حكاية الـ 8 مليار دولار وبداية تأسيس مصر الأوروبية
إيه حقيقة الارقام اللي كشفتها وزارة الاتصالات النهاردة وإزاي مصر قدرت تحقق المعجزة في الشركات الناشئة وإزاي الاقتصاد المصري هيجري بسرعة الصاروخ بعد انتهاء أزمات الدولار واسعار الصرف والتضخم.. تعالوا معانا هنعرف كل حاجة.
النهاردة مستشار وزير الاتصالات وتكنولوجيا المعلومات للإبداع التكنولوجي وصناعة الإلكترونيات والتدريب، الدكتور حسام عثمان، كشف أرقام خطيرة جدا بتورينا ملامح الاقتصاد المصري ورايح على فين وإزاي مصر اقتحمت مجالات التكنولوجيا بشركات ناشئة بتمهد لدخول مصر أخطر وأهم قطاع اقتصادي في العالم دلوقتي وهي تكنواوجيا الاتصال والبرمجة والمعلومات والذكاء الاصطناعي وهو الاقتصاد الجديد اللي دلوقتي أمريكا وأوربا داخلة في حرب شرسة مع الصين والهند بسببه ومن الأخر اللي هيملك شركات تكنولوجيا المعلومات هو اللي هيتحكم في اقتصاد العالم.
المهم المسؤول كشف إن قيمة الشركات الناشئة الموجودة في مصر وصلت 8.3 مليار دولار، وإن حجم التمويل الداخل للشركات الناشئة السنة اللي فاتت بس هو 500 مليون دولار وهو معدل اقل من بعض السنوات السابقة نتيجة لبعض الظروف ومستهدف زيادته في السنوات المقبلة.
مصر دلوقتي فيها 66 شركة ناشئة في مجال النظم المدمجة وأشباه المواصلات بتضم 8000 موظف ووصلت صادراتها حوالي 500 مليون دولار ومستهدف توصل صادرتها إلى 1.5 مليار دولار سنويًا، وركز معانا في الأرقام، واللي خلت المسئول يقول حاجة خطيرة جدا بتأكد الحرب اللي في المنطقة على الشركات الناشئة لما قال إن شركات التكنولوجيا والنظم اللي في مصر كل يوم بيجيلها عروض لنقل مقرتها من مصر لدول تانية ودا لأن زي ماقلنا إن الاقتصاد الرقمي الجديد هو مستقبل الاقتصاد العالمي واللي يملكه هيدخل في قايمة الكبار وعارف حضرتك يعني إيه مصر تصدر بـ1 ونص مليار دولار نظم معلومات وبرامج ومن غير وشحن وتفريغ وتصنيع دا معناه مؤشر خطر جدا على الدول اللي حولينا لأن شركات النظم التكنولوجية دي بتقوم على العقل والفكر والبرامج وتكنولوجيا الاتصالات الجديدة ودي حكر على دول كبيرة لكن مصر قدرت تكسر القاعدة دي وبعقول أولادها وهتبقى زي أوروبا وأكتر في الاقتصاد إذا نجحت في تأسيس قطاع قوي في مجال النظم والتكنولوجيا..
لو فاكرين من كام سنة الرئيس السيسي انتبه لاقتصاد تكنولو جيا المعلومات وقال إن هي دي المستقبل ولازم الدولة تخرج شباب متخصيين في المجالات الجديدة وقد حصل والنهاردة مصر عملت مبادرات كتير جدا وخرجت بالفعل كوادر ممتازة وعبقرية في مجال الشركات الناشئة وتكنولوجيا النظم والمعلومات وإنه تم تخريج 35.4 ألف فريلانسر في مجالات متعددة يحققون دخل بقيمة 176.5 مليون دولار سنويًا ولسه مصر على أول الطريق والمبشر في الموضوع إن مصر فيها عباقرة في مجال نظم المعلومات وعلماء رفيعي المستوى ولو مسكنا في الاقتصاد الجديد محدش هيلحقنا ومصر ولادة.
