السيسي قال كل حاجة.. حكاية الصندوق ونزيف المليارات وأزمات مكنتش على البال

ايه اللي كان يقصده الرئيس السيسي من كلامه النهاردة في مؤتمر الطاقة، وإزاي الرئيس كشف كل حاجة عشان الناس تفهم اللي بيحصل حولينا.. تعاولو نشوف السيسي قال إيه
 

النهاردة الرئيس عبد الفتاح السيسي افتتح معرض ومؤتمر الطاقة الدولي والحقيقة كانت فرصة إن الرئيس يشرح للناس اللي بيحصل في البلد وحولينا والظروف الصعبىة اللي بتحاصر الاقتصاد المصري وكانت بداية كلام الرئيس عن اللي بيحصل على الحدود المصرية والصراع في غزة وإزإي إن مصر خسرت نص ايرادات قناة السويس وفي وقت الاقتصاد والبلد فيها أزمة نقص دولار لكن الرئيس قال عن تأثير الأوضاع فى قطاع غزة على الدولة المصرية، وقال شايفين الممر الملاحي اللى كان بيجيب لمصر 10 مليار دولار في السنة وتراجع بنسبة 40 – 50 % والمفروض الدولة لها التزامات وشراكات تنمية وتمويل.. أنا مش بشتكي لكن بقولكم إن الدولة المصرية حريصة على تنفيذ التعهدات رغم أزمة الدولار ودا بيلمح إن الدولة عاملة حسابها لأسوأ الظروف في أزمة الدولار حتى لو وقفت قناة السويس خالص بفعل الظروف الحالية وده بيأكد بردو إن ازمة الدولار فيه دولة وحكومة وبنك مركزي مسيطرين عليها.

السيسي اتكلم كمان عن نزيف المليارات في عصر مبارك ومقالش اسم مبارك صراحة عشان الرئيس مش معروف عنه بيهاجم الرؤساء اللي قبله بالاسم أو لشحصه لكن بيهاجم السياسات الغلط في عصرهم واللي كانت السبب في تأخر مصر سنين طويلة وضياع فرص عظيمة كان ممكن استغلالها لولا سوء الادارة والتخطيط وتعطل الفكر في الأنظمة السابقة واللي كانت عايشة اليوم بيومه ومفيش خطط للمستقبل وده ضيع على مصر حاجات كتير كانت ممكن تتعمل.

وقال السيسي كنا فين وبقينا فين لما الدولة المصرية كانت بتفقد ما يقرب من 9 - 10 مليار دولار كل سنة نتيجة سوء البنية الأساسية وحالة الطرق، وكان يقصد طبعا المسؤولين اللي قبل منه والرئيس قال إنه خلال 7 سنوات اقدر أقول بمنتهي التواضع وخلي بالك من كلمة منتهى التواضع يعني الموضوع مقصود بيه تنمية البلد مش التفاخر رغم إن اللي حصل في قطاع البنية التحتية معجزة بالنسبة لحجم الانجاز والوقت الزمني في تنفيذها وقال الرئيس  قدرنا نتغلب على المشكلة دي لكن صرفنا فلوس ضخمة جدا، ولولا مشروعات البنية التحتية العملاقة كان زمانا بنعاني اكتر واكتر لأن مفيش نهضة وتنمية واستثمار من غير بنية أساسية

السيسي منسيش يوجه رسالة قوية في كلمته لصندوق النقد الدولي ومؤسسات التمويل وقال الرئيس في نص كلامه " يا تري هل مؤسسات التمويل شايفة اللى إحنا بنعمله.. وهل عندها استعداد لتقديم تمويل منخفض التكلفة لمتابعة التعهدات.. ده سؤال بطرحه وينطبق على مصر وأفريقيا، وأنا بتكلم عن الناس اللى اقتصادها صعب.. التمويل اللازم للاقتصادات المتواضعة والصعبة وكان تلميح الرئيس عن الشروط الصعبة اللي الصندوق وغيره من المؤسسات الدولية للتمويل بيفرضها على الدول وزي ما احنا عارفين إن مصر داخلة في تفاوض من سنة تقريبا على استكمال قرض بـ3 مليار دولار رغم قدرة مصر على السداد بشهادة الصندوق نفسه وبنوك عالمية لكن الصندوق حاطط شروط صعبة منها تعويم الجنيه والغاء الدعم ودي الشروط الصعبة اللي اتكلم عليها وقال إن المؤسسات دي لازم تغير طريقتها في التعامل مع الدول والأساس في الاقتراض هي قدرة الدولة المقترضة على سداد القرض والفوايد وخدمة الدين من غير أي فلسفة أو التدخل في الخطط الاقتصادية للدول.