لو خزنت دهب وسعره نزل هتعمل ايه.. هتقولك المفيد

 
عملت زي ناس كتير واشتريت دهب وخزنته عشان الأيام وفحتة السعر نزل..متقلقش مش هتخسر ودا اللي ييقوله تجار الدهب وخبراء الصاغة دلوقتي.. طيب إزاي اشتري بالغالي وابيع بالرخيص واكسب.. هنقولك ازاي.

 
في العادة في قانون في السوق بيقول إن الدهب عمره ما يخسر وده لأنه معدن نادر وليه سوق وقيمته بتزيد مش بتقل لكن الدهب معروف بردوا إنه استثمار بعيد ومتوسط المدي يعني المفروض تشتريه وتخزنه من سنة لا 3 سنين عشان تكسب فيه صح وعشان كده بيفضل إن شراء الدهب يكون من فوائض المال أو المدخرات أو الفلوس الزايدة عندك عشان تقدر تسيبه اطول وقت ممكن..

وعشان كده خبراء سوق الدهب والصاغة بينصحوا اي حد اشتري دهب بغرض الاستثمار إنه يصبر على الأقل 6 أشهر قبل ما يفكر يبيع  وده لان اسعار الدهب بتتغير دائما وممكن كمان تقفز لمستويات كبيرة طول ما فيه أزمات عالمية حولينا لأن المعدن الأصفر هو الملاذ الآمن للدول زي الأشخاص بالظبط وكل البنوك المركزية العالمية بتشتري دهب وتخزنه وبيعتبر احتياطي نقدي وقدرة البنوك المركزية بتقاس باحتياطيات الدهب فيها.
المصريين من اكتر شعوب العالم اللي بتحب وتفضل شراء الدهب وتخزينه ودي عادة مصرية من أيام الفراعنة واللي الدهب كان معدن أساسي ورئيسي في مصر والفراعنة حولوه لتحف ومشغولات وحلي وكنوز ومن هنا الدهب في مصر خد مكانة كبيرة جدا وبقي اقتناء الدهب من مفاخر العائلات حتي من غير أزمات اقتصادية، لكن مع الأحداث الأخيرة ناس كتير لقت في الدهب ملاذ آمن عشان تتحوط للأيام الصعبة اللي الناس عاشتها ولأن الناس كانت خايفة يحصل تعويم  والجنيه قيمته تقل والمصريين في الخارج دخلوا دهب من بره ومن ساعة سريان مبادرة دخوله مع المغتربين برسوم مخفضة باكتر من 4 طن ودا غير  30 طن من المشغولات والسبايك المصريين اشتروها في 2023 لوحدها ودا بيعتبر احتياطي نقدي استراتيجي شعبي المصريين عملوه.