هي الدولة هتقطع التموين فعلاً.. رد صادم من الحكومة

 
 
حيرة كل شهر يا تري هتصرف تموين اد اية الشهر ده، وهل الاسعار هتزيد الشهر ده ولا هتفضل زي ما هيا، وهل فعلا الدولة عايزة تقطع التموين ولا توقفه فترة معينة ولا اية الحكاية.. طيب اسعار السلع في التموين كام ونصيب كل فرد علي بطاقات التموين اد اية 

التموين واحد من الخدمات والسلع اللي الدولة صعب جدا ترفع ايدها منها، وفي ناس حرفيا عايشة عليه خصوصا في ظل اسعار السلع العالية المبالغ فيها للسلع الاستراتيجية اللي بيحجاها كل بيت مصري، وفي كل شهر حيرة كبيرة بتحصل للمواطنين عن اسعار السلع التموينية هل هتزيد عن الشهور اللي فاتت ولا هتفضل زي ما هيه خصوصا اسعار الزيت والسكر في عز الازمة اللي بتعاني منها مصر خصوصا في السكر واللي بقي الحصول علي كيلو حلم صعب المنال.
بس الوزارة علي طول طلعت وردت علي كل الشائعات اللي بتنقالها جهات كتيرة من الجماعات والجهات اللي بتدفع لرفع حالة الغضب عند المواطنين علي اداء الحكومة، خصوصا في ظل الشائعات اللي بنمسعها بشكل شبه يومي ان الدولة عايزة تقطع التموين وفي ناس تقول عايزة تلغيه وكلام كتير ملهوش اول من آخر.
طيب الحقيقة فين في موضوع التموين وهل الدولة فعلا عايز تقطعه ولا تلغيه اصلا؟.
وزارة التموين نفت الكلام ده تماما، وقالت ان الوزارة ملتزمة تماما بتسليم المواطنين بالسلع التموينية الخاصة بيهم مع بداية كل شهر، وان المخزون الاستراتيجي الموجودة مع الدولة أمن تماما ويكفي لمدة اكثر من 6 اشهر علي الاقل.
الوزارة قالت كمان، أنه بيتم صرف السلع التموينية من اي مننفذ تمويني قريب من المواطن داخل نطاق المحافظة اللي البطاقة موجودة فيه، وكمان طمنت المواطنين عن ازمة السكر واجراءات حلها، وان الأزمة هتنتهي قريب قوي خصوصا في ظل توريدات محصول البنجر وقصب السكر وتشغيل المصانع بشكل قوي وفعال لضخ معدلات السكر بالاسواق.
الوزارة قالت كمان إن نصيب الفرد من التموين بيتم تحديده على أساس شوية عوامل منها الدخل الشهري وحجم الأسرة والاحتياجات الأساسية والمتوسطة، والهدف من ده هو ضمان توزيع السلع بشكل عادل ومتساوي بحيث يستفيد كل أصحاب الدخل المنخفض ومحدودي الدخل.
طيب بالنسبة لتموين شهر مارس ظروفه اية.,
وزارة التموين والتجارة الداخلية قالت انها بدأت صرف المقررات التموينية عن شهر مارس الجاري لـآ 64 مليون مواطن بإجمالي 22 مليون بطاقة تموين من خلال 40 ألف منفذ تمويني على مستوى الجمهورية.

الوزارة قالت كمان، أن نصيب الفرد المسجل على بطاقة التموين هيكون أزازة زيت 800 مللي، وبحد أقصى 4 زجاجات زيت للبطاقة الواحدة، وكل فرد مسجل على البطاقة له كيلو سكر واحد وبحد أقصى 6 كيلو سكر للبطاقة الواحدة، والبطاقات اللي عدد افرادها قليل عن 4 أفراد ليهم كيلو أرز أو مكرونة فقط، اما بالنسبة للبطاقة اللي فيها 4 أفراد او أكثرفليهم 2 كيلو أرز 800 جرام أو مكرونة.
اما بالنسبة للاسعار، فالوزارة قالت ان اسعار السكر علي بطاقات التموين هيكون 12.60 جنيه، والزيت الخليط 800 مللي 30 جنيه والأرز المعبأ 1 كيلو جرام 12.60 جنيه، وكيلو الدقيق 18 جنيه، وكيس المكرونة 800 جرام 13 جنيه، وكيس المكرونة 400 جرام 6.50 جنيه، وكيس الفول 500 جرام 9 جنيه.