باب جديد للدولار.. استثمارات ضخمة في الطريق..شوف إيه الحكاية

 
الحصة الدولارية الكبيرة اللي حصلت لمصر من صفقة الاستثمار السياحي في راس الحكمة فتحت شهية الدولار علي فتح باب الاستثمارات في كل المجالات، وحاليا في باب خير جديد اتفتحت لمصر ولكن من مجال مختلف تماما. يا تري اية حكايته وهيدخل لمصر كام.
 

الدولة المصرية عارفة ان خطة القضاء علي السوق السودا في التجارة بالعملات كان لازم لها فتح ابواب كتيرة للعملة الخضراء وتكون بشكل مستمر، وده اللي عملته الحكومة عن طريق تذليل عقبات الاستثمار في كل المجالات وكانت البداية بتوقيع عقود الاستثمار السياحي في راس الحكمة واللي دخلت تمويلات نقدية بشكل مباشر هتوصل لـ 35 مليار دولار، ده غير فرص العمل الكبيرة اللي هتوفر الشركة الاماراتية للعمالة المصرية في كل المجالات بداية من اعمال البناء والتشييد مرورا بالتشغيل الفعلي للمشروع والموظفين اللي هيحتاجهم لتقديم الخدمات، ده غير الوظايف الغير مباشرة اللي هتكون ورا المشروع .
طيب اية الجديد بعد مشروع راس الحكمة؟.
شوف حضرتك بعد اعلان الحكومة بفتح الاستثمار السياحي في راس الحكمة، الدولة استقبلت طلبات كتيرة للاستثمار في مشروعات مختلفة، واحد من القطاعات اللي كان عليها طلب هو قطاع البترول وده في ظل خطة الدولة لتبنى خطط وأفكار جديدة لزيادة معدلات إنتاج الثروة البترولية من خلال تكثيف أعمال البحث والاستكشاف، وزيادة عدد الحفارات لحفر مزيد من الآبار الاستكشافية.
حاليا شركة شيفرون الأمريكية بتخطط لحفر أول بئر لاستخراج الغاز الطبيعي من حقل نرجس 2 بالمياه العميقة في البحر المتوسط في الربع الأخير من العام الحالي.
طيب اية هو حقل نرجس ده وكام العوايد بتاعته علي الاقتصاد المصري؟.
قصة اكتشاف حقل نرجس 2 بترجع لعام 2023، لما شركة شيفرون الأمريكية اعلنت اكتشاف حقل غاز طبيعي على مساحة 1800 كيلومتر مربع شرق البحر الأبيض المتوسط في مصر، بحجم احتياطيات مستقبلية قابلة للاستخراج بنحو 2.5 تريليون قدم مكعبة، وده ثاني أكبر حقول الغاز المكتشفة في مصر بعد حقل ظهر .

الشركة الأمريكية هتبدأ الإنتاج من حقل نرجس 1 في النصف الأول من 2025، بكميات هتوصل إلى 600 مليون قدم مكعبة في المرحلة الأولى، وبعدها هتبدأ الحفر في حقل نرجس 2 نهاية 2024، وده بهدف تعزيز احتياطيات الحقل، وهتوصل الاستثمارات المبدئية للحقلين لـ 60 مليون دولار.
طيب الشركات دي هتمتلك كام في الحقول الجديدة دي؟.
شيفرون الأمريكية بتمتلك هيا وشركة وشركة آي إي أو سي برودكشن واللي بتتبع شركة إيني الإيطالية، حصة 45% من الامتياز، وشركة ثروة للبترول المصرية بتمتلك حصة 10%.

وزير البترول والثروة المعدينة طارق الملا، قال أن متوسط إنتاج مصر من الغاز الطبيعي وصل لـ 5.3 مليار قدم مكعبة يومياً في الربع الأول من العام، وأن حجم الإنتاج متوقف على حجم عمليات البحث والاستكشاف والتنقيب الجديدة خصوصا في البحر المتوسط، واللي عليه امال كبيرة في تعزيز الطاقة الإنتاجية لمصر من الوقود.

وأكد الوزير البترول إن  مصر بتستهدف 7.5 مليار دولار استثمارات أجنبية فى صناعة الغاز والبترول العام المالى في 2025 .