مشروع العمر في البنك المركزي.. ايه حكاية الجنيه الرقمي اللي الحكومة أعلنت عنه

يا ترى ايه حكاية الجنيه الرقمى اللى البنك المركزي بيدرس اصداره خلال الفترة الجاية؟ وايه الهدف من اصداره؟ وازاى هيتم استخدامه وتداوله سواء فى الأسواق أو البنوك أو باقي القطاعات المالية؟ والأهم هو يعنى ايه جنيه رقمي وايه الفرق بينه وبين الجنيه العادي ؟ 
 

ظن ياعات كشف مركز المعلومات ودعم اتخاذ القرار بمجلس الوزراء المصري، أن البنك المركزي وضع خطة لإطلاق الجنيه الرقمي بحلول عام 2030 لـتعزيز القدرة التنافسية للعملة المصرية، وتحسين كفاءة وفعالية السياسة النقدية.

وبتتوافق الخطوة الجديدة مع التزام مصر بالاستفادة من فرص التحول الرقمي لدفع قطاعها المالي إلى الأمام

و إصدار "الجنيه الرقمي" هيتم  بالتعاون مع صندوق النقد والبنك الدوليين وده فى اطار خطط البنك المركزي لتعزيز التحول إلى الاقتصاد الرقمي وتوسيع نطاق المدفوعات الإلكترونية الفورية بين الأفراد والشركات دون الحاجة للوساطة.
طب ايه هو الجنيه الرقمي ده ؟ 
العملات الرقمية للبنوك المركزية عموما زي "الجنيه الرقمي" بتكون عبارة عن نسخ رقمية من النقود الورقية اللى بتصدرها البنوك المركزية وبتنظم العمل بيها ودي بتكون عملات مستقرة زيها زي العملة الورقية او المعدنية مش متقلبة زي العملات المشفرة 
يعنى باختصار الجنيه الرقمي ده هيكون زيه زي الجنيه العادي الفرق الوحيد ان تداول الجنيه الرقمي هيكون فى المعاملات والمدفوعات الالكترونية يعنى مش هيكون عملة تتمسك فى الايد ولكن عملة ليها قيمة مماثلة لقيمة الجنيه والقيمة دي هتكون قيمة اسمية فى حساب العميل يقدر يشترى بيها احتياجاته. 
طب الجنيه الرقمي هيتم استخدامه ازاى؟

"الجنيه الرقمي" هيُتاح استخدامه عبر "أجهزة الموبايل في التحويلات والتجارة وتبادل الأموال بين الأفراد والمؤسسات، وهيعمل على تقليل إصدار العملات الورقية ولسه الدراسات شغالة على تطوير الفكرة وتعظيم الاستفادة منها وتوسيع استخداماتها

وبكده هينضم الجنيه إلى أكتر من 100 عملة رقمية صادرة عن بنوك مركزية بتمر حاليا بمرحلة البحث أو التطوير، وفيه عملتين صدروا بشكل رسمي هم عملة نيمارا في نيجيريا، اللى أُصدرت في أكتوبر 2021 و"ساند دولار" في جزر البهاما، اللي ظهر لأول مرة في أكتوبر 2020، بحسب بيانات صندوق النقد الدولي. 
ومن الدول اللى أعلنت مؤخرا عن اصدار عملات رقمية من عملتها الوطنية دولة الامارات العربية الشقيقة اللي أعلنت عن استراتيجية لإطلاق عملتها الرقمية وتعاقدت مع شركتين لتقديم خدمات البنية التحتية والتكنولوجية للمشروع
وإصدار العملة الرقمية في مصر بيأتي ضمن خطة حكومية شاملة لزيادة الشمول المالي وتوسيع نطاق المدفوعات الإلكترونية وكان من ضمن المشروع ده اطلاق الدولة شبكة المدفوعات اللحظية في مارس 2022 وهي منظومة وطنية تربط كافة البنوك العاملة داخل مصر ببنية تحتية رقمية واحدة من خلال تطبيق "إنستا باي" على الموبايل واللى بيربط بين الحسابات لدى البنوك المختلفة ويتيح التحويل اللحظي بينها وبين بعضها فى لحظات معدودة من غير العميل ما يحتاج يروح بنوك ولا يقف فى طوابير ولا يعطل مصالحه.

ووفقا لاخر بيانات صادرة عن البنك المركزي قفز عدد عملاء "إنستا باي" 71% خلال آخر 5 أشهر ووصل إلى 6.5 مليون عميل في نوفمبر الجاري مقارنةً مع 3.8 مليون عميل في يونيو اللى فات وبلغ حجم المعاملات 650 مليار جنيه ويبُتوقع وصولها إلى 800 مليار جنيه بنهاية ديسمبر الجاي .
وفي يونيو اللى فات أكدت كريستالينا جورحييفا، المدير العام لصندوق النقد الدولي على أهمية العملات الرقمية للبنوك المركزية في توفير تكلفة التحويلات المالية عبر الحدود وتعزيز مرونة وكفاءة أنظمة الدفع وده خلا الصندوق يعمل على تطوير منصة عالمية للعملات الرقمية بين البنوك المركزية عبر الحدود لمواجهة المخاطر المرتبطة بالتحول الرقمي .
وحذرت مدير صندوق النقد من ان التأخر عن ملاحقة ركب العملات المشفرة من خلال البنوك المركزية هيضيّع فرص مالية عظيمة وبينذر بمخاطر أكبر على مستقبل الدول وبنوكها المركزية وعملاتها الوطنية ".