شهادات جديدة بفايدة خرافية.. ومفيش تعويم والسوق السودا في خبر كان

النهاردة يوم الأخبار الحلوة واللي بتقول إن مصر في طريقها لعبور أخطر أزمة في تاريخها الاقتصادي الحديث.. ايه اللي حصل نهاردة في ملف الديون وايه حكاية الشهادات الادخارية الجديدة وايه حكاية البرلماني اللي أثار الجدل وأخبار تانية كتير خليكم معانا للأخر.

أول الحكاية في تسديد مصر لنص ديونها لصندوق النقد الدولي.. أيوا ه حقيقي وحصل .. بص يا سيدي ومن الآخر كدة مصر في عز الأزمات عمرها ما اتاخرت عن سداد اي قسط من اقساط ديونها..
بلغة الأرقام.. ديون مصر خلال العام المالي الحالي 2023/2024، وصلت إلى 29 مليار دولار..ومصر سددت 14.5 مليار دولار من الديون إلى صندوق النقد الدولي.. واللي فاضل حوالي 14.5 مليار دولار فقط من مديونية السنة المالية وهيتم دفعهم حتى شهر يونيو اللي جاي.
الحكاية التانية معانا النهاردة بخصوص اسماء وزراء الجديدة ..  وحسب معلومات حصل عليها بانكير أسماء الوزراء الجداد على مكتب الرئيس السيسي حالياً وان التعديل الوزاري قريب أووي.

كمان المعلومات اللي معانا بتقول إن في تغيير لمعظم وزارات الحقب الاقتصادية وده طبيعي لمتطلبات المرحلة وهنلاقي مفاجآت من العيار التقيل اووي واسماء بارزة وليها تاريخ كبير.. 
كمان هنلاقي تغيير كبير في الوزارات الخدمية.. وبمجرد موافقة الرئيس على قايمة المرشحين للتعديل الوزارى هيعقبها الإعلان عن التعديل والأسماء خلال الأيام القادمة.. وكمان هيكون في تغيير في السياسات والمنظومة كلها.

الحكاية التالتة النهاردة هس حكاية برلماني أثار الجدل بخصوص التعويم الرابع..

واللي حصل إن فيه كلام مهم جداً جداً طلع من برلماني بشأن التعويم الرابع.. الكلام ده مهم ولازم ياخذ في الاعتبار لانه طلع من مسؤل مش من خبراء..

البرلماني هو الدكتور فخري الفقي، رئيس لجنة الخطة والموازنة بمجلس النواب.. واللي قال إن التعويم الرابع مش هيتعمل إلا بتحقيق شرطين الأول توفير حصيلة كافية من النقد الأجنبي، والتاني احتواء ‏معدل التضخم.‏.

كمان البرلماني قال إن لازم توفير 5 مليار دولار كحد أدنى من النقد الأجنبي لفتح الاعتمادات المستندية للمستورين بالبنوك قبل خطوة البدء بتحرير سعر الصرف.. وإن التمويل الإضافي المحتمل من صندوق النقد الدولي هيوفر حصيلة مش بطالة..وعند توفير الحصيلة الدولارية، المستورد هيروح إلى البنك بدل من السوق الموازية، وبالتالي هيبدأ السعر بالسوق السوداء في التراجع تدريجيًا، مما سيصيب المضاربين بالذعر.

ومن بين الحكايات معانا النهاردة بخصوص مواجهة السوق السودا للدولار والكلام عن اجراء جديد في الأيام الجاية.

في معلومات حصرية لينا هنا في بانكير بتأكد أن أزمة الدولار ووجود سعرين للصرف هينتهي في الأيام اللي جاية ولا عزاء للمخربين. والجهات اللي عطتنا المعلومات دي مش هنقول عليها ودة للسرية التامة.. وعشان القرارات الجديدة تكون مفاجأة للسوق السوداء.
المعلومات بتقول كمان إن مش هيكون فيه سعرين للدولار، والسوق السودا هتختفي وكمان مفيش تعويم

وخلينا برضوا نقولكم أن في الوقت اللي بتسمع فيه الفيديو دة في تراجع قوي ومفاجي في دولار السوق السودا.. وهنلاقي وهنسمع في إنهيار الدولار في السوق السودا في الأيام اللي جايه واللي اشتري الدولار بالاسعار الغالية يشربوا بقي.

كمان بانكير سلط الضوء على اللي بيحصل في البنوك وحكاية شهادة جديدة بفايدة 75%..

ومعروف طبعا إن المنافسة بين البنوك بقت على عينك يا تاجر.. فبعد إعلان البنك الاهلي وبنك مصر  طرح شهادتي ادخار 27% و 23.5%.. بدأت البنوك في طرح شهادات جديدة وبمميزات مختلفة.

آخر البنوك اللي طرحت شهادات ادخار جديدة هو البنك الاهلي الكويتي اللي اعلن من ساعات عن طرح شهادة إدخار تراكمية  بعائد ثابت تراكمي 75% فى نهاية مدة الشهادة وبعائد سنوي 18.80% و بحد أدنى للشراء 1000 جنيه..

ببساطة لو اشتريت شهادة بمليون جنيه هتاخد المليون بتاعك وعلية فوايد 750 ألف جنيه بعد تلت سنين.

كمان البنك المصري لتنمية الصادرات EBank  طلع شهادة ادخار جديدة مدتها تلت سنين بسعر عايد 21% سنويا و يُصرف شهريا.

يعني لو اشتريت شهادة بمليون جنيه هتاخد كل شهر 17.5 ألف جنيه لمدة تلت سنين.

الشهادة دي اسمها الشهادة الادخارية الثلاثية المتميزة بلس.

الخبر الأخير معانا النهاردة بخصوص فرض عقوبات قاسية لتجار العملة والمضاربين

معروف طبعا إن الاتجار في العملة بعيد عن القنوات الرسمية مخالف قانونا وبيتعرض اللي بيعمل كده لعقوبة قانونية.

الجديد بقي إن فيه كلام عن تعديلات كبيرة في قانون تداول النقد الأجنبي بعد انتشار تجارة العملة بشكل كبير في البلد.. الكلام اللي بيتقال أن ممكن يكون في تغليظ للعقوبات وهتكون عقوبات قاسية جدا والغرامات هتكون ضخمة.