صادرات بملايين الدولارات.. ليه الدولة بتبني مفاعلات الضبعة النووية

قطع الكهرباء كانت ازمة كبيرة عانت منها مصر علي مدار سنوات قبل تولي الرئيس عبدالفتاح السيسي حكم البلاد وقت حكم جماعة الأخوان المحظورة للبلاد، وتقريبا الكهرباء مكانتش بتيجي غير ساعات محدودة في اليوم وباقي اليوم عايشين في الظلمة، الحال حاليا اتغير 180 درجة وبقينا بنصدر الكهرباء وخلاص هنشغل مصدر جديدة للكهرباء في 2028 بتشغيل اول مفاعل نووي لانتاج الطاقة الكهرذرية منخفضة الكربون في مصر.. يا تري اية حكاية مشروع الضبعة النووية العائدات بتاعتها علي مصر هتكون اية.. واية اللي هيحصل في الكهرباء مع تشغيل المفاعل الاول ومواعيد دخول باقي المفاعلات امتي.
 

النهاردة الرئيس عبدالفتاح السيسي ونظيره الروسي فلاديمير بوتين، هيشاركوا فى مراسم عملية الصبة الخرسانية الأولى اللى بتستخدم كأساس للوحدة النووية الرابعة من محطة الضبعة للطاقة النووية وهو واحد من اهم المشروعات اللي مصر وقعتها لانتاج الطاقة الكهرذرية بتكلفة استثمارية وصلت الي 25 مليار دولار قدمتها روسيا كقرض حكومي ميسر للقاهرة .

مشروع بناء وتشغيل مشروع الضبعة النوي ظهر مع زيارة الرئيس الروسي للقاهرة في ديسمبر 2017، ووقع الرئيس السيسي مع نظيره الروسي الاتفاقات النهائية لبناء محطة الضبعة وهتضم 4 مفاعلات من الجيل 3+ اللي بتشتغل بالماء المضغوط بطاقة 4800 ميجاواط بواقع 1200 ميجاواط لكل مفاعل، وهيبدا تشغيل اول مفاعل في 2028 وكل 6 اشهر هيتم تشغيل مفاعل اضافي حتي تشغيل الـ 4 مفاعلات بحلول 2030 .

طيب اية هيا مميزات الطاقة الكهربائية المولدة من المفاعلات النووية؟.
المحطات النووية هي أكبر مصدر للطاقة النظيفة وشغالة عي مدار 24 ساعة طوال ايام الاسبوع وبتتميز بقدرتها الإنتاجية الكبيرة في توليد الطاقة، وتوفير الآلاف من الأيدي العاملة في بناء وتشغيل المفاعلات، بالاضافة الي توفير كميات كبيرة من من البترول والغاز الطبيعي والمازوت المستخدم في تشغيل محطات توليد الكهرباء العادية واللي بيتم استيراده بملايين الدولارات، واعادة استخدامه في باقي الصناعات لزيادة معدلات التصنيع المحلي وترشيد فاتورة مصر الاستيرادية من الخارج.
طيب الاستفادة اللي هتعود علي مصر من مشروع كبير بالتكلفة دي علي مصر؟.
مصر حاليا بدأت تنفيذ المخطط الاستراتيجي للتحول الي مركز اقليمي لتبادل الطاقة، وبدأت فعلا في مشروعات الربط الكهرباء مع دول افريقيا من خلال خط كهرباء عن طريق السودان بقدرة 70 ميجاوات في البداية وهيتم زيادته لـ 3000 ميجاوات مستقبلا، ومشروعات للربط الكهربائي مع دول اسيا مع السعودية بطاقة اجمالية 3000 ميجاوات علي مرحلتين بأجمالي 1500 ميجاوات لكل مرحلة بتكلفة مليار و 600 مليون دولار تتحمل منهم مصر 10 مليار جنيه، ومشروعات للربط الكهربائي مع دول قارة اوروبا من خلال خط كهربائي هيمر تحت الماء مع ايطاليا، واخيرا الربط الكهربائي مع قبرص واليونان عبر جزيرة كريت، لتبادل الطاقة الكهربائية على الجهد العالي بقدرة 2000 ميجاوات .

الدكتور محمد شاكر وزير الكهرباء، قال ان مشروع المحطة النووية بالضبعة هيوفر 54 ألف فرصة عمل ممثلة في وظائف رهيئة المحطات النووية بشكل مباشر واخري بشكل غير مباشر من خلال المقاولون المنفذين للمشروع بأجمالي  3 آلاف فرصة عمل.
الدكتور شاكر اتكلم كمان علي ازمة سعر الصرف اللى بيمر بها العالم وتاثيرها علي مشروعات الطاقة المتجددة سواء الشمسية أو الرياح لتوليد الكهرباء، وقال ان مصر مش هتتأثر بأزمة الدولار العالمية بسبب ان الاستثمار في المجال ده بيكون بالدولار مش بالعملة المحلية خاصة، ومهما ارتفعت تكلفة استيراد مكونات محطات الطاقة المتجددة من شمس أو رياح هتكون اقل تكلفة في السنين اللي جاية مقارنة بمحطات توليد الكهرباء التقليدية اللى بتعتمد على الوقود.
وزير الكهرباء أكد كمان، أكد كمان أن مصر بتستهدف الوصول إلى 50% من الطاقة بحلول عام 2040 من مشروعات الطاقة المتجددة، من خلال بناء وتشغيل مشروعات الطاقة الجديدة، وان الدولة حطت خطة موسعة للتوسع في انتاج الطاقة الجديدة والمتجددة واستخدامها في مجالات انتاج الهيدروجين الأخضر ومستهدف الوصول الي مليون و 500 ألف طن سنويا بحلول عام 2030 بالاعتماد على 19 ألف ميجا وات من الطاقة المولدة من مشروعات الطاقة الشمسية والرياح، ومخطط الوصول لـ 5 مليون و 800 ألف طن سنويا بحلول 2040 بالاعتماد على ما يقرب من 72 ألف ميجا وات من الطاقات المتجددة وهيكون متاح للتصدير 3 مليون و 800 ألف طن سنويا، وده بيمثل 5% من سوق انتاج الهيدروجين الأخضر عالميًا وهتكون مصر الأعلى انتاجا للهيدروجين الأخضر في العالم.