12 مليار دولار لدعم الغلابة.. مفاجآت الحكومة فى 2024
يا ترى الدولة هتخصص كام لدعم الغلابة فى الموازنة العامة؟ وهل مليارات الدولارات اللى تدفقت على مصر مؤخرا هيكون ليها دور فى زيادة الدعم ولا لأ؟ وايه ابرز القطاعات اللى هتاخد الدعم الأكبر؟ وايه موقف الصحة والتعليم؟
الرئيس السيسي مهتم جدا بدعم الفئات الأكثر احتياجا فى مصر وجزء كبير من مخصصات الموازنة العامة الجديدة هيكون مخصص للدعم وبلغة الارقام خصصت الحكومة حوالى 596 مليار جنيه ما يوازي أكتر من 12مليار دولار أمريكي لمنظومة الدعم، ضمن مشروع الموازنة المقبلة (2025/2024)، في محاولة لتخفيف الأعباء عن متوسطي ومحدودي الدخل، اللى تاثروا بشدة منبزيادة معدلات التضخم وتآكل قيمة الجنيه
وبتشمل مخصصات الدعم الحكومي، 134 مليار جنيه للسلع التموينية، وأكتر من 147 مليار جنيه لدعم المواد البترولية، و40 مليار جنيه لبرنامج "تكافل وكرامة
ورفعت الحكومة في ديسمبر اللى فات مستهدف عبء دعم المواد البترولية في السنة المالية الجارية بحوالى 9% إلى 130 مليار جنيه
وزيادة دعم المواد البترولية جه نتيجة لارتفاع أسعار البترول عالميا وتغير سعر الصرف اللى بيعد تحديا كبير للمالية العامة للدولة، وكفاية تعرف ان دعم رغيف العيش بيتخطى الـ 125 مليار جنيه بعد توقعات بتجاوز تكلفته 12 قرش ونص في حين ان المواطن بيدفع 5 قروش بس فى سعره.
ووفقا للأرقام المعلنة من الحكومة بيبلغ إجمالي المصروفات العامة للموازنة الجديدة 3.9 تريليون جنيه، بينما يصل حجم الإيرادات المتوقعة 2.6 تريليون جنيه، وبتستهدف الحكومة 2 تريليون جنيه إيرادات ضريبية دون إضافة أعباء جديدة على المواطنين أو المستثمرين، من خلال تعظيم جهود دمج الاقتصاد غير الرسمي، والاستغلال الأمثل للأنظمة الضريبية المميكنة.
واتفقت مصر مع صندوق النقد الدولي على زيادة قيمة برنامج التمويل الممنوح للبلاد من 3 إلى 8 مليار دولار بعد الإجراءات اللى عملتها الحكومة مؤخراً وشملت خفض قيمة العملة بشكل كبير ورفع أسعار الفائدة بنحو 600 نقطة أساس.
ومن المتوقع ان السيولة الدولارية الكبيرة اللى دخلت مصر من صفقة راس الحكمة والبرنامج التمويلي الجديد مع صندوق النقد بالاضافة الى دعم الاتحاد الاوربي والبنك الدولي.. هتساهم فى تحقيق طفرة فى ايرادات مصر وهتزود المعروض من الدولار وده هيؤدي الى تراجع سعر العملة الأمريكية واللى هيكون ليه انعكاس كبير على اسعار السلع فى الاسواق.
