئيس الحكومة قعد مع ممثلي التجار والشعب التجارية ومسؤولي الغرف التجارية عشان يحط حد لارتفاع الأسعار واتفقوا أن الأسعار هتنزل من15 إلى 20% وزي العادة الأسعار متحركتش بالشكل اللي يرضي المواطن وانزعج رئيس الحكومة وقرر يلجأ لوسائل تانية ويسد الحلقة المفقودة في أي مبادرة لتخفيض السلع وهي الرقابة على الأسواق ومتابعت القرارات اللي بتتاخد..

وقال التقرير إن اخر حاجة وصلتلها الحكومة إنها تعمل ابلكيشن أو رادار للأسعار هيكون متاح للمواطن بحيث لو راح اي سوبر ماركت أو مول أو سوق تجاري ولقي أسعار السلع اغلي من المعلن يقوم يدخل على الابليكشن ويكتب شكوته والمكان اللي اشترى منه ويصور السلعة والشيك اللي خده من الكاشير ويبعتها على التطبيق ويسبب الباقي للحكومة .
وحسب التقرير المفروض تطبيق رادار السلع هيكون متاح في يوليو اللي جاي للمواطنين وممكن يكون وسيلة فعالة لرصد التجار اللي بيرفعوا السلع 

منصات بانكير عرضت تقرير مهم عن مشروع قطري ضخم هيكون ليه تأثير قوي على أسواق اللحوم والالبان في مصر وباستثمارات ضخمة.

الحكاية بدأت لما أعلنت شركة بلدنا القطرية للاستثمار في المجال الزراعي وتربية الأبقار في مصر عمل مشروع في مصر باستثمارات هتوصل لـ1.5 مليار دولار بقطاع الأمن الغذائي عن طريق إنشاء مزرعة أبقار حلوب بطاقة 20 ألف بقرة بالمرحلة الأولى بخلاف استصلاح وزراعة 240 ألف فدان داخل أحد المشروعات الزراعية بالوادي الجديد لتلبية احتياجات مزرعة الأبقار من الأعلاف وخلافه.
وقال التقرير إن المشروع المصري القطري، هيقلب بشكل كبير خريطة الاستيراد المصري من اللحوم والأعلاف بشكل كامل خصوصا ان فاتورة مصر الاستيرادية هتقل بشكل كبير في حاجات كانت قايمة بشكل اساسي علي الاستيراد وكان الانتاج المحلي بتاعتنا منها ضعيف جدا .

التقرير التالي في جولة النهاردة كان بخصوص أزمة السكر اللي مكملة معانا وارتفاع أسعاره. 
وحسب التقرير مصر في الكام شهر اللي فاتوا عاشت ولسه عايشة ازمة نقص السكر في الاسواق واللي طولت وزادت عن حدها خصوصا ان الحكومة تدخلت فيها اكتر من مرة علشان تحط لها حل ولكن لحد اللحظة دي مفيش لها حل علي الرغم من قيام الحكومة باستيراد كميات كبيرة من محصول السكر من الخارج لمواجهة النقص في السكر المعروض بالاسواق.
المهم التقرير قال إن رئيس مجلس الوزراء الدكتور مصطفي مدبولي قعد مع التجار الموردين والمستوردين، واتكلم في كل الأزمات الموجودة والاسعار اللي مبالغ فيها ومن بينها السكر طبعا لأنه سلعة رئيسية في كل بيت وتجار الجملة اشتكوا لمدبولي من نقص سلعة السكر بالأسواق.. وعشان كده الحكومة تعاقدت علي استيردا 250 الف طن سكر لزيادة المعروض بالاسواق، وحاليا السكر بقي موجود ومتوفر ولكن باسعار اعلي من الاسعار اللي حددتها الدولة والحكومة اعلنت إنها هتحل أزمة نقص السكر بالاسواق رسميا وللابد منتصف شهر ابريل الحالي .

التقرير الأخير معانا بخصوص أخبار حلوة من الحكومة للمصريين بعد العيد..

وقال التقرير إن الدكتور مصطفي مدبولي رئيس مجلس الوزراء عقد اجتماع مع التجار والموردين والمستورين، علشان آليه للنزول باسعار السلع خصوصا ان الحكومة عملت اللي عليها ووفرت لهم الدولار اللي كان لازم علشان يفرجوا ويشتروا السلع اللي الشعب محتاجها علشان يكمل بيها حياته ويسد منها احتياجاته بيته من رز وسكر وزيت وغيره.

الدكتور مدبولي حذر التجار من كون الاعلان عن تخفيض الاسعار علي الورق بس وميكونش في نزول حقيقي في الاسعار، خصوصا ان قالهم اننا عملنا اجتماعات كتيرة قبل كده واتفاقنا علي انخفاض حقيقي في الاسعار ولكن الكلام ده مكنش بيطبق علي ارض الواقع.
الدكتور مصطفي مدبولي قال كمان للتجار ان مجلس الوزراء هيشكل لجان تابعه ليه لرصد نزول الاسعار بشكل يومي علشان فعلا الحكومة تتأكد ان في استجابة حقيقية في النزول بالاسعار.

الخبر السار اللي الحكومة مجهزاه للمواطنين بعد العيد أنه هيكون في نزول حقيقي في الاسعار هيوصل لـ30% في الاسعار بشكل عام خصوصا اسعار الزيت والسكر والارز والمكرونة وغيرها من السلع الاستراتيجية اللي مفيش استغنا عنها وان الحكومة مستمرة في النزول بالاسعار مع مرور الايام علشان المواطن يحس باللي عملته الحكومة لتوفير الدولار وبشكل طبيعي قدام الموردين والمستوردين.

الخبر التاني الحلو معانا النهاردة وهو اعلان الحكومة ممثلة في وزارة التضامن الإجتماعي عن نزول منحة معاش تكافل وكرامة للمواطنين من اصحاب مبادرة تكافل وكرامة واللي بيوصل عددهم الي 22 مليون مواطن يوم 15 إبريل الجاري وده بعد عيد الفطر المبارك وبالزيادة اللي اقرها الرئيس عبدالفتاح السيسي رئيس الجمهورية.