السيسي عمل اللي عليه والدور على البنك المركزي.. إيه اللى هيحصل بعد صفقة رأس الحكمة؟

يا ترى ايه اللى هيحصل بعد الإعلان عن الصفقة الكبرى؟ وهل صفقة رأس الحكمة هي الصفقة الوحيدة اللى هتعملها الحكومة؟ وايه التدخلات اللى هيعملها البنك المركزي الأيام الجاية للقضاء على أزمة الدولار؟ وليه السوق السودا بتعيش أيامها الأخيرة؟ وايه اللى قالتوا المؤسسات الدولية بعد اعلان مصر توفير 35 مليار دولار سيولة فورية؟
 

فيه حاجة حلوة بتحصل في مصر الفترة الأخيرة وتقدر تقول كده ان فيه تغيير جذري حصل في تفكير الحكومة والجهات المسئولة وكل جهة بقت عارفة دورها ايه والمفروض تتحرك ازاى وفى ملف أزمة الدولار اللى مصر بتعانى منها شوفنا ده بشكل واضح بداية من الرئيس عدالفتاح السيسي اللى قام بدور مهم وتاريخى للقضاء على ازمة نقص العملة من خلال تحركات في كل الاتجاهات كان من أول ثمارها الاتفاق التاريخي والشراكة الكبرى بين مصر والامارات في صفقة رأس الحكمة واللى متوقع وفقا لما أعلنه الدكتور مصطفى مدبولى رئيس الحكومة انها تدخل لمصر سيولة دولارية خلال شهرين هتوصل الى 35 مليار دولار بالإضافة الى 150 مليار دولار هيتم ضخها في تنفيذ المشروعات اللى هتتم وفقا لاتفاقية الشراكة يعنى اجمالى الاستثمارات المباشرة في مشروع راس الحكمة هيوصل الى حوالى 185 مليار دولار بالإضافة الى 35 % من أرباح المشروع هتحصل عليها مصر 
وخد بالك الاتفاقية دي ليها فوايد كتيرة جدا بعيد كمان عن انها هتحل أزمة نقص العملة الأجنبية وده الجانب الواضح في الاتفاقية لكن فيه جوانب تانية مهمة منها تراجع الدين الخارجي لمصر بحوالي 11 مليار دولار ودول الودايع اللى هتتنازل عنهم الامارات لمصر ضمن صفقة رأس الحكمة وتراجع الدين الخارجي بالرقم ده هيساهم في تحسن تصنيف مصر الائتمانى بالإضافة الى ان المشروع الجديد هيوفر ملايين فرص العمل وهيشغل شركات مصرية كتيرة هي اللى هتتولى عميلية تنفيذ المباني والطرق وغيرها 
طب السيسي عمل اللى عليه .. ايه بقا اللى هيعملوا البنك المركزي الأيام الجاية ؟
خد بالك ان فيه شقين مهمين في السياسة نقدية شق مالى واقتصادي زي اللى حصل في ملف رأس الحكمة وشق نقدي وده دور البنك المركزي اللى بيمتلك أدوات كتير يقدر من خلالها يظبط سوق الصرف وصفقة رأس الحكمة هتوفر زي ما قولنا سيولة دولارية ضخمة هتخلى البنك المركزي يتحرك ويضرب بكل قوة للقضاء على السوق السودا للدولار وتقدر تقول حاليا ان السوق الموازية للعملة بتعيش ايامها الأخيرة وهيكون فيه عمليات تنازل كبيرة عن الدولار للبنوك الفترة الجاية لأن سعر العملة الأمريكية هينهار بقوة وكلنا شفنا ازاى في من بعد مؤتمر رئيس الحكومة ولحد دلوقتى الدولار تراجع بأكتر من 8 جنيه في السوق السودا ومتوقع يتراجع أكتر

طب ايه الإجراءات المتوقعة  ؟ 
غالبا هيتم طرح شهادات استثمار بفايدة مرتفعة لاغراء الناس اللى هتبيع الدولار بالاستثمكار في الجنيه لأن معدل الربح هيكون عالى ومغرى اكتر من حيازة الدولار اللى زي ما قولنا هيتراجع بقوة .. كمان هيتم طرح شهادات دولارية بفايدة مرتفعة جدا لاستغلال عودة تحويلات المصريين بالخارج من جديد للقطاع المصرفي وخد بالك متوقع التحويلات ترجع لمستوياتها الطبيعية بعد انهيار السوق السودا للدولار

طب وايه موقف تعويم الجنيه ؟
ده خيار ضعيف جدا خصوصا مع توافر سيولة دولارية ضخمة وسد الفجوة بين السعر الرسمي وسعر السوق السودا خصوصا مع التدفقات الدولارية الكبيرة المتوقعة يعنى عندك مثلا فيه حوالى من 10 الى 12 مليار دولار من صندوق النقد بعد التوصل الى اتفاق بخصوص زيادة قيمة القرض وفيه 10 مليار يورو من الاتحاد الأوربي وفيه حوالى 5 مليار دولار من برنامج الطروحات الحكومية