دولار السوق السوداء يواصل النزيف.. ومفاجأة عن سعره خلال الفترة الجاية
يا ترى ايه اللى بيحصل فى السوق السودا للدولار فى الكام يوم اللى فاتوا؟ وايه تأثير صفقة رأس الحكمة على اسعار العملة الأجنبية؟ وايه السيناريوهات المتوقعة لسعر الدولار الفترة الجاية؟
زي ما كلنا عارفين من وقت تحريك سعر صرف الجنيه لجذب المستثمرين وتنشيط الاقتصاد زادت الفجوة بين سعر الدولار في السوق الرسمي بالبنك المركزي والبنوك العاملة في مصر، والسوق الموازية بشكل كبير لحد ما وصل سعر الدولار مقابل الجنيه إلى نحو 72 جنيه فى وقت من الاوقات.
لكن مع انتشار الأخبار حوالين دخول استثمارات قوية لمصر بالعملة الصعبة انهار سعر الدولار في السوق الموازية بشكل كبير جدا وأصبح حاليا بيدور حوالين مستوى من 48 الى 50 جنيهخ وسط توقعات بمزيد من الهبوط فى الأيام الجاية وده بعد ما نجحت الحكومة في إنجاز أكبر مشروع استثماري مع الإمارات بـمبلغ 35 مليار دولار استثمارات مباشرة هيتم دفعها على دفعتين وهتستلمها مصر بحد أقصى خلال شهرين من توقيع الاتفاقية.
ومع دخول الحصيلة الدولارية ده هيؤدي إلى انفراجة كبيرة لأزمة الدولار لأنّ البنك المركزي سهيضخ طميات كبيرة من الدولار في البنوك لصالح المستثمرين والمستوردين لإتمام عمليات الاستيراد وتوفير المواد الأولية للإنتاج المحلي والصناعي لإعادة دورة الإنتاج مرة تانية والتصدير ودعم عجلة الإنتاج.
وطبعا دخول استثمار أجنبي مباشر لمصر هيساهم فى حاجات كتيرة حلوة للاقتصاد المصري زي تحسن التقييم الائتماني لمصر من قبل وكالات التصنيف العالمية وده هيبقا مؤشر لجذب المستثمرين للاستثمار في مصر مرة تانية كمان تكلفة التأمين على قروض مصر السيادية هتنخفض وهيتحسن مؤشر القروض وبالتالي هيصبح ده مؤشر مرضي للمستثمرين لانخفاض المخاطر من الاستثمار في مصر هيجذب المستثمرين مرة تانية للاستثمار فى مصر وكل ده هيدخل سيولة دولارية هتساهم فى القضاء على السوق السوداء ومش هيكون فيه اكتر من سعر للدولار فى مصر والسعر الرسمي هيكون السعر المعتمد اللى بيحدده البنك المركزي .
وكتير من الخبراء حاليا بيتوقعوا انهيار تاريخي فى السوق السودا للعملة وان الدولار سعره يوصل الى 38 جنيه أو أقل كمان شوية وده هيأثر على كل مجالات الصناعة والتجارة زيأسعار الدهب ومواد البناء والسيارات وكمان أسعار السلع الاستهلاكية اللى اسعارها ارتفعت بشكل ضخم مع الارتفاعات غير المبررة لدولار السوق السودا
