رسالة الشعب لمصيلحي جرس إنذار للحكومة والتجار.. إيه اللي حصل في معرض أهلا رمضان
هو ايه اللي حصل في معرض أهلا رمضان في شبرا الخيمة وايه الرسالة اللي الشعب وصلها لوزير التموين والحكومة وليه الشعب جاب آخره من الوزير.. تفاصيل كتير هنعرفها مع بعض.. خليكم معانا لآخر الفيديو
امبارح وزير التموين على المصيلحي افتتح معرض أهلا رمضان ولكن اللي حصل كان مفاجأة وصدمة للوزير بعد ما الناس هاجت وغضبت في وشه واشتكوا من جشع التجار وازاي الوزارة سيباهم وطلقاهم على الشعب وإزاي الوزارة سايبة التجار تبيع على مزاجها وترفع في الأسعار من غير محاسبة وقالوله فين أجهزة الوزارة الرقابية من اللي بيحصل في الأسواق وازاي الفساد يا سيادة الوزير يوصل لمكتبك بعد ما اتقبض على المستشار بتاعك ومعاه شبكة وعصابة من أصحاب المصانع والشركات وكانوا بيحبسوا السلع المدعمة عشان يعطشوا السوق.. وألف سؤال وسؤال للوزير معرفش يرد عليها غير باجابات ركيكة الناس مصدقتهاش لأنها سمعتها كتير قبل كده.
اللي حصل في معرض أهلا رمضان امبارح جرس إنذار للحكومة كلها مش لوزير التموين بس.. الناس على آخرها يادكتور مدبولي والناس مكنتش هتزعل لو الزيادة في الأسعار كانت منطقية أو غصب عن التجار لكن الناس غضبت عشان الزيادات سببها جشع التجار وطمعهم وتكوين ثروات على حسابهم وكل تصريحات مسؤولي الشعب التجارية بتقول ده وبتتهم التجار بالجشع والمبالغة برفع الأسعار بحجة ارتفاع أسعار الدولار رغم إن فيه سلع كتير ملهاش علاقه بالدولار والدولة بتنتجها وعندها اكتفاء ذاتي منها زي اللي حصل كده في السكر والسجاير والأرز وده دليل على أن الأزمات مفتعلة لصالح حيتان كل همها المكسب وبيقول كمان إن الناس دي مسنودة بدليل عصابة المستشار اللي اتقبض عليها وكشفت إزاي الأمور بتم في الأسواق.
المطلوب وبشكل عاجل أن الدولة والحكومة تدخل بسرعة وحسم للسيطرة على الأسواق ومحاسبة تجار الأزمات لأن اللي بيحصل ده تعب الناس جدا والوزير سمع بنفسه امبارح غضب الناس وشكوتهم ويا إما يتصرف ويسيطر على الأسعار يا إما يعتذر ويجي حد تاني اقوى منه يحكم الأسواق وده مش عيب لو طاقة الوزير نفدت ويجي حد غيره وفي ماتشات الكورة اللاعب اللي بيتعب أو يقصر بيتبدل وينزل واحد غيره يغير النتيجة والأداء والناس صبرت بما فيه الكفاية على وزير التموين ولازم يتبدل يا حسن أدائه وأداء وزارته.
ماننكرش إن فيه حملات ضخمة على الأسواق في الفترة الأخيرة لكن ده مش كفاية لأن التجار الكبار مخزنين السلع في أماكن بعيدة عن محلاتهم وكل الحملات بتروح المحلات ومش بتلاقي حاجة، لازم يكون فيه معلومات دقيقة عن المخازن دي والتجار يتسألو جابوا بضاعتهم منين وكله يتحاسب من أول صاحب المصنع وتاجر الجملة والتوزيع لغاية البقال ولازم التجار يحسوا إنه فيه رقابة ويد من حديد ولازم ده يحصل قبل رمضان وإلا الأزمة هتزيد ومعارض مصيلحي مش هتعمل حاجة لملايين المصريين اللي الأسعار حرقت جيوبهم وقلوبهم.
