ارتباك كبير في سوق الدهب.. يا ترى الأسعار رايحة على فين؟

يا ترى ايه اللى بيحصل فى سوق الدهب فى مصر؟ وليه كل فترة محلات الصاغة بتتوقف عن اعلان اسعار البيع والشراء؟ وازاى رغم التراجع فى سعر الدولار سعر جرام الدهب بيزيد بشكل يومي؟ وايه توقعات اسعار الدهب الفترة الجاية؟

على الرغم من الهدوء اللى بيسيطر على سوق الصرف وتراجع سعر الدولار بالسوق السودا خلال اخر اسبوعين الا ان في المقابل بيعيشسوق الدهب في مصر حالة من الارتباك، مع توقف بعض المحلات عن الاعلان أسعار البيع والشراء.. حالة الارتباك دي كان من أسبابها الانهيار الكبير اللى حصل فى سعر دولار السوق السودا وتراجعه بشكل ملحوظ بعد قرار البنك المركزي برفع اسعار الفايدة 2% فى ازول اجتماع للجنة السياسة النقدية فى 2024.

وتراجع سعر جرام الدهب عيار 21 الأكثر تداولاً في السوق المصرية من مستوى يتجاوز 4000 جنيه إلى حدود 3400 جنيه لكنه عاود الصعود إلى نحو 3650 جنيه في التعاملات الأخيرة.. واستقر سعر الجرام عيار 24 عند مستوى 4171 جنيه  وسجل الجرام عيار 18 مستوى 3128 جنيه وبلغ سعر اجرام عيار 14 نحو 2433 جنيه واستقر سعر الجنيه الدهب عند مستوى 29200 جنيه.

وفي تصريحات رسمية كشف مستشار وزير التموين لشؤون صناعة الذهب، ناجي فرج، أن سوق الدهب في مصر بيشهد حالة من التذبذب وعدم الاستقرار مع اتجاه الأسعار إلى التراجع سواء على الصعيد المحلي أو العالمي بعد ما فقدت أونصة الذهب في البورصات العالمية حوالى27 دولار في التعاملات الأخيرة.

وفى محاولة لوقف جنون الدهب اقترح مستشار وزير التموين لشؤون صناعة الذهب  بعض الأفكار اللى ممكن تساهم في السيطرة على سوق الذهب ومنها  طرح شهادات بعائد يصل إلى 30% في البنوك لأن التضخم أعلى من النسبة دي بكتيروقال ان وجود شهادات مرتفعة العائد هيكون ليه دور واضح في ضبط الأسواق بالاضافة كمان الى إلغاء الرسوم على واردات الذهب من الخارج والمقتنيات الثمينة.

طب ايه توقعات اسعار الدهب الايام الجاي؟

بص يا سيدي.. عالميا الدهب سعره بيتراجع مع اتجاره الفيدرالى الأمريكي لتخفيف سياسته التشددية فيما يتعلق بمواجهة التضخم كمان فيه حالة من حالات التشبع بالدهب فى السوق العالمي لكن فى مصر الوضع مختلف والموضوع كله مرتبط بشكل واضح وصريح باللى بيحصل فى السوق السودا للدولار واللى بيكون ليها انعكاسات مباشرة على اسعار المعدن النفيس وكلنا شفنا لما الدولار فى السوق السودا وصل الى اكتر من 70 جنيه ازاى سعر جرام الدهب تخطى ال 4 الاف جنيه

ايوه يعنى نبيع ولا نشترى ؟

محدش يقدر حاليا يقولك تبيع الدهب ولا تشتريه لأن السوق مرتبكة والاوضاع مش مستقرة خالص لكن النصيحة العامة اوعا تحط كل مدخراتك فى استثمار واحد سواء كان دهب او عقارات او شهادات الاستثمارات حاول تنوع محفظتك الاستثمارية وتشتري شهادات ودهب ولو معاك فلوس زيادة تشترى عقارات كمان.