عودة الطوابير للصرافة والسعر في النازل.. نهاية الوحش الأخضر
إزاي الدولار الأمريكي بيرجع قدام الجنيه في البنوك وانهار تماما في السوق السودا.. وايه اللي بيحصل في سوق الصرافة وازاي الوحش الأمريكي الأخضر بيرجع لمكانه.. تعالوا نشوف التفاصيل
فاكرين شركات الصرافة لما كانت تقريبا فاضية بعد ما كل الزباين راحوا السوق السودا للدولار النهاردة المشهد اتغير تماما وللنقيض والناس رجعت توقف طوابير عشان تبيع الدولار للصرافة اللي تابعة للبنوك أو لشركات بتورد للبنوك وده مشهد معناه إن أزمة الدولار انتهت فعلا لأن الناس عرفت إن السوق السوداء مش راجعة تانية وإن خلاص الأزمة انتهت وبقي فيه ثقة فطلعوا دولاراتهم وراحو يغيروها في الصرافة وفي النور وبعيد عن خطر ونصب تجار العملة واللي انتشرت فيها الدولارات المزورة والمجمدة دا غير اللي خسر دولاراته لما وقع في أيد الأمن والقضاء.
حسب البيانات شركات الصرافة غيرت دولارات بحوالي مليار جنيه خلال الأيام الاخيرة ورجعت تحويلات المصريين وزادت عشر مرات حسب تصريحات رسمية وكل ده بيقول إن الدولار بدأ يرجع بقوة ومش هينقص تاني قي السوق أو يختفي لأن الدولة اتعلمت الدروس من الأزمة وفتحت موارد كتير للدولار غير الموارد المعروفة وقدرت مثلا توفر 13 مليار دولار من فاتورة الاستيراد في سنة واحدة وقدرت تقتحم مجال الاستثمارات العملاقة والعالمية وقدرت تستغل موقعها الجغرافي العظيم وإمكانياتها الاقتصادية وعرفت الطريق الصح اللي بيودي للدول العظمي .
الدولة اللي ادارت وبتدير الأزمات بالقوة دي وتخلي الدولار من 73 جنيه في السوق السوداء يتراجع الي 47.70 جنيه في البنوك وتقلب المعادلات وتقهر الأزمات وتهزم عواصف قادرة إنها تغير مصير اي أزمة وتتعلم منها الدول التانية وإن الفوضى مش هترجع تاني وده اللي بيهم الناس.... ولو روحنا البنك دلوقتي هنلاقي سعر الدولار نزل وبينزل كل يوم عن التاني وده معناه إن الوحش الأميركي بيرجع لمكانه الطبيعي قدام الجنيه وكل قرش بينزل من الدولار بيزيد من قوة الجنيه ودي سياسة العرض والطلب اللي بتحكم سوق الصرف والعملات في كل دول العالم.
اللي بيحصل في البنوك بيحدد الثقة والامل في الجنيه المصري وإنه هيواصل صعوده قدام الدولار وبيقول حاجة تانية مهمة جدا وهي إن الدولار مش بعبع ولا هو وحش ولا هو عملة لاتقهر لكنه عملة زي اي عملة واللي يشتغل ويصدر ويصنع عملته قيمتها تزيد وتاخد وضعها ومكانتها قدام عملات العالم
،
