مصير الدولار الأيام الجاية في البنوك.. مفاجأة في السعر

هو الدولار رايح على فين الايام الجاية في البنوك بعد قرار التعويم واختفاء السوق السوداء وعودة التحويلات وزيادة التدفقات الاستثمارية.. وياترى سعره ممكن يوصل كام.. تعالوا نشوف مع بعض
 

قبل تحرير سعر الجنيه كان معروف إن الدولار ملهوش كبير وكل يوم في زيادة ووصل 73 جنيه وكان ممكن يوصل لأكتر من كده ويبقي ب100 جنيه مع الفوضى اللي كانت في سوق الصرف وعشان كده كان ملف تعويم الجنيه وتحريره من الحماية هو الحل الضروري والتحمي زي ماقلنا كتير هنا في بانكير قبل التعويم بشهور طويلة والمركزي لعبها صح وحرر الجنيه في وقت مناسب وبعد ما خد كل الاحتياطيات وضرب السوق السوداء في الصميم وقضى عليها وبقي سعر الدولار في البنوك أعلى من التداولات في السوق السودا وبعدها رجعت تحويلات المصريين للبنوك بعد أغلبها راح السوق الموازية عشان يستفادو من فرق السعر .
وخلينا متفقين مكانش ينفع يكون فيه تعويم قبل صفقة رأس الحكمة الضخمة وزيادة الحصيلة الدولارية اللي في المركزي وبعدها الكلام عن صفقات تانية ضخمة في الطريق وتوقيع اتفاقية صندوق النقد الدولي بحزمة تمويل هتصول 20 مليار دولار وحصل والمركزي خد القرار وكلنا شفنا اللي حصل بعدها انتهت المضاربة على سعر الدولار وانتهت الزيادات العشوائية في سوق الصرف وبدأت الاسواق تستقر والاسعار تنزل شوية ولسه هتنزل بعد تخلص التجار من البضاعة اللي اشتروها بأسعار دولار السوق السوداء قبل قرار المركزي.
طيب نيجي للسؤال الأهم .. الدولار رايح على فين بعد التعويم.. الإجابة على السؤال ده هتعتمد على آلية تحديد سعر الدولار الجديدة بعد التعويم وهي العرض والطلب والوفرة وبينهم كل الاحتمالات واردة في الأسعار يعني طول ما الدولار متوفر مع طلب قليل سعره هيفضل ينزل دائما حتى لو هيوصل ل10 جنيه لأن السوق اللي بيحدد دلوقتي مش البنك المركزي والعكس صحيح لو الطلب على الدولار كبير والعرض ثابت أو قليل سعره هيفضل يعلي ويزيد لغاية ما المعروض من الدولار يزيد او الطلب عليه يقل وده ميزان السوق دلوقتي
لكن الخبراء شايفين إن سعر الدولار قدام الجنيه هيوصل مع استقرار السوق لنقطة الاتزان وهي مابين 38 و40 جنيه وزي ما قلنا السعر بيحدده قانون السوق دلوقتي وطول ما الحكومة والمركزي بيوفروا الدولار على قد ما هيقدروا. يتحكموا في السعر.