شوية صبر.. قبل ما تشتري شوف سوق العربيات رايح فين

معاك قرشين وسعر السيارات بينزل بقوة وقررت تشتري عربية أخيرا.. شوف الفيديو ده قبل ماتشتري وشوف خبراء تجارة السيارات بينصحو بإيه دولوقتي.. خيك معانا

طبعا كان من التهور إنك تشتري سيارة أي كان نوعها في عز أزمة الدولار واللي وصل وقتها 74 جنيه في السوق السودا ومع شح المعروض من السيارات واللي قفزت لأرقام فلكية ومبالغ بالملايين وحصل ركود كبير جدا بسبب عجز أغلب المواطنين عن شراء سيارة.. وبعد الانفراجة الكبيرة في ازمة الدولار بدأت تتحل كل المشكلات والأسعار تنزل وفي سوق السيارات طبعا الأسعار نزلت لكن مش هو الهبوط اللي يرجع سوق السيارات زي الأول وكل التخفيضات من الاوفر برايس بس وهو السعر اللي ضافوه تجار السيارات عشان يوازي سعر الدولار في السوق الموازية وقتها.
ورغم إن التخفيضات في أسعار السيارات وصل ل 500 و700 ألف جنيه لكن لسه الأسعار غالية وأعلى بكتير من قيمة السعر العادل ليها وعشان كده تجار السيارات بينصحوا المواطنين اللي محتاجيني يشتروا سيارة إنهم يصبرو شهرين تلاتة بالكتير وبعدها هيحصل نزول كبير في الأسعار.. طيب الأسعار هتنزل ليه ياتجار.. قالك يافندم عشان المعروض هيبدأ يزيد بشكل تدريجي من كل الماركات والأسواق العالمية وإنه هيحصل تنافس بين شركات السياراة عشان توفر موديلات وعروض جديدة للمواطنين عشان يشتروا لأن في النهاية تاجر العربيات عاوز يبيع ويتاجر ومش من مصلحته يرفع السعر وحاله يوقف.
ولما السوق يشبع عربيات والطلب يقل الاسعار هتنزل بشكل كبير جدا وهيوصل ما بين 20  و40 في المية عن دلوقتي وبعدها السوق يستقر ويمشي على حسب العرض والطلب وكمان الخبرا شايفين إنه طول مافيه استقرار في الدولار بالبنوك كل ما كان فيه استقرار في كل الاسواق ومنهم طبعا سوق السيارات واللي بيعتمد بشكل كبير جدا على الاستيراد وبالتالي على استخدام الدولار ودي كانت أزمة سوق السيارات في الأسعار.
وعلى فكرة انخفاض أسعار السيارات هيكون في الزيرو والمستعمل واللي ليه سوق كبير جدا في مصر بردوا وناس كتير مش معاها تجيب زيرو فبتلجأ للمستعمل عشان تأدي الغرض.