أخطر 5 أسئلة في صفقة رأس الحكمة
يا ترى صفقة رأس الحكمة هتقضي على أزمة الدولار بصورة نهائية؟ وهل سعر الدولار فى السوق السودا هينهار ويوصل لسعره العادل ؟ وايه تأثير الصفقة على أسعار الدهب ؟ وهل كده أسعار السيارات ممكن تنزل ولا لأ ؟ والصفقة دي أصلا بيع للأراضي ولا استثمار ومشاركة .. فى الفيديو ده هنجاوبك على كل الأسئلة الى بتشغل بالك
من بعد الاعلان عن صفقة رأس الحكمة اللى هتوفر سيولة دولارية عاجلة هتوصل 35 مليار دولار في غضون شهرين وكل الناس بتسأل هل الصفقة دي هتحل أزمات مصر وهتقضى على السوق السودا للدولار والأسعار هتنزل والدنيا هتظبط ولا دي مجرد مسكنات.
وعشان نجاوب على الأسئلة دي لازم نشرح فى الأول ايه أهمية اتفاقية شراكة رأس الحكمة بين مصر والامارات
بص يا سيدي اتفاقية رأس الحكمة دي عبارة عن مشروع ضخم جدا هتنفذه الامارات فى مصر بالشراكة مع الحكومة المصرية ومصر هتحصل على 35 مليار دولار خلال شهرين كسيولة عاجلة ضمن الاتفاقية الموقعة بين البلدين .. والسيولة دي جزء منها 11 مليار دولار موجود بالفعل في البنك المركزي في صورة ودائع إماراتية و الرقم دا هيتنقل من بند الديون الخارجية على مصر يعني ديون مصر الخارجية هتتراجع تقريباً 6.7% مع انتقال الوديعة دي من باب الديون وهتكون متاحة للبنك المركزي المصري اللي بدوره هيستخدمها بطرق تخفف شوية من حدة أزمة فروق سعر الصرف.
والرقم اللى هتدخلوا الصفقة لمصر هو أضخم مبلغ استثمار أجنبي مباشر اتعمل فى تاريخ مصر.. بس رغم كده فيه اسئلة كتيرة خنجاوب عليها
وأول حاجة وأول سؤال شاغل الناس كلها هل مصر كده باعت أرضها ؟
السؤال ده جاوب عليه رئيس الحكومة فى المؤتمر الصحفى لاعن تفاصيل الصفقة وقال ان اللى بيحصل مش بيع ولكن صفقة شراكة ومصر طول فترة المشروع هتحصل على 35% من الأرباح ولو الصفقة بيع زي ما ناس كتير بتحاول تروج ايه اللى يخلى الشركة المالكية للمشروع تدفع 35% من ارباحها للحكومة
طب وايه تاثير صفقة راس الحكمة على مفاوضات مصر مع صندوق النقد؟
- وضع مصر في التفاوض مع صندوق النقد الدولي هيكون أفضل بكتير بعد توقيع الصفقة اللي كانت فوق توقعات الجميع لدرجة أن جولد مان ساكس قال "الصفقة دي هتساهم في حل جزء كبير من أزمة سوق الصرف في مصر".
-يعني مفاوضات مصر مع الصندوق كدا تقريبا اتحسمت وأن الخطوة القادمة هي خفض جزئي للجنيه "تعويم مدار" علشان ترجع تاني استثماراتك الخارجية وكمان تحل أزمة تحويلات المصريين في الخارج اللي جزء كبير منها راح ناحية السوق السوداء.
نيجي لسؤال تاني أهم .. احنا داخلين على ايه دلوقتي؟
الناس يهمها تعرف موقف أسعار السلع والمنتجات .. من الآخر كدا التضخم رايح بينا على فين.. بكل بساطة السوق هيحتاج من شهر إلي شهرين علشان تحس بالسيولة الدولارية وهنا الموضوع مرتبط بتوجيه الدولارات دي للإفراج عن جزء من الخامات والمستلزمات والسلع المتراكمة في الموانئ.
-ولازم تكون عارف ان سنة 2023 مصر أفرجت عن بضائع وسلع مستوردة بمبلغ 72.4 مليار دولار ورغم كدا التضخم -اللي هو ارتفاع الأسعار - لم يتوقف لأن فيه جزء كبير من السلع لسه في الجمارك ودا اللي نتوقع حل قصته في غضون شهر ونص إلي شهرين ووقتها السوق يبقي فيه انفراجه .
-طب ايه مستقبل أسعار السيارات؟
العربيات سلع غير أساسية ومش هيكون فيه أولوية لتدبير الدولار ليها وبالتالى احنا علي وضعنا في سوق السيارات يعني هتفضل قرب المستويات الحالية لكن اللي المضمون أن الأيام الجاية هيتوقف الارتفاع المستمر في سوق السيارات الجديدة.
-طب والدهب رايح فين؟
الدهب مكمل هبوط لحد التعويم المرتقب وممكن نسمع عن رقم 2900 جنيه مرة تانية لعيار 21.. طيب اللي اشتري عند 4 آلاف جنيه.. يفضل متبعش دهبك لأن الدهب على المدى الطويل هيكون رايح ناحية الارتفاع.
-والسوق السوداء للدولار رايح فين؟
قريب هينحصر تداولات دولار السوق السوداء بين 45 إلي 50 جنيه على اقصى تقدير ومع وصول السيولة الدولارية هتنتهى بشكل كبير قوة السوق السودا والمضاربة على العملة .. وضخ السيولة النقدية هيكون تأثيره كبير على المضاربة وهيوقف أزمة الدولرة.. وللي ميعرفش الدولرة هي اتجاه الناس لتحويل الجنيه إلي دولار يعني اقتناء الدولار وكأنه سلعة.
-والمتوقع أن الصفقة هتقلب الأمور في الأسواق بس محتاجة شوية وقت لحد ما السوق يعترف بالسيولة الحاضرة و يعترف بتوافر السلع والخدمات والخامات بأسعار تنافسية ووقتها الدنيا هتتراجع بشكل أكبر.
- في النهاية صفقة رأس الحكمة دي تقدر تقول عليها "ضربة معلم".. ضربة مزدوجة للسوق السوداء وللمضاربة وكمان كانت رد حاسم على كلام مالوش دليل عن أن مصر كانت في طريقها للتخلف عن سداد ديونها الخارجية خاصة أن القاهرة مطالبة بسداد 42 مليار دولار.. الكلام دا اتنسف تماماً بعد الصفقة .
كمان الصفقة دي مش الأخيرة لسه في حاجات تانية في الطريق بس مش بقوة صفقة رأس الحكمة بس برضوا هتكون صفقات بأرقام كبيرة وهتوفر سيولة دولارية للبلد
