الدولار غير الشرعي يسقط.."ضربة معلم".. إعرف تفاصيل أكبر صفقة استثمار مباشر في تاريخ مصر
بتعرف منين ان مصر دوله كبيره ..تعرف ده بسهوله من حسن تصرفها قدام التحديات والازمات اللي ممكن تاثر على دول كثير لكنها مش ممكن تاثر على مصر... في الوقت الحالي العالم كله عنده مشاكل اقتصاديه ما كانش حد يتخيلها... حروب وصراعات واوبئه كانت قادره انها تهد اقوى اقتصاديات في العالم لكن مصر دايما عند حسن ظن شعبها وما حدش يقدر ينكر انه في الوقت الحالي التحدي الخاص بتوفير العمله الاجنبيه الصعبه او المكون الدولاري هو تحدي كبير جدا لكن مصر ورائسها وحكومتها ادتنا النهارده حل عبقري هيكون له رد فعل سريع وتاثير ملموس جدا على تقويه الاقتصاد من ناحيه وحل ازمه النقد الاجنبي وضرب السوق السوداء في مقتل
ايه هو الحل ده وعباره عن ايه... ده اللي الحكومه كشفت عنه من شويه في اجتماع برئاسه الدكتور مصطفى مدبولي انتهى الى الاعلان عن قرار تاريخي بالموافقه على اكبر صفقه استثمار مباشر بشراكه استثماريه مع كيانات كبرى.. هتقول لي يعني ايه اقول لك يعني صفقات ناجحه من خلال جذب الاستثمار الاجنبي المباشر وبالتالي الاستثمار ده بيوفر لك موارد سريعه من النقد الاجنبي هتدخل شرايين الدوله الاقتصاديه وتقضي تماما على السوق السوداء.
وهنا حابين نلفت نظرك لحاجه ان الدوله المصريه لما بتتصرف وتتحرك.. بتتحرك دايما في مشاريع ومخططات تليق بيها وبقيمتها وبقدرها.. يعني حابين نفهمك انه الدوله لما تستخدم مصطلح اكبر صفقه استثمار اجنبي مباشر.. يبقى احنا فعلا بنتكلم عن صفقه ضخمه ممكن نطلق عليها بسهوله صفقه القرن.. لان الدوله المصريه في كل الاحوال متعوده على تنفيذ المشروعات والمخططات القوميه العملاقه.. وبتتعامل مع ده باعتباره منجزات تنمويه مهمه.. لكن وقت ما تستخدم مصطلح زي اكبر صفقه استثمار اجنبي يبقى حقيقي احنا قدام انجاز كبير هيعمل انفراجه تاريخيه في الاقتصاد المصري.
رئيس الوزراء في بيان شديد الاهميه كشف من شويه عن ملامح الصفقات الاستثماريه الكبيره دي وقال انها هتخص ثلاث حاجات.. مخططات للتنميه العمرانية.. ومخططات خاصة بالشركات والمصانع المصرية.. ومخططات تالتة خاصة بتمكين القطاع الخاص.
رئيس الحكومه كشف في بيانه للشعب عن انه الصفقات اللي تم الاعلان عنها النهارده دي كان وراها فريق كبير من القانونيين والفنيين والماليين اللي دخلوا في مسارات ناجحه للتفاوض انتهت بالاتفاق على الصفقات المهمه دي وانه المصريين الفتره الجايه هيكونوا على موعد مع انتعاش اقتصاديه كبيره جدا و مؤشرات ايجابيه هتشعر بها الشركات والمصانع المصريه اللي هتشترك في تنفيذ المشروعات اللي جوه الصفقات الاستثماريه الكبيره دي وان ده بطبيعه الحال عباره عن حزمه مزايا متعدده للدوله المصريه واقتصادها.
ومش بس كده.. ده علشان يكون عندك تفاؤل كبير باننا قادرين نتخطى اي تحديات اقتصاديه.. رئيس الحكومه قال في بيانه الرسمي ان الصفقات اللي تم الوصول ليها النهارده.. والاعلان عنها.. هي جزء من صفقات استثماريه لسه هيتم الكشف عنها لزياده موارد الدوله من العمله الصعبه، بمعنى ابسط.. إحنا ادام إنجاز عامل زي مايكون حلقه في سلسله طويله من الإنجازات الاقتصاديه الناجحه...اللي هيشعر بيها المواطن في وقت قصير جدا
الدكتور مصطفى مدبولي وعد باعلان التفاصيل الكامله للصفقات دي وتوقيع الاتفاقيات الخاصه بيها وده اللي هنشوفه في الايام او الساعات القليله اللي جايه علشان نكون قدام واقع جديد بيقول ان في حاله ثقه متناهيه من كل الكيانات الاستثماريه الكبيره في الاقتصاد المصري وان الجميع متاكد من قدره مصر وشعبها وقيادتها على تخطي اي تحديات مهما كانت.
ولازم تبقى عارف ان الصفقات اللي احنا بنتكلم عنها مش هتاخد وقت طويل علشان اثرها يبان بالعكس دي واحده من اهم مميزاتها انها هتحسسك بفرق حقيقي في توافر العمله الاجنبيه ووفقا للي قالوا رئيس الحكومه ووعد بيه النهارده ان الانتعاش الاقتصاديه اللي هتوفرها الصفقات دي هتحسن الوضع الاقتصادي لدرجه انها هتعمل توفير كبير في فرص العمل وتقليل لنسب ومعدلات البطاله في وقت قياسي
