الدهب هينزل في الوقت ده.. لو عاوز تشتري او تبيع شوف.. اقرأ التحليل دة

 

متصدقش اي حد يقولك معاد نزول الدهب أو ارتفاعه لأن السوق المصري مختلف تماما عن الأسواق العالمية بدليل أن سعره مستقر وبينزل في العالم وبيزيد ويولع في مصر.. الموضوع مفهوش لغز ولا حاجة لكن فيه حالة من الفوضى في السوق المصري وزيادة في الطلب والشراء وارتفاع غير مبرر في الأسعار بسبب نقص المعروض وبشكل  مقصود من الدهب في الصاغة والمحلات.

الدكتور ناجي فرج، مستشار وزير التموين لشئون صناعة الذهب شايف إن وصوول سعر العيار 21  لأكتر من 3600  جنيه على مدار اليومين الماضيين دليل على وجود ارتفاعات غير مبررة، وده  بسبب الضغط الشرائي على السبايك والجنيهات الدهب.
والمسؤول شايف إن لسه الدهب هينزل تاني لانه مفيش   زيادة في البورصات العالمية وإن الدهب زي  أي سلعة تانية إذا زاد عليها الطلب في فترة محدودة يؤدي إلى ارتفاعات غير مبررة، ومتوقع في إجازة منتصف العام أن يدخل مع الوافدين كميات من الدهب تعمل على وجود استقرار في الأسواق.
لكن تفضل دي توقعات لأن التجربة بتقول إن سوق الدهب في مصر ملهوش كبير وإن الأسعار فيه بتتحدد باكتر من حاجة وبيتدخل فيها مضاربات غير قانونية واحتكار وتقليل المعروض وحبس لكميات كبيرة لصالح تجار من العيار التقيل زي ما كان بيعمل امبراطور الدهب روماني عيسى واللي اتقبض عليه وبعدها حصلت صدمة في الصاغة لانه كان الرأس الكبيرة ومحتكر الدهب الأول واتمسك ومعاه 160 كيلو دهب غير نص طن في المحلات والمخازن.