تفاصيل الصفقة الضخمة لحل أزمة الدولار.. ضربة الموت للسوق السوداء

في آخر 6 شهور مفيش حاجة شاغلة القايدة السياسية فى البلد قد أزمة الدولار.. والرئيس السيسي بنفسه طلع من كام يوم واتكلم وقال انه لو قدر يحل الأزمة دي مفيش حاجة هتقف قصاده.. وده لأن نقص العملة الأجنبية فعلا ليه تأثير ضخم وخطير على كل مناحي الحياة فى مصر.. وعشان كده الفترة الجاية فيه صفقة هتقلب الموازين وهتخلى مصر تقدر تعبر واحدة من أخطر الزمات فى تاريخها.. فيا ترى ايه الصفقة دي ؟ وهتدخل كام مليار دولار للبلد ؟

الدولة خدت خطوات قوية فى الكام يوم اللى فاتوا فى ملف العملة الصعبة وفيه انفراجة كبيرة هتحصل الايام الجاية فى أزمة نقص الدولار من خلال مجموعة من الصفقات اللى هتبرمها الحكومة مع مستثمرين أجانب فى قطاع العقارات والسياحة والتصنيع.

وأول صفقة هتخلصها الحكومة ومتوقع تدخل أكتار من 20 مليار دولار هي طرح مجموعة منتجعات فى منطقة راس الحكمة للاستثمار والمشروعا دي هتكون بنظام حق الانتفاقع بالشراكة مع مستثمرين عرب وأجانب

وخد بالك حتى لو حصلت اتفاقيات مستقبلا للاستثمار فى المنطقة دي مش هيكون فيه بيع لشبر واحد من الأرض وكل اللى ممكن يحصل انه يكون فيه شراكات مع مستثمرين عرب او أجانب وكل المشروعات اقصى حاجة ممكن تحصل فيها انها تكون بحق انتفاع لمدد زمنية محددة ومصر هتستفيد من ده انها هتطور مناطق سياحية جديدة وهتضيف ليها شواطئء جديدة من غير ما تدفع ولا مليم وده الاستثمار الصح

والمخطط الجديد لمدينة رأس الحكمة بيتضمن أن المنطقة تبقا مقصد سياحي عالمي يتماشى مع الرؤية القومية والإقليمية لمنطقة الساحل الشمالي الغربي وده هينعكس على تحقيق مجموعة من الأهداف والغايات أهمها إنشاء مدينة سياحية بيئية مستدامة على البحر المتوسط تنافس مثيلاتها على المستوى العالمي مع تحقيق مجتمع حضري مستدام يتناغم مع طبيعة وخصائص الموقع وتوفير الأنشطة الاقتصادية الملائمة لخصائص المجتمع المحلي.

وبتمتد شواطئء منطقة رأس الحكمة من منطقة الضبعة في الكيلو 170 بطريق الساحل الشمالى الغربي وحتى الكيلو 220 بمدينة مطروح اللي بتبعد عنها 85 كم.

طب هل دي الصفقة الوحيدة اللى هتحل أزمة الدولار فى مصر؟

لا طبعا فيه صفقات تانية كتير وملف الطروحات الحكومية بيشمل أكتر من 30 شركة منها بنوك كبرى هيتم طرحها للاكتتاب سواء من مستثمر استراتيجي أو حتى طرح عام فى البورصة والشركات دي هتدخل عملة صعبة بحوالى 40 مليار دولار على 4 سنين بواقع 10 مليار فى السنة ووفقا للأرقام الرسمية المعلنة من الحكومة المصرية.

طب الشركات دي هتتباع خالص ؟

اه فى ملف الطروحات الدولة ووفقا لاتفاقها مع صندوق النقد هتتخارج من عدد كبير من النشاطات لصالح القطاع الخاص اللى المفروض مساهمته فى الناتج المحلى تتضاعف خلال الايام الجاية

وايه كمان ممكن الدولة تعملوا لحل أزمة الدولار؟

فيه اهتمام كبير بتحويلات المصريين فى الخارج وفيه خطة لاعادة ثقة المغتربين فى القطاع المصرفي من جديد وهيكون فيه شهادات بالدولار بعائد مرتفع ومزايا ضخمة للمصريين فى الخارج

وايه تاني هيحصل فى الملف ده ؟

فيه كمان حوالى 7 مليار دولار هييجوا من صندوق النقد بعد الاتفاق على رفع قيمة القرض من 3 الى 10 مليار دولار وده هيزود المعروض وهيقلل الطلب على العملة

وكل الأخبار دي كان ليها تاثير ايجابي على سعر دولار السوق السودا اللى تراجع بشكل ملحوظ فى الساعات الأخيرة وهبط الى 55 جنيه بعد ما كان وصل الى 73 جنيه وفيه توقعات بمزيد من الهبوط الايام الجاية