إيه اللى بيحصل في “رأس الحكمة”؟ وهل فعلا الامارات دفعت 22 مليار دولار لشراء المدينة؟
يا ترى ايه اللى بيحصل بالظبط فى مدينة رأس الحكمة فى الساحل الشمالي؟ وايه حكاية بيع منتجعات المدينة بالكامل ؟ وهل فعلا الامارات دفعت 22 مليار دولار عشان تستحوذ على راس الحكمة؟ ولو ده حقيقي ليه الحكومة ما أعلنتش عن ده بشكل واضح وصريح؟
في آخر كام يوم مفيش كلام ولا سيرة الا عن مدينة راس الحكمة اللى بتقع على الساحل الشمالي لمصر .. واللى يقولك الحق الدولة بتبيع البلد .. واللى يقولك يا عم دي الامارات مش هتخلى حاجة فى مصر الا لما تشتريها وكلام كتير ماشي فى البلد كلها .. فيا ترى ايه حقيقة الموضوع وايه اللى بيحصل أصلا فى راس الحكمة وليه فجأة بقت محل اهتمام الناس وفين الحكومة من الاخبار المنتشرة دي.
بص يا سيدي من كام يوم احدى الصحف الخاصة نشرت خبر وقالت إن تحالف شركات إماراتية يتبع إمارة أبوظبي اتفق مع الحكومة المصرية على شراء أرض في مدينة رأس الحكمة في الساحل الشمالي الغربي لإقامة مشروع باستثمارات تتجاوز الـ 22 مليار دولار وقالت ان توقيع الصفقة الكبرى هيتم نهاية الاسبوع ده على أقصى تقدير بعدما تم الاتفاق بين الجانبين على أن يتم ضخ الاستثمارات بصورة فورية.
لحد هنا والكلام عادي وطبيعي مصر عاوز تستقدم استثمارات أجنبية مباشرة لحل أزمة نقص الهملة والامارات زيها زي غيرها من الدول بتدور على أفضل فرص الاستثمار المتاحة وبتقتنصها.. أما ايه اللى حصل وليه الموضوع اتحول من استثمارات وتطوير منطقة من أهم مناطق مصر الى كلام عن بيع البلعد وسيطرة الامارات على أراضى مصر والكلام الكتير اللى يخو ويخض ده؟
فيه ناس كتير طبعا بتحب تصطاد فى الميه العكرة وتبوظ أى خطط أو مشروعات أو افكار جديدة لحل أزمة الدولار الخانقة بكلام كبير يخلى الناس اللى مش عارفة ولا فاهمة استثمار تتصور ان الحكومة هتبيع البلد رغم ان اى حد لو ركز هيلاقي ان منطقة راس الحكمة كل المشروعات اللى هتتعمل فيها مشروعات حق انتفاع
حد هيسأل ويقول يعنى ايه حق انتفاع ؟
حق الانتفاع ده يا سيدي حاجة مشهورة وسائدة فى الاقتصاد والاستثمار ومعناه ببساطة ان الدولة بتكون عاوزة تتطور منطقة ومش معاه السيولة الكافية لده فتجيب مستثمر تمضى معاه عقد او اتفاقية انه يطور المشروع من غير ما تدفع هي ولا مليم وكمان بتاخد فلوس كتيرة ماقبل انه ينتفع بالمشروع لفترة زمنية بتكون محددة يعنى الموضوع مش مفتوح على البحري
طب هل ده اللى حصل فى موضوع الامارات ؟
ووفقا لكلام الحكومة فلحد دلوقتى مفيش أصلا أى اتفاقات تمت على مشروعات راس الحكمة لا مع الاماراتيين ولا مع غيرهم وكل اللى بيتقال لحد دلوقتي كلام مرسل ومالوش اى اساس على ارض الواقع لأن منطقة رأس الحكمة كلها ما زالت قيد التخطيط ولا مفيش أي اتفاقات أو تعاقدات عليها في الوقت الحالي.
ووفقا للمعلومات المتاحة فالمخطط الجديد لمدينة رأس الحكمة بيتضمن أن المنطقة تبقا مقصد سياحي عالمي يتماشى مع الرؤية القومية والإقليمية لمنطقة الساحل الشمالي الغربي وده هينعكس على تحقيق مجموعة من الأهداف والغايات أهمها إنشاء مدينة سياحية بيئية مستدامة على البحر المتوسط تنافس مثيلاتها على المستوى العالمي مع تحقيق مجتمع حضري مستدام يتناغم مع طبيعة وخصائص الموقع وتوفير الأنشطة الاقتصادية الملائمة لخصائص المجتمع المحلي.
وبتمتد شواطئء منطقة رأس الحكمة من منطقة الضبعة في الكيلو 170 بطريق الساحل الشمالى الغربي وحتى الكيلو 220 بمدينة مطروح اللي بتبعد عنها 85 كم.
والمخطط الجديد للمنطقة الواعدة هيتم تنفيذه علي مساحة إجمالية تقدر بحوالي 199،7 كليو متر، وبحلول 2045 هيتم الانتهاء من تنفيذ وتنمية حوالي 142،9 كيلو متر من المساحة الإجمالية للمنطقة.
وخصصت الدولة 5،4 كيلو متر من المساحة الكلية لرأس الحكمة لتكون منطقة مباني متعددة الاستخدمات والارتفاعات، بالاضافة الى إنشاء حوالي 10652 وحدة سكنية وبناء 50 فندق سياحي، بالاضافة الي تخصيص 7،3 كليو متر لإنشاء مجتمعات عمرانية متنوعة الأنشطة، يمكن طرحها علي القطاع الخاص للتنفيذ.
ورأس الحكمة، منطقة تابعة لمدينة مرسى مطروح بمحافظة مطروح،وبتشتهر بوجود عدة فنادق كبرى بجانب أنشطة مختلفة للسياحة.
