ضربة السيسي الجاية.. جيم أوفر والتعابين هربت

ليه السيسي دايما بيكسر منطق الأشياء ومفيش في قاموسه كلمة خوف ولا في يوم خاف وإزاي قفل اللعبة على خفافيش الفتنة وأجهزة التآمر والتحريض وإزاي هيضرب ضربته الأخيرة بعد ساعات

مفيش حد عاقل وعنده تفكير مايربطش بين اللي حصل في مصر الشهور اللي عدت وبين المؤامرات الخارجية واللي اتكشفت كلها  وكان الهدف منها إسقاط البلد وحصار السيسي وخنق الحكومة وتسخين الشعب ولأول مرة الأجهزة والأطراف المعادية تتجه لصناعة الأزمة مش استغلالها ودا كان تحول خطير وجديد في المواجهة بين الدولة وبين تعابين المخابرات الخارجية  واللي بيشغلوهم في كل حتة من الخارج على أمل إن مصر على الأقل ترجع في دورها ومكانتها تموت وتعيش في حالها.
فاكرين لما قلنا هنا في بانكير من شهور العبارة الشهيرة مش مطلوب من مصر إنها تعوم ولا تغرق والمطلوب إنها تتسمر مكانها لأن أي تحرك أو تضخم أو تقدم وتطور ونمو وانطلق فيه خطر على أطراف كتير في المنطقة والعالم ودي عبارة قالها أساتذة التاريخ اللي متأكدين إن تعملق مر فيه هلاك أو تهديد لاطراف تاينة.
وفاكرين لما ظهرت أزمة الدولار وفي كل مرحلة من الأزمة كنا بنحس إن فيه حاجة غريبة ومش طبيعية وإن فيه أصابع خفية في السوق وفاكرين لما الدولار كان بيختفي بشكل غريب حتى قبل ما السوق السودا تشد وتتوحش وفاكرين الدولارات والدهب اللي كان بيتهرب بره وزود الأزمة وياترى فاكرين التقارير والفديوهات المفبركة وحملات التشويه الشرسة اللي البلد اتعرضتلها وده غير التقارير المدفوعة اللي كانت بتتنشر بالامر المباشر في الإعلام الغربي عن الاقتصاد المصري اللي قرب ينهار والبلد اللي قربت توقع.. ده كله حضرتك مش حكم سوق دي تخطيط محترفين وشغل مخابرات وفتنة على أعلى مستوى ولو مش فاكر نفكرك بكلام إعلامي يهودي شهير لما قال مصر لو ماسبتش فلسطين ومعبر صلاح الدين الدولا هيوصل 200 جنيه وده كان دليل على إن الأزمة مصنوعة بشكل كبير.
المهم مصر عدت وقدر السيسي يضرب كل العصافير برصاصة  واحدة ويلم التعابين كلها بعد صفقات إعادة تصحيح المسار الاقتصادي وفي لحظة انتهت السوق السودا ورجع الدولار للبنوك والبضايع المركونة دخلت واللي عاوز يستورد حاجة يستوردها ومفيش خوف على الأسواق وكمان البلد مليانة سلع والاسعار بدأت تنزل وده سيناريو طبعا مكانش أهل الشر متخيلين إنه ممكن يحصل في يوم وليلة  وإن السيسي يقلب الترابيزة عليهم في ساعة واحدة ويحل كل مشاكل البلد.
بعد حلف اليمين التلات الجاية الرئيس السيسي هيقول كلام مهم جدا عن الملف الاقتصادي في مصر والخطوات الجاية وكمان هيتكلم في ملفات كتيرة وخطيرة وهتكون ضربة أخيرة من الرئيس لتعابين الفتنة واللعبة خلصت بانتصار مصر.