سوق السيارات محتاج مبادرة.. الحكومة تستعد للتدخل
السيارات رغم خفض الاوفر برايس لسه أسعارها غالية.. وامتي الحكومة هتدخل وامتي السوق هيرتاح وترجع اسعار زمان.. تعالوا نشوف مع بعض امتي وإزاي
سوق السيارات لسه مستقرش والاسعار لسه غالية وعالية وكل التتخفيضات اللي بتحصل وبيتم الاعلان عليها دي تخفيضات في الأوفر برايس بس يعني التخفيض بيكون في الفلوس الزيادة عن تمن العربية الاصلي وكمان غير إن تمن العربية الاصلي نفسه زاد يعني ببساطة كده لو تمن العربية أي عربية كان 300 ألف قبل أزمة الدولار فبعد الازمة وصلت 500 ألف مثلا والتاجر ضاف عليها 600 ألف تانيين يبقي بقت بمليون و100 ألف جنيه وبعد استقرار الدولار دولوقتي التاجر بيزللك من ال600 ألف الزيادة اللي هو ضافها وغير لسه مكسبه في العربية في فرق السعر الزيادة عن سعرها الحقيقي.
وعشان كده الاسعار لسه في العالي وكل اللي بيحصل تخفيضات مش هتغري حد يشتري لأنها لسه فوق طاقة الناس العادية.. طيب ايه الحل.. مفيش غير حل واحد إن الحكومة تمنح تيسيرات كبييرة في استيراد السيارات لأن نقص المعروض هوالاساس في وصول الاسعار للارقام دي والغاء شرط سنة الموديل والسماح باستيراد السيارات المستعملة من الخارج بمواصفات معينة وده وقت مثالي إن الحكومة تدخل لحل ازمة سوق السيارات واللي طالت عند حدها وبقي مطلوب حلول سريعة لقطاع من أهم قطاعات الاقتصاد وشغال فيه أعداد ضخمة من المصريين.
والمعلومات بقي اللي عندنا في بانكير بتقول إن في قعدة قريب بين الدكتور مصطفي مدبولي رئيس الحكومة وكل المسئولين عن قطاع السيارات في مصر لاستعراض الاجراءات لاعادة الروج لسوق السيارات وتذليل العقبات وإن الدكتور مدبولي هيسمع لكل المقترحات سواء من المستوردين أو التجار أو تجار قطع الغيار والشعبة الرسمية والغرف التجارية والجمارك وهيتم اعتماد تصور يعيد القطاع للحياة من تاني والأهم طبعا تحفيض اسعار السيارات بشكل حقيقي عشان السوق يرجع يجذب الزبون من تاني.
