إجراء جديد من صندق النقد بخصوص مصر.. إيه اللي هيحصل يوم 29 مارس
ايه اللي بيحصل في صندوق النقد الدولي وإيه علاقته بمصر، وياترى فيه جديد في موضوع القرض بعد الإعلان الرسمي.. هنشوف التفاصيل مع حضراتكم خليكم معانا
عارفين وكنا متابعين لقصة مصر مع صندق النقد الدولي من أكتر من سنة فاتت والشد والجذب والمفاوضات والتصريحات ولغاية ما صندوق النقد وصل لاتفاق مع الحكومة المصرية على رفع الصندوق برنامجه الحالي لإقراض مصر إلى 8 مليار دولار بدل 3 مليارة في الاتفاق القديم وفضلت مشكلة التعويم وتوقيته هي العقبة لغاية البنك المركزي ما خد أهم خطوة في تاريخ تحرير سعر الجنيه وبعدها بدأت التدفقات المالية الدولية من كل حتة على مصر وخاصة بعد توقيع صفقة رأس الحكمة مع الإمارات وهي أكبر صفقة استثمارية في تاريخ مصر.
طيب ايه الجديد في قصة الصندوق مع الحكومة المصرية وامتي هيتم صرف أول قسط من القرض.. شوف ياسيدي كل المعلومات بتقول إنه تم إدراج مصر على جدول المجلس التنفيذي لصندوق النقد الدولي يوم 29 مارس الجاري وده معناه ببساطة هيكون اعتماد الاتفاقية مع مصر وبدء صرف الشرائح بالاتفاق مع الحكومة المصرية وفي نفس الوقت هيكون الضوء الأخضر لباقي مؤسسات التمويل عشان تبدأ تضخ في السوق المصرية وكمان إشارة البداية لتدفق المزيد من الاستمثارات الساخنة أو المباشرة أو الاستمثارات السريعة وقصيرة الأجل في السوق المصري من تاني.
كمان اعتماد برنامج التمويل لمصر في صندوق النقد هيدي إشارات إيجابية لوكالات التصنيف الدولية وللسندات المصرية في الخارج وتكلفة التأمين على الديون وحاجات كتيرة إيجابية بخصوص الاقتصاد المصري.
وخلونا نتفق إنه لولا صفقة رأس الحكمة مصر مكانتش هتقدر تعوم الجنيه وبالتالي مكانش هيكون فيه قرض ولا تدفقات دولارية من الخارج وعشان كده الخبراء أطلقوا عليها الصفقة التاريخية وطوق النجاة للاقتصاد المصري واللي أطراف كتير كانت مستنياه يوقع ومصر تعلن إفلاسها وفعلا قالوا كده وقالوا أكتر زي إن السوق السودا هي اللي بتحكم مصر وهتستمر 50 سنة والحكومة لاحول لها ولا قوة وان المركب بتغرق لكن مستحيل بلد زي مصر توقع ودي حاجة صعب جدا يفهموها أهل الشر والفتنة والتحريض ودعاة الخراب.
