توجيهات رئاسية في ملف الدولار.. وقفزة في احتياطي الدهب المصري.. ومليارات الدولارت جاية من الطروحات

متابعينا الكرام في كل مكان أهلا وسهلا بكم وتحليل  جديد لأهم التقارير اللي قدمتها وحدة أبحاث بانكير النهاردة التلات 13 فبراير 2024.

البداية مع تقرير مهم جدا تحت عنوان ضربة بريكس القاتلة والأيام الأخيرة للدولار

وقال التقرير إنه فيه تحركات قوية بتقودها روسيا والصين فى الشهور الأخيرة لانهاء هيمنة الدولار على التجارة العالمية وعلى احتياطيات البنوك المركزية .
وأضاف التقرير إنه فيه خطوات جدية بدأت تحصل على الأرض بتهدد هيمنة وسيطرة العملة الامريكية على العالم. وفى شهر اغسطس اللى فات كان فيه اجتماع مهم جدا لتجمع بريكس فى العاصمة الجنوب افريقية وفى الاجتماع ده تم الموافقة على انضمام 5 دول جديدة كأعضاء فى التجمع من ضمنهم مصر والسعودية والامارات والخطوة دي تمت فى اطار مساعة لتقوية نفوذ التجمع اللى بيسيطر على حوالى 30% من حجم الناتج العالمي.

ومن خلال التجمع ده بتسعى روسيا ومعاها حلفاء مهمين زي الصين الى توجيه ضربة قاتلة للدولار من خلال استحداث عملة جديدة هتكون بديلة للدولار وجارى حاليا دراسة المشروع بشكل مستفيض ومفصل مع كل الدول الاعضاء فى بريكس وسبق المشروع ده خطوات مهمة فى اتجاه انهاء هيمنة العملة الأمريكية على العالم كان من بينها تاسيس بنك التنمية الجديد للتمويل.

التقرير التالي اللي قدمته وحدة أبحاث بانكير كان بخصوص خطوات جديدة لإنهاء أزمة الدولار فى مصر..

وحسب تحليل وحدة أبحاث بانكير فى الفترة الأخيرة وتحديدا من حوالى شهر أو أكتر شوية ملف أزمة الدولار بقا بيخضع لاشراف شخصي من الرئيس السيسي واللي عقد اكتر من اجتماع مع الحكومة والمسئولين فى البنك المركزي بهدف الوصول الى حلول جذرية لأزمة شح الدولار.
وقال التقرير إنه صدرت تعليمات مشددة بوضع نهاية للفوضى الحاصلة فى سوق الصرف وتعدد سعر الدولار  وبالفعل الحكومة والبنك المركزي اتحركوا بسرعة جدا وحطوا خطة من 5 بنود مع نهاية تنفيذها مصر هتتخلص من كابوس الدولار وهتقضي على السوق السودا تماما ونهائيا

البنود عبارة عن حملات أمنية مكبرة لملاحقة تجار العملة والمضاربين على الدولار وتااني حاجة تعزيز موارد النقد الأجنبي وده هيتم بالتعاون بين كل الجهات المعنية وفيه خطة لتعظيم عوائد الدولار والبند التالت فى خطة المركزي هيعتمد بشكل كبير على طرح اوعية ادخارية جاذبة للمصريين  بالاضافة لاطلاق مؤشر الجنيه وأخيرا طرح الجنيه الرقمي اللى البنك المركزي شغال عليه .

منصات بانكير قدمت تقرير بردو عن 6.5 مليار دولار هتنعش خزينة الحكومة

وقال التقرير إن وزير المالية محمد معيط أعلن ان الحكومة بتستهدف عوائد تصل إلى 6.5 مليار دولار من برنامج الطروحات الحكومية بنهاية  2024 بشكل يعزز قدرة الحكومة على تلبية الاحتياجات التمويلية.

وزير المالية اكد أن برنامج الطروحات هيساهم في جذب المزيد من التدفقات الاستثمارية الاجنبية، بهدف تعظيم دور القطاع الخاص في النشاط الاقتصادي، ورفع مشاركته في الاستثمارات العامة إلى 65% خلال السنين الجاية.

وقال أن الحكومة بتتعامل بسياسات أكتر توازنا وتحوطا، مع الأزمات الاقتصادية العالمية المتتالية بتداعياتها المتشابكة اللي تزايدت تعقيدا مع التوترات الجيوسياسية.

منصات بانكير قدمت كمان تقرير مهم جدا عن حدث هيقلب الموازين في البنك المركزي والمرة دي خاص بالدهب المصري

وشرح التقرير إن احتياطي البنك المركزي المصري بيتكون من سلة عملات دولية ودهب ومصر عندها احتياطي دهب ضخم احتلت بيه المركز التالت عالمياً بين الدول الأكتر نموا في زيادة احتياطي الدهب بعد ما زاد ل 126 طن تقريبا وإن الدهب في عرف البنوك المركزية يعني دولار يعني ببساطة قيمته بالدولار بتتحول لاحتياطي دولار.

وسلط التقرير الضوء على خطة مصرية طموحة لزيادة الاستثمار في استخراج الدهب هتنقلها لحتة تانية خالص وطرحت مناقصات عالمية لاستخراج ملايين الاونصات من الدهب وفعلا اتقدمت شركات عالمية للمناقصات الجديدة.
التقرير كشف كمان إن البنك المركزي المصري استلم شحنات جديدة من الدهب من شركة شلاتين للثروة المعدنية التابعة لوزارة البترول المصرية وجهات حكومية تانية بحجم نص طن مرة واحدة، بمليار جنيه خلال النص التاني من 2023.

وكمان فيه توقعات رسمية بوصول إنتاج الدهب بالنصف الأول من 2024 إلى 550 كيلو جرام تانية بالتزامن مع خطط التنمية بمناطق امتياز الشركة ودا غير بدء تشغيل الإنتاج التجاري للدهب من موقع "إيقات" بجنوب مصر واللي بتقدر احتياطياته ب 1.2 مليون أونصة من الدهب.