لو عاوز تسدد ديونك أو تعمل مشروع.. قرض حسن وبيوصل لـ500 ألف جنيه
لو مش موظف وبتدور على حد يسلفك عشان تعمل مشروع وتزود دخلك .. متقلقش الحل عندنا ومن غير ما تتحول لحد.. فيه بنوك كتير بتدي قروض من غير ضمان الوظيفة ولكن بشروط، واللي بتيح لأصحاب المهن الحرة أو الأعمال الخاصة الاقتراض دون الحاجه لوجود وظيفة ثابتة وبفايدة بسيطة كمان... هنشرحلكم بالتفصيل
بنك ناصر على سبيل المثال بيقدم قرض حسن للأشخاص الغير قادرين يصل إلى 30 ألف جنيه، وده لو انت هتعمل مشروع صغير تبتدئ بيه حياتك العملية أو توسع بيه مشروع موجود
وبخصوص شروط الحصول على القروض الشخصية من بنك ناصر الاجتماعي فهي سهلة وبسيطة منها يكون المقترض محتاج فعلاً القرض لانه قرض حسن وبفايدة لاتذكر زي ما قلنا وبطاقة سارية وما يثبت طبيعة مهنته أو حرفته..
كمان فيه بنوك تانية بتدي قرض شخصي بدون وظيفة زي البنك الأهلي المصري واللي بيمول المشاريع الصغيرة والكبيرة، وبتتراوح قيمة القرض بين 5 الاف جنيه و30 ألف جنيه.
وبخصوص شروط الحصول على القرض من البنك الأهلي المصري فهي إن عمر المقترض مايزيدش عن 60 سنة ومايقلش عن 21 سنة وتقدر تاخد القرض من خلال صورة من بطاقة الرقم القومي، وايصال كهرباء، أو مياه أو غاز أو تليفون حديث.
كمان تقدر تاخد قرض شخصي بدون وظيفة من بنك عودة لو عاوز تسدد ديون أو مصاريف السفر أو لسداد تكاليف الدراسة، أو تمويل المشاريع الصغيرة، والميزة بقي إنه بيتم الرد على طلب القرض بعد مرور 48 ساعة من تقديم الطلب وقيمة القرض من بنك عودة بتترواح بين 10 الاف جنيه و500 ألف جنيه ويشترط إحضار البطاقة الشخصية، مع توفير إيصال مرافق حديث.
