الأوفر برايس انهار حضر فلوسك.. أرخص سيارات زيرو في السوق
خلاص أسعار السيارات بقت في النازل وجضر فلوسك عشان تشتري العربية اللي كان نفسك فيها .. الأسعار نزلت كام وهتوصل كام .. هنقولك على كل التفاصيل
انت عارف بقي ياسيدي إن أسعار السيارات ولعت وبقت فوق السحاب والاوفر برايس يكسر الضهر وده عشان أزمة الدولار ساعتها ووقف الاستيراد تقريبا والركود الكبير اللي ضرب السوق بعد ما فقد 80% من مبيعاته لكن دلوقتي الأسعار بدأت تنزل بشكل كبير ولسه هتنزل اكتر بعد انهيار الدولار في السوق السودا واللي خلاص جابت ضلفها وقفلت والدولار بقي في كل البنوك واخيرا قطاع السيارات هيرجع يشتغل بكل قوته ويرجع اسعار زمان لأنها هي دي الاسعار الطبيعة واللي حصل كانت أزمة عارضة..
الأرقام اللي جاية من السوق بتقول إن الأوفر برايس انهار خلاص ونزل اكتر من 300 ألف جنيه والاوفر برايس ده حضرتك السعر الزيادة اللي بيزوده تاجر العربيات على سعر العربية عشان يضمن إنه ما بيخسرش ولسه هينزل اكتر ووصلت نسبة التخفيض في أسعار السيارات لـ20% وطبعا النسبة دي هتزيد كل ما الدولار بيتراجع وبعد الدولة ما رجعت فتحت الاعتمادات المستندية والتي يتم من خلالها توفير العملة الصعبة للاستيراد، وده هيوفر كميات أكبر من السيارات وهيزود المعروض في السوق، وبالتالي هتتراجع أسعار السيارات بشكل أكبر.
وفي بانكير هنقدملك أرخص 5 سيارات جديدة متاحة للشراء أمام عملاء السوق المصري وتبدأ أسعارها من 400 ألف جنيه.
وأولهم سيارة روتون ساجا وبتتوفر ساجا بفئتين من التجهيزات بسعر رسمي يبدأ من 430 ألف جنيه للفئة الأولى، والفئة التانية بسعر 465 ألف جنيه للفئة الثانية الأعلى تجهيزًا.
وسوزوكي إسبريسو ودي بتتوفر في السوق المصري بفئة واحدة من التجهيزات سعرها 550 ألف جنيه.
السيارة التالتة نيسان صني و المجمعة بمصانع الشركة اليابانية في مصر بـ4 فئات متوفرة بسعر رسمي يبدأ من 695.400 جنيه، و726.500 جنيه للثانية، والفئة الثالثة بـ747 ألف جنيه، والفئة الرابعة تباع بـ761 ألف جنيهًا.
ولو نفسك في سيارة فخمة وبسعر حنين هتلاقي شيري أريزو ب 5 موديل 2024 بتلات فئات من التجهيزات بسعر رسمي يبدأ من 740 ألف جنيه، 785 ألف جنيه للفئة الثانية، بينما قدمت فئة السيارة الثالثة مقابل 820 ألف جنيه.
وتباع الفئة الأولى موديل 2024 من بي واي دي f3 المزودة بناقل حركة يدوي 750 ألف جنيه، والفئة المزودة بناقل أوتوماتيك بات سعرها 850 ألف جنيه.
