خبر يهم كل اللي شغالين فى السعودية.. لازم تعرف تفاصيله

ايه الخبر السار اللي السعودية بتحضره للمصريين وإيه علاقة القرار اللي جاي بالعمالة المصرية في المملكة.. ايه الحكاية وايه اللي هيحصل

 

 وزير المالية السعودي، محمد الجدعان، طلع من شوية واتكلم في حاجات كتير عن الاقتصاد السعودي وفي وسط الكلام قال إن بسبب قوة الاقتصاد السعودي الحكومة السعودية هتيعيد النظر في فرض مقابل مالي على المرافقين، وده في اطار استقطاب كفاءات جديدة للسوق السعودي.

والحقيقة موضوع  فرض رسوم أو مقابل مادي على المرافقين، كان موضوع نقاش وتقييم أثاره على الاقتصاد السعودي، ولقوا إن بسبب القرار كتير من العاملين في السعودية رجعوا أسرهم لبلادهم ودا خسر الاقتصاد السعودي واللي فقد قوة استهلاك لأكتر من 2 مليون بقوا يصرفوا أموالهم خارج الاقتصاد السعودي، بخلاف نقل أموال إعالتهم من المقيمين العاملين داخل المملكة إلى الخارج.

وفي النهاية الحكومة السعودية شافت إن الإنفاق داخل السعودية، والاستهلاك داخل السعودية 90% منه مستورد، وبالتالي الجزء الأكبر منه بيخرج بالنهاية، وبالتالي بقى العائد من وجود المرافقين وعائلات المغتربين أعلى من فرض الرسوم فالقرار الجديد هو الغاء الرسوم والأموال اللي المقيمين كانوا بيدفعوها عشان يستضيفوا عائلاتهم.
طبعا القرار ده مهم جد لمصر والعاملين في السعودية أو اللي لسه بيفكروا يروحوا السعودية للعمل هناك بأوراق مرافق من غير دفع ريالات كتير وكمان دلوقتي هيقدروا يشتغلوا بحرية في السوق السعودية وزي ما احنا عارفين الجالية المصرية في السعودية من العاملين والمرافقين هي أكبر جالية مصرية في الخارج وحسب البيانات الرسمية المملكة العربية السعودية بتضم أكبر جالية مصرية بالخارج نحو 2.9 مليون مصري من بين  14 مليون مصري بالخارج.
وبعد تطبيق القرار السعودي بالغاء مقابل استضافة المرافقين متوقع ارتفاع الطلب على السفر للسعودية من الشباب والعائلات المصرية للسعودية وكل دا بيدي قيمة مضافة للاقتصاد المصري سواء من التحويلات أو استفادة العاملين المصريين بالخارج من الفرصة وبناء مستقبل كويس ليهم ولاولادهم وكل ده بيخف من على كاهل الحكومة المصرية.