تخفيض الأسعار مجرد بداية.. إجراءات تانية في الطريق

خلاص المفروض مبادرة تخفيض اسعار السلع الأساسية تدخل حيز التنفيذ النهاردة حسب مهلة الحكومة للتجار والمصنعين.. ياترى المبادرة هتكون اخر إجراءات الحكومة ولا فيه إجراءات تانية في الطريق عشان الناس تحس بالتغيير.. وإذا كان فيه ايه هي الاجراءات دي .. تعالوا نشوف إيه اللي هيحصل
 
بعد شهور طويلة من المعاناة الاقتصادية والمعيشية والغلاء اللي عاشه المصريين لأسباب كلنا عارفينه بدأت الأمور تستقر بعد صفقة رأس الحكمة ونهاية السوق السودا للدولار وتحرير سعر الصرف ورغم جشع كتير من أصحاب المصانع والتجار الحكومة قدرت تحسم ملف الأسعار بمبادرة إجبارية لتخفيض أسعار السلع خاصة أن استمرار زيادة الأسعار مع الظروف الجديدة ملهوش مبرر والموضوع بقي تجارة ومكسب على حساب الناس واللي استحملت بشكل كبير عشان كانت عارفة الظروف اللي بتمر بيها البلد والحقيقة المواطن هو بطل الحكاية من أولها لاخرها وبدليل إن الرئيس السيسي وجه الشكر للمصريين على ذكائهم الاجتماعي وحسهم الوطني في تحمل كل الظروف.
طيب خلاص والمفروض نشوف نتايج المبادرة الجديدة واللي دخلت حيز التنفيذ بالفعل حسب مهلة الحكومة واللي حددتها ب48 ساعة بداية من اجتماع مدبولي مع المصنعين والتجار  ايه اللي هيحصل تاني عشان الدولة تخفف عن المواطنين.. شوف حضرتك الموضوع منظومة كاملة بدأت بزيادة المرتبات والحد الأدنى للأجور الي 6 آلاف جنيه وحزمة اجتماعية غير مسبوقة قبل قرارات التعويم ورفع سعر الفايدة وبعد قرارات المركزي كان لازم يحصل سيطرة على الأسواق خاصة بعد انخفاض قيمة الدولار ولسه فيه إجراءات تانية منها زيادة المعروض من السلع بمقدار 20% عن الموجود دلوقتي وإن الحكومة هتدخل بشكل مباشر في الأسواق وهتطرح هي السلع لو حصل اي تلاعب من التجار.

كمان وحسب المعلومات اللي عندنا الحكومة بتراجع دلوقتي وبتدرس تأثير الإجراءات الاقتصادية الأخيرة على محدودي الدخل وفئات تانية وهيكون فيه إجراءات وقرارات خاصة بالحماية الاجتماعية للتخفيف عنهم وكمان إعلان الحكومة أنها هتنفذ مستخرجات وتوصيات الحوار الوطني في الشق الاقتصادي واللي كتير منه بيتعلق بزيادة المرتبات وتحسين الدخول والاستفادة من إمكانيات الدولة الاقتصادية وإعادة تنظيم شاملة في القطاع الاقتصادي والتوصيات دي طلعت بعد شهور من المناقشات مع كافة خبراء الاقتصاد وعلماء الاجتماع والأكاديميين.