صفقة الدولار الكبرى.. اعتراف رسمي ومفاجأة هتقلب الموازين

يا ترى ايه تفاصيل صفقة الدولار الكبرى اللي هتقضى على السوق السودا للدولار فى مصر؟ وليه الحكومة اتأخرت فى الاعتراف بالمفاوضات اللى شغالة فى واحد من أكبر المشروعات ؟ وايه المفاجأة اللى ممكن تقلب الموازين فى سوق صرف العملات الأجنبية؟

في أول تأكيد رسمي من الحكومة المصرية حوالين مشروع رأس الحكمة بمرسى مطروح  أكد رئيس هيئة الاستثمار حسام هيبة بدء الاستثمار في المشروع خلال الفترة الجاية.. وأعلن ان الحكومة تلقت عروض من عدة تحالفات استثمارية دولية وتم اختيار تحالف اماراتي لتنفيذ المشروع اللى الاستثمارت فيه وفقا لرئيس هيئة الاستثمار هتتخطى ال 22 مليار دولار لكن مش هيتم ضخهم مرة واحدة

ووفقا للمفاوضات اللى قاربت على الانتهاء بين الحكومة المصرية والمستثمرين الامارتيين فالتحالف الإماراتي هيكون مسؤول عن تمويل وتطوير وإدارة المشروع

وحاليا بيتم تجهيز العقود بعد الوصول الى شبه اتفاق نهائي بين الطرفين وباقي بعض الرتوش البسيطة اللى هيتم الانتهاء منها خلال الأيام الجاية.

والمشروع بيأتي في إطار تطوير منطقة الساحل الشمالي وهيكون نموذجاً لمشروعات تانية كتيرة هتتم على ارض مصر.

ووفقا للمعلومات اللى عندنا فالمخطط الجديد لمدينة رأس الحكمة بيتضمن أن المنطقة تبقا مقصد سياحي عالمي يتماشى مع الرؤية القومية والإقليمية لمنطقة الساحل الشمالي الغربي وده هينعكس على تحقيق مجموعة من الأهداف والغايات أهمها إنشاء مدينة سياحية بيئية مستدامة على البحر المتوسط تنافس مثيلاتها على المستوى العالمي مع تحقيق مجتمع حضري مستدام يتناغم مع طبيعة وخصائص الموقع وتوفير الأنشطة الاقتصادية الملائمة لخصائص المجتمع المحلي.

وبتمتد شواطئء منطقة رأس الحكمة من منطقة الضبعة في الكيلو 170 بطريق الساحل الشمالى الغربي وحتى الكيلو 220 بمدينة مطروح اللي بتبعد عنها 85 كم.

والمخطط الجديد للمنطقة الواعدة هيتم تنفيذه علي مساحة إجمالية تقدر بحوالي 199،7 كليو متر، وبحلول 2045 هيتم الانتهاء من تنفيذ وتنمية حوالي  142،9 كيلو متر من المساحة الإجمالية للمنطقة.

وخصصت الدولة 5،4 كيلو متر من المساحة الكلية لرأس الحكمة  لتكون منطقة مباني متعددة الاستخدمات والارتفاعات، بالاضافة الى إنشاء حوالي 10652 وحدة سكنية وبناء 50 فندق سياحي، بالاضافة الي تخصيص 7،3 كليو متر لإنشاء مجتمعات عمرانية متنوعة الأنشطة، يمكن طرحها علي القطاع الخاص للتنفيذ.

ورأس الحكمة، منطقة تابعة لمدينة مرسى مطروح بمحافظة مطروح،وبتشتهر بوجود عدة فنادق كبرى بجانب أنشطة مختلفة للسياحة.

وتوجد عدة فنادق تابعة لرجال أعمال وشركات كبرى في مصر منها مشروعات لشركات شهيرة قيد التنفيذ.

والدولة مهتمة جدا بتطوير منطقة رأس الحكمة لأن فيه أسباب كتير تخليها مؤهلة تكون مستقبل الاستثمار السياحى فى مصر أهها طريق فوكة الجديد وهو أحد المشروعات الضخمة اللي بتشارك فى إنشائه القوات المسلحة ليربط بين القاهرة والساحل الشمالى، وبتبلغ المسافة من القاهرة إلى العلمين من خلال طريق فوكة الجديد حوالى 140 كيلو بعد ما كان الطريق القديم حوالى 240 كيلو من القاهرة إلى مدخل طريق العلمين من خلال طريق القاهرة - الإسكندرية الصحراوى، ثم من طريق العلمين وحتى الساحل الشمالى والعلمين وهيوفر طريق فوكا الجديد مسافة كبيرة بين القاهرة ومطروح.