بعد التعويم.. قرار صعب من البنك المركزي.. امتي وإيه اللي هيحصل

ياترى البنك المركزي ناوي على إيه الأيام الجاية بعد التعويم ورفع سعر الفايدة وهما أخطر قرارين في السنين الأخيرة.. ولو. فيه قرار جديد هيكون امتى وليه.. تعالوا نشوف المعلومات اللي عندنا بتقول ايه.

 
زي ما احنا عارفين إن البنك المركزي المصري بيعمل 8 اجتماعات للجنة السياسة النقدية  في السنة بمواعيد مدو لمراجعة بيانات الاقتصاد والسياسة المالية وسعر الفايدة ومعدلات التضخم اللي هي الاسعار في الأسواق وبياخد قرارات بناء على البيانات اللي قدامه وغير المواعيد الثابتة للجنة السياسة النقدية بتضطر ساعات تعمل اجتماعات استثنائية وتاخد قرارات عاجله زي ما حصل كده في قرار التعويم ورفع سعر الفايدة 6% مرة واحدة..

اللي يهمنا في اللي جاي أن لجنة السياسة النقدية هتجتمع اخر الشهر ده أو تحديدا يوم 28 مارس الجاري يعني خلال اقل من 15 يوم لبحث مصير سعر الفايدة بعد قرار الاجتماع الاستثنائي واللي رفع فيه سعر الفايدة 600 نقطة أساس مع قرار تحرير سعر الجنيه يوم الاربعاء اللي قبل اللي فات والغريبة إن أغلب توقعات المصرفيين شايفين إن  البنك المركزي هيرفع سعر الفايدة بنسبة 2% في اجتماعه الدوري القادم للمرة التانية  بنفس الشهر لتعزيز جذب الاستثمارات الأجنبية غير المباشرة وهي شراء أذون خزانة بالجنيه واحتواء معدلات التضخم اللي ظهرت مع تحرير سعر الصرف.
ولأن البنك المركزي رفع سعر الفايدة 6% قبل أسبوع ووصلت  27.25% للإيداع و28.25% للإقراض ومع الزيادة ال2% المتوقعة يبقي سعر الفائدة هيوصل حوالي 30% ودي هتكون أعلى نسبة فايدة في تاريخ مصر ..
طيب ليه البنك المركزي هيرفع سعر الفايدة.. ده سؤال مهم جدا .. المركزي بيرفع الفائدة عشان يغري أصحاب الأموال والمدخرات للاستثمار في البنوك بفايدة ضخمة يعني سحب السيولة من السوق واللي بتروح للأغراض الاستهلاكية واللي بدروهاا بترفع نسب التضخم يعني طول ما فيه فلوس زيادة الناس هتشتري بيها وده هيسبب ضغط على الأسواق والأسعار هتزيد مع زيادة الطلب.

كمان لجنة السياسة النقدية هترفع سعر الفايدة عشان سبب تاني وهو توفير عائد مرتفع لجذب الاستثمارات الأجنبية غير المباشرة أو الأموال الساخنة لشراء أذون خزانة بالجنيه المصري مقابل بيع الدولار... طيب ايه هي أذون الخزانة.. هي ياسيدي عبارة عن أداة دين حكومية بتصدر بمدة تتراوح بين 3 شهور إلى سنة، وعشان كده بتعتبر من الأوراق المالية قصيرة الأجل وبتميز أذونات الخزانة مقارنة مع سندات الخزانة بسهولة التصرف فيها دون أن يتعرض حاملها لخسائر، لأن الإذن عادة يباع بخصم، أي بسعر أقل من قيمته الاسمية يعني زي كده سند بيتباع وعليه فايدة كبيرة ..ووزارة المالية باعت ب 98 مليار جنيه  أذون الخزانة أجل سنة بمتوسط سعر فايدة تجاوز 32% وهي نسبة ضخمة بعد قرارات المركزي الأخيرة، وأغلب اللي اشتروه مستثمرين أجانب.
طيب إيه الآثار السلبية لرفع سعر الفايدة.. طبعا أكيد أي قرار بيكون ليه سلبيات أو اثار جانبية زي مثلا في حالة رفع سعر الفائدة هياثر بشكل كبير على المقترضين من البنوك من الأفراد والشركات واللي بتعتمد في جزء كبير من نشاطها على التمويل البنكية زي شركات العقارات مثلا واللي هتتحمل تكاليف إضافية لخدمة فايدة للقروض والتمويل وعندها تعاقدات على أسعار الفايدة القديمة وكمان ناس كتير هتفكر قبل ما تاخد قرض بسبب الفايدة العالية عليه.