السكر فين يا مصيلحي.. تعجيل التشكيل الوزاري أمام الرىئيس

ايه اللي بيحصل في السوق والسكر اختفي فين بقدرة قادر وازاي الوزير لسه قاعد في منصبه وازاي بقت الحكومة الحالية حمل على الدولة والرئيس وامتي التشكيل الوزاري.

اللي يحصل في سوق السكر وارتفاع أسعاره واختفاءه وبعدين رجوعه بالسلامة وبعدين رجع اختفي تاني وسعره وصل 50 جنيه تاني مش بيقول غير حاجة واحدة بس أن الوزير فشل في مهمته والكلام اللي سمعه في مجلس النواب كان يكفيه عشان يستقيل لكن ده محصلش واستمرت وزادت الأزمة في سوق السكر رغم تأكيد وزارة التموين ووزيرها مصيلحي إن مصر عندها انتاج ضخم من السكر يوصل للاكتفاء الذاتي لكن بردو السكر اختفي وده الحقيقة لغز كبير جدا وبيقول إن عندنا أزمة إدارة في وزارة التموين وأزمة ضمير في السوق لأن التجار رجعوا يحبسوا السكر عشان يعملوله سوق سودا خصوصي ودا عشان متوقعين يحصل تعويم والسعر يزيد وكل تاجر كبير يكسب كام مليون ويعمل ثروة من جيب المواطن والموظف الغلبان.

نرجع ونقول إن اللي بيحصل في الأسواق وارتفاع أسعار السلع بشكل غير مبرر إن التشكيل الوزاري بقي حتمي واكيد زي ما هو متوقع إنه يكون على مكتب الرئيس دلوقتي ومنعتقدش إن الرئيس السيسي هيستني لغاية بداية ولايته الجديدة في 3 ابريل اللي جاي عشان يكلف بتشكيل حكومة جديدة لأن الوضع بقي صعب في الأسواق واللي أزمات كتيرة فيها بسبب قلة المتابعة والرقابة واكيد الرئيس هيعجل بالتشكيل الوزاري عشان يحصل سيطرة على الأسواق من تاني ودا بيأكد كلامنا اللي قلناه قبل كده إن اسم رئيس الحكومة الجديد هيكون مفاجأة كبيرة وهيكون صارم وعنده رؤية إنه يبادر بمواجهة الأزمات بدل ما يسببها تخرج عن السيطرة زي اللي بيحصل في الحكومة الحالية.

حكومة الدكتور مصطفى مدبولي حاولت إنها تلاقي حلول كتيرة لازمة ارتفاع الأسعار واحتكار السلع لكن موصلتش لمرحلة تأثير في الأسواق والناس مشفتش تاجر جملة واحد مثلا احتكر سلعة واتقبض عليه وتمت مصادرة البضايع اللي عنده ولا حصلت قرارات قوية تخلي اي حد يتلاعب في السوق ويصعب على الناس حياتهم وخلينا متفقين أن نقطة ضعف حكومة مدبولي هي الرقابة على الأسواق